A PAWI LO TI NGAI SUH
Sap hovin “Everythings gonna be alright” tih te, “All Right” tih te, “OK” “Its OK” tih te hi an hmang uar hle a. “A tha leh mai ang” tih te “A tha e” tihna a ni mai aw e. Heng thu ang chi hi hman loh hram hram hi khawvela thil duhawm ber pakhat a ni. Heng thu an hman hunah hi chuan thil hi a kal tluang lo viau tawh thin a ni.
Mizo tawnga kan hman langsar ve tak pakhat chu “A pawi lo” tih hi a ni. “A pawi lo” kan tih hi chuan thil eng emaw hi chu a lo pawi viau tawh thin a ni. Thil pawi a thlen pawhin ‘A pawi lo’ tih hian sawtna a nei tlem hle a, inhnemna tawngkam mai a ni. A pawi tawh vanga pawi lo a ni zawk awm e.
Kan hmalam hun hi kan hmu lawk vek thei lo a, kan duh leh beisei loh thil a lo thlen chang hian pawi hle thin mah se ‘A pawi lo’ tih bak inhnem theihna kan nei lo fo thin. A pawi lo tih tawngkam hmanga kan la inhnem thei nih chuan thil pawi tak chu a ni lo tihna a nih avangin a pawi lo kan ti thei mai awm e. A pawi lo kan tih dawt chiahah hian thil pawimawh tak pakhat awm chu kan hma lak dan tur ruahmanna neih thuai thuai hi a ni a, chutianga a pawi lo khuhna tur ruahmanna leh tihdan tur kan neih chuan chuana 'A pawi lo' tih hi a pawi lo tak tak thei ang a. Ruahmanna leh hma lak dan tur kan neih loh pawhin 'A pawi lo' kan tih theih tlat chuan 'A pawi lo' a, inhnemna tal kan la neih avangin.
A pawi lo ti suh, a pawi hnu-ah engtin nge i tih ang? A theih chhung chu lo inven lawk a, lo fimkhur lawk hi thil pawimawh tak a ni. A pawi tak tak hmain A pawi lo tih hun chu a awm a, fimkhur loh avanga a pawi lo tih hun a thlen fo chuan hma lak dan tur a awm lo a, a tawp hle a ni. Mahse, A pawi lo ti lo tura nun fimkhur te, invenlawk te hi kan tihmakmawh a ni.
Kan thatlai hun hi fimkhur leh uluk taka kan hman chuan nakina nu leh pa, pitar putar kan nih hunah inchhirna tur a awm dawn lo a. Chuti a nih loh chuan beidawng a, kan hlawhchhama, suala kan tluk hunah engtin nge kan tih tak ang le? Pawi titak chunga 'A pawi lo' kan tih vawng vawng hi chuan ngaihtuahna a tawi tuk a, a lo pawi hman hle tawh thin a ni. Mahse, chutiang hun a lo thlen pawh chuan 'A pawi lo' tih theihna nun neih tlat chuan nun hi a hlim lawi a, rilru natna kan pumpelh lawi si thin.
A pawi ti ti mah ila, a pawi lo tihna tur kan neih si loh chuan rilru-ah cham leh riak a awm fo thin a. Chu chuan kan nun hi a lo tihrehawm mai mai thin a lawm le.
No comments:
Post a Comment