269/2018 CAMPING DIARY & CONVICTION/COMMITMENT

KA PUANG ZEL DAWN KA THEIH TAWPIN

 
Rev Dr R.Lalthanmawia chuan Ni 27-28 September 2018 hian kan kohhranah Camp a nei a. Minute hnih chhunga ka sharing kha a la zo lo. Sermon leh ka hun tawn mak tak hi Minute sawm vel turin kan chhunzawm teh ang
 
“Camping chu rualpui deuhin min luhpui ve ang chu” tih te, “Hruaitu in luh loh chuan ka lut lo ang” tih te leh “Hruaitu hian in mamawh hmasa ber” tih te chu ka Whatsapp Message dawn a ni. Mamawh pawh ka inti chiah lo a, tul pawh ka inti hek lo. Hman pawh ka inti lo a ni.
 
Christian Hospital Serkawn-ah hian kumtin Retreat ni thum awh kan nei thin a, zan lam erawh ka tel ngai lo a. Pastor tha tha te leh Evangelist tha tha kan sawm thin a. Sawmna hrang hrang pawh ka la chhang zel a ni. Thalai hruaitu ka ni a, Chhandamna thu pawh ka aupui ve ang tih ka ring a. Kohhran Zaipawl leh Bial Zaipawl-ah thangkhat lian zet a kul a taiah ka inhmang a, Camping luh hi ka mamawh pawh ka hre lo.
 
Camp luh hi hman pawh ka inti lo. Camping ni hi Aizawl lama Training pawimawh tawp khawk an koh ni a ni. District ami mi pali chauh min ko lehnghal. India sorkar sum khawihchetna hmun ber www.pfms.nic.in  ah hian ni khatah Cheng vaibelchhe 6000=7000 vel ni tin sum khawih chet a ni thin a. Chuta ka sum hman chungchanga h ka ziah sual avangin koh ka ni. Ka kal ngei ngei a ngai. Hospital-ah hian Camping tura Chawlh lak an phal ngai lo, Retreat-ah erawh tel ngei ngei a ngai thin thung. Naupang pawl sawm exam tur hi tu nge eirawngbawlsak ang? Camp luh hi hman ka inti lo.
 
Camp-ah ka lut tur a ni. Mi dang berin mamawh tia min hmuh chuan ka lut tur a ni. Ka nun te, ka tawngkam te, ka thil tih te hian eng mah a lo puang chhuak lo a ni chek ang chu. Isua chanchin hi kawng hrang hrangin ka lo puang tlem lutuk a, ka lo chau leh fo thin a ni. Ni tina tihthianghlim ngai, chhandam mek (Sanctification) ka nih hi ka lo theihnghilh leh thin a ni.
 
Hospital ka thleng a, BSF Sipai pahnih hian min lo nghak a. Dar sawm a rik chiah chuan hna ka tan a. Chumi zawh chuan Emergency Ward-ah  damlo pahnih an lo mu bam a. An na hle mai. No-4 Addict nghei tum chu a thisen lak tumin darkar chanve kan zawng a. Damlo na zawk erawh kan la awlsam phian a. Thisen te an lo test chhungin Email hmangin Training tel theih loh thu ka thawn a. Chhanna pawh ka dawng chuang lo na-in Rinnain Isuan hna a thawk ang tih ka hria a, eng mah ka hlau lo. Naupangin Eirawng bawltu pawh awm lo mahse chaw a nghei ka ring lo. Hospital-ah chawlh la lovin ngawi rengin chawl mah ila, buaina a thlen ka ring chuang lo. A thleng a nih pawhin ka tuar mai ang.
 
Email ka thawn zawh chuan Damdawi ngawlvei lo zawk chu HIV Positive a lo ni tlat mai. A inpawm thei lo a, Damdawi ngawlvei zawk a nih a ring tlat mai. Nihna inpawm thei lo leh mahni nihna hre lo chu an khawngaihthlak mai bakah an ngeiawm duh ka ti thin. Khirhkhan deuh deuh tawn ai chuan BSF vai te kha lo ni zawk se, Hindi thiam loh chhuanlamin nam liam leh mai mai ila ka ti a nia. Isua chhandamna chanchin reng reng ka lo puang lo a ni.
 
Dar hnih a ri. NGO hotupa (WADA) lamin min phone sek tawh si a,  tlan paha inhnawh puarin veng pakhat kan pan nghal a. An hnathawk laite ko khawmin, bal ang nian nuan chuan kan inkawm a. Mi panga thisen chu kan la a, kan han test a. Mi Pali chu HIV Positive an ni leh nghal. (Isua hi ring ve se hetiang hian an awm dawn em ni?) An hnawthawk lai chu a hrang hranga kovin, kawngsir, khampangah chuan ka kawm zel a. Piangthar an awm lo. Chhandamna thu pawh ka hrilh tha thum hman lo. Mamawh pawh an inti lem hek lo. Pahnihte chuan an tana tha tur min zawt a, kan inkawm rei hman hek lo. Pakhat chu kham panga zuan thlak a tum zuau hman a. Kan inchelh thei hram a. Pakhat erawh chuan “I ti tak tak a mi?” tih zawhna a zawt nawn fo a. A awih loh thu a sawi chamchi bawk. Private Hospital-ah ka ennawn tir dawn te a la ti lehnghal. Entirna tur pawisa pekbelh tak ka chak a. Khua a thim tawh a, Camp lut tura ka haw a hun tawh ka hre si a, hmanhmawh ngawt theih si lova ka va hah tak em!
 
Heng ho zawng zawng hian Isua hming chu an hria a, an mamawhna leh an nihna erawh an hre si lo. Keini Piangthar intite hian Isua chanchin hi kan nunin kan va lantir lo em! Kan thusawiin kan va lantir tlem em! Chatuan nunna thu hi kan va hlamchhiah ta ve! Hruaitu intite hian buaipui loh tur kan buaipui ta lutuk lo maw? Keimahni lam chiah kan lo inngaihtuah a ni ang e tiin ka inngaihtuah chhuak a.
 
Mi, thih leh dam inkara an awm lai, Damdawia leh rilru lama enkawl vat an mamawh lai, Isua chanchin hrilh an mamawh laia karleh lama bawhzui atana ka lo dah hi a dik em hre lo. (Hetiang hun tak hi Inawhhlum a awl thin a) Ka tih tur ka ti lo a nih pawhin Ka hriat chhun chu a hun leh hmun pawh thlu lovin

“Ka puang zel dawn ka theih tawpin,

Chatuan nun Chhandamtu min pek hi

Ka damlai ni a tlak hma zawng

Ka tan hla mawi ber a ni” 

tiin thutlukna ka siam ta.