227/2017 Thlarau tih at RL Kamlala

Mihlim RL KAMLALA

(Arranged and Based on Kristian Hla Bu)

Lutzathanga fapa upa ber RL Kamlala hi kum 1902 khan Ngurlenah a piang a. Ralte hnam peng Lutmang hnam a ni. A pa hian lehkhathiam a ngaihsan avangin a pian hlimah pencil humtir nghalin an sawi a. Lehkhazir hi a rilruah tuh nghehsak tlat a duh avangin kum5 mi lek a nih a\angin a pa chuan pencil leh lehkhapuante a leisak a, thiam lo chungin ziah dan tur a zirtir \hin a ni. Kum 10 mi lek a nih laii an khua lehkhathiam awmchhun Hangpawla chu Private zirtirtu atana hmangin chhiarkawp bu II thlengin a zirtir a ni. 

Kawnpuia an pem hnu, kum 1919 khan Kolasibah lower primary chu pass chhuakin, Aizawl sikulpui a\angin kum 1921 khan Upper Primary a zo a, zirna chawlhsan ta a ni. Kum 1923-25 khan Kolasib-ah zirtirtu thawkin, zirtir hna thawk chungin Private in Middle English chu 1929-ah first divisionah a zo leh a. Zirtirtu hna a\angin kum 1932 khan a chawl ta a ni. 

A pa zirtirna leh duhthusam angin kum 9 mi khan Pathian lehkhabu lei a ngen daih tawh a, an lei theih loh avanga nuara \ap tawh a nih avangin thiamna a ngaisang tih a hriat theih hle bawk. Kum 10 mi lek a nih lai a\ang tawhin a kum rualpui te nen “Hawh u, Pathian thu i awh ang u” tiin a rukin \awng\aipui \hin a ni.|awng\ai pawh thiam lo khan ‘Thu inchhang bu’ hmangin tawi te tein an \awng\ai \hin. An pemna hmun apianga an inkhawmna leh zaikhawmna hmunah chuan a phak ang tawkin a tel zel a. Kum 1920-ah Aizawla skul a kal laiin Nisapui Presbytery chu chhim vein Pathian thlarauva hlimna a chang ve a, zirlai mah nise zaikhawmna hmunah a tel zela, Pathiana lawmna leh hlimna neiin a zir zo ta a ni.

Mizo hlaphuah thiam zinga ropui ber ber te zinga mi niin, a hla phuah hmasak ber chu 1921 khaa niin ‘Rinin thlir thiam ila’ tih hi a ni a.  RL Kamlala hian hla 100 vel bawr phuah hman niin hriat a ni a, a tam zawk chu kum 1922 atanga kum 1930 inkara phuahte an ni. Kohhran hmasate khan Mizo hla thu hman hi a khawvel lam thil deuhah ngai mahsela Mizo hla hlutna belhchhah turin RL Kamlala hi chuan a hmang mai zel a. A lo mawi em em zawk a ni.

Kum 1931 buhseng laiin Lal Isua inlar a hmu a, chu eng mak taka a inlarna ropui tak a hmuh chuan “Keimahah awm reng rawh u, kei pawh nangmahniah ka awm reng ang’ tiin a a bia a. A bible chang hriatthiam loh leh hmuhfiah thiam loh chu a lo hrethiam ta vek a. A thinlung chu thu-in a khat ta vek a, sawi chhuah a chak em em \hin a. A thil hmuh leh hriatte sawi lovin a awm thei si lo a, an hotuten an hriatthiampui si loh avangin a hah thei hle a. Thlarauva a khah nasat em avangin inthunun hlei thei lovin a awm fo a. Chu chu an hotuten an hrethiam lo a, a hna a\angin a chawlh phah a ni.

A inlarna hmuh leh a thil sawi thu hi ziakin a vawng a. A thuziak ‘Thlarau Entlang (Spiritual Telescope)’ tih a ziak te hi ngaihnawm tak, chik zui tlak a ni a. Mizo \awng a hman thiam dan leh a awm ang hliah hliah dan hi chhinchhiahtlak a ni a. Siamkima leh Revd Chuau\huama te hian ‘RL Kamlala kutchhuak’ tih buah hian an fak nasa hle a. Fak tlak pawh a ni reng a ni.

RL Kamlala hian danglamna tak a neih chu Thlarau thilpek ahmanga hla a phuahte hi a zahin a ngai hlu em em hi a ni. Tunlaia mi \henkhatte chuan lar duh leh lansarh beiseiin pawisak an nei vak lo \hin a. Ani hi chuan “Hlate hi mi hnam chuan an serhin an zah em em a, a phuahtute rawn lo leh phalna la hmasa te te lo phei chuan a bu siam emaw, chanchinbua chhuah emaw, tihdanglam emaw chu an ngam ngai lo tih ka hria a. Kan kristian hlate phei hi chu Hla Serh (Sacred songs) a ni a, Bible thu tluk bawkin ka ngai thu pui”tih hian a ngaihdan a hril hle a. Chutah chuan tawp mai lovin ä Original ang chiaha an chhuah duh dawn loh phei chuan Lalpain mi kawltir ve Hlate hi chu chhuah tel ve lo law law se ka duh zawk”tiin a ngaihdan a puang chhuak a ni.

Tunlai zaipawlte hian kan pawisa ta lo hle mai. Ani RL Kamlala hi chuan “A thluk pawh hi a dik tak ngei chu a hluin ka hria a ni”tiin Mizo hla thluk phei chu a dik taka sak loh hlauvin kumkhuaa a thluk dika kan sak theih nan Solfa dah zel turin min ngen a ni.

A upat hnu chuan lo neiha eizawngin a \ul hle a, khawsak harsa tak chungin kum 62 mi niin 1965 May ni 25 khan chatuana zaia awi turin a kumkhaw ramah min kalsan ta a ni.

Mi a anga ngaiin kum hnih hnu velah Aizawl Jail-ah te hial dah a ngai ta a, mahse a at lohzia chu a hla phuah “Tan hla” thu tluang mawi mam nalh dan atangin a hriat theih a ni. Thlarauva khat a nih avangin a khawvel eizawnna leh hna hian a tibuai lo hle a ni. 

A inlarna hmuh leh a thil sawi thu hi ziakin a vawng a. A thuziak ‘Thlarau Entlang (Spiritual Telescope)’ tih a ziak te hi ngaihnawm tak, chik zui tlak a ni a. Mizo \awng a hman thiam dan leh a awm ang hliah hliah dan hi chhinchhiahtlak a ni a. Siamkima leh Revd Chuau\huama te hian ‘RL Kamlala kutchhuak’ tih buah hian an fak nasa hle a. Fak tlak pawh a ni reng a ni.

A upat hnu chuan lo neiha eizawngin a \ul hle a, khawsak harsa tak chungin kum 62 mi niin 1965 May ni 25 khan chatuana zaia awi turin a kumkhaw ramah min kalsan ta a ni.

Mi beidawng leh riangvaih avanga thim a thute leh indawmkun ngawih ngawihte tan pawh enna a lo thlenga. Min hmangaihna avanga Isuan thihna hial a lo tawk hian kan lungngaih a hnem a, min hmangaih vang ava ni em!

Khawvel thlaler ang maia hrehawmah hian Thlarau thianghlimin a fan phawt chuan hlimna leh lawmna a chang ang a. Khawharna hmun hi vana fakna anga chang thin a ni.

Chatuan thlengin Saron par Isua hi a chul dawn lova, chuvangin min awmpui ang che. Chutiang Lal ropui min awitlei thei, kan aiawha thi hi a awm tih hi mite hian hre ve sela chuan hlim tak leh lawm takin an fak thei ngei ang tiin he hla hian min hrilh a ni.

Thulakna

1. Revd Chuau\huama, RL Kamlala kutchhuak (Second Revised Edition), 2006, Lalchhumi, Aizawl

2. C.Thangdula, Mizo hla phuahtute leh an hlate, N.A, the author, Lunglei

3. C.Chhuanvawra, Hmalai leh tunlai Mizo Hla te, 2011, the author\

4. Lalthlamuana, Hla phuahthiamte hringnun, 2007, Mizoram Publication Board Aizawl

5. Familia Laltansanga Fanai, Internet www.chanchinthar.com

P.S. Hei hi Kristian Hla Bu leh a behbawm atana ka buatsaih a ni a. Chhuah chhawn atan chhuan hman rih loh nise. Thiante endikna tur atana lo upload lailawk a ni.