Zasiama chanchin
(Arranged and Based on Kristian Hla Bu)
Zasiama hi Thanghnuna leh Chhawnlovi fa mipa pali zinga a naupang ber ni turin kum 1900 khan Vaituichhunah a lo piang a, Chhangte hnam a ni. Hmun hrang hrangah pemin, Thingsulthliah, Sesawng, Lungbial leh tlangnuam chheh velah an insawn zing hle. Kum 1920 khan Thingsulthliahah kir lehin a inbengbel a, Thingsul Tlangnuam mi leh saa chhal a ni ta ber a ni. Kum 23 a nih kumin Zachuailovi nen Tlangnuam khuaah an innei a, fapa pahnih leh fanu pakhat neiin, a fanu hi a naupan laiin a boral a ni.
Hmanlai chuan ram \ha zuanin pem hi an awlsam hle tih kan hria a, kan mizo hlaphuahthiamte pawh hi an pem kual nasa hle a. Lal leh upa ten pasal\ha leh hla phuah thiamte chu an khuaa pem turin an sawm fo reng a ni.
Zasiama pa te pawh hian Thingsulthliah lal an hlauh avangin Tlangnuam a\angin Darchhun (Saitual bulah) pem chho niin R.L Thanmawia chuan a sawi a. Hetah hian awm rei lo hle mahsela Saitual lal Dorawta, Kristian \ha tak leh tiduhdah ve ngai lo chuan a khuaa pem tur leh khawnbawl upa, a rorelpui ni tur pawhin sawm mah sela a lunglenna hmun Tlangnuam khuaah bawk an kir leh a ni.
A naupan laiin Zasiama hian skul luhna tur a nei lo a, tleirawl a nih \an tirh hian Thingsulthliah khuaah Kunga hi zirtirtuin a lo thawk a. A nu leh pa remtihna angin a lehkhazir chu a thiam theiin, thu a awih bawk zirtirtu duhsak leh enbik kai a ni. Lawr exam a hmachhawn hian a upa fal deuh tawh nain Lower Primary chu \ha takin a passed a, Aizawla kalzawm tur erawh chuan a thei ta lo a ni.
Zasiama hi pa nelawm tak a ni a, hmel\ha leh pian nalh tak a ni bawk. Pa zahawm tak a nih vei nen invawng fel leh fimkhur tak a nih bawk avang a zahawm hle. Ngaihsan hlawh turin a hunlaia sa kap thei leh \henawmte hleh a, pe reng \hin a ni. Kut themthiam tak, puan \hui thiam hmasa leh khawtlang tana pan theih tura remchang reng a ni. A tlangval hunlai ngaihtuaha Zu in miah lova sawi a ni ngawt pawh hian a entawntlak dan tur chu a hriat hle ang chu. Amah hi ze nghet tak mai, thle zung zung lo a ni a, Kohhran hlim lai pawha khuang bengtu a ni \hin a, a lam ngai miah lo thung. Upa Lianhnuna chuan R.L Thanmawia hnenah a chungchang hetiangin a sawi a, “ Kum sawmnga lai kan inzui chhung khan a thinrim hmel ka hmu ngai reng reng lo” tiin a hrilh a ni.
Melvengah hian pa tling zu in lo an awm lo ang tih tur khawpin zuin an tam a. Kum 14 a nihin Kristianah a hming a pe a, zu in lo awmchhunah an ngai nghe nghe a ni. Chhungkuaa kristian ni hmasa pawl tak pawh an ni. Tlangnuamah kohhran ding tham a awm loh avangin hun rei tak chhung chu Thingsulthliah kohhranah an lawi a, Pathian thu awih hmasa te hian an thiam ang angin rawng an bawl ve zel \hin a ni.
A tlangval lai hian Aizawla Pi Zaii, Missionary hnenah Solfa a zir a, intermediate chu \ha takin a pass a. Lawmpuina atan Sankey hla bu a pe bawk a, a thiam ang tawkin sap hla te chu a zira, a thiam nal hman hle a ni. Amah hi zai ngaina tak leh aw \ha tak a nih avangin zaihruai, khuang bengah an hmang ta nghal zel a. Kum 1923 khan Thingsuthliaha lawi chungin, Tlangnuamah Zaipawl a din a, kohhran lam pawhin an entawn zawk hial a ni.
kum 1933 ah Kohhran Upa hmasa ber atan Tlangnuam Kohhhran Upa-ah thlan a ni a, hemi kum Presbytery inkhawmpui Sihfaa neihah nemngheh a ni nghal a. Kum 20 chhung zet chu amah chauh kohhran upa niin kohhran a enkawl a, zaipawl leh khawtlanga mawhphurhna nen a indaih lo thei em em a. Chuti chung pawh chuan Thingsulthliah tlangdunga kohhran hnarkaitu pawimawh ber a ni ta zel a ni. Tlangnuam Kohhran upa ni chungin Thingsulthliah Upa nih a kawp a. Hei hi Upa Chawngfianga Kolasib lamah 1946 khan an sawn tak vang a ni. Melveng kohhran a ding a, an upa chu a hna avangin a awm rei tak loh avangin Melveng upa ni tura ruat leh nghal a ni.
Kum 1946-a Mizo Union a lo din khan Tlangnuam Unitah President a ni a, politics lamah pawh sulsutu leh a chhiat a \hata mawhphurtu ber a ni bawk. Ram leh hnam hmangaihna avanga politcsa tel a nih angin, Lalban leh kawngzawh a, inchirhthehna nasa tak a lo thlen khan Kohhran mite tih chi a ni lo tiin a ralbang nghal a. A tel nawn ta lo.
Kum 1948 khan Durtlang dam dawi inah TB natna a vei a ni tih a inhria a, beiseina nei tawh lo mahsela a beidawng hmel hmuh tur a awm lo a ni. Hun rei tak TB natna an dahhranna hmun ‘Inte thawvengah’ dah hran a ni a. Dah hran chunga duat hi a tuartu tan chuan a na hle ang le. Dam beiseina awm lo chungin Tlangnuam pan turin an khaw tlangval tlawmngaiten an zawn haw a. Kum 1952 April ni 3 khan thina luipui chu hlim takin a daikai ta a ni.
A chanchin ziaktu RL Thanmawia hian a khawngaihthlakzia heti hian a ziak a, “Tlangnnuam khua chu thleng mah se pa nelawm tak chu nel ngam a ni tawh lo va, a khaw pa rawn chu rawn hleih theih a ni ta lo. Venglai li taka khawbu luahtu chuan a in leh lo a luah a rem tawh lo va, Kohhran zaikhawm leh kahwtlang puipunnaa thusa ber \hin chu hmun reh takah, daitamah a awm a ngai ta. An duhsak vang emaw, an diriam vang emaw pawh ni hauh lovin mi dangin chu natna \ihbaiawm tak chu an kai ve hlauh avang chauhvin a awmna tur inte an sak sak a, chutah chuan khawhar a hun hnu hnung chu a hmang ta a ni. Ral khata kohhran inkhawm Pathian faka zai thawm chu hre mah se a zawm ve phak lo va, rimawi ngaina tak Zasiama tan chuan zan lama vabak leh chingpirinu hram chu rimawi a hriat chhun a ni ta.
Natna \ihbaiawm taka na a nih miau avangin pa tawmngai Zasiama chungah chuan tlawmngaih chhuah theih a ni lo. Ama hla \ha tak takin a awih tlei ho Tlangnuam leh a chheh vela nula leh tlangval, khawtlang mipuite chuan ahlate sa chunga a ruang chu tlaivarpui inhuam hle mah se thil tih thiang a ni si lo... Hrichhe vei a ni miau mai a, nausen hlamzuih thi ang maiin a zan azanin thlan an lai sawk sawk a, laina hnai zual mi pahnih khat lekin an vui liam ta a ni” tiin khawngaihthlak takin a chanchin a ziak a ni.
1. RL Thanmawia; Tlangnuam hla kungpui pahnih : Zasiam leh Sialkhawthanga, 2014 2nd Edition, Din Din Publication, Aizawl
2. Hausanga Hauzel; Upa Ralngama Hrahsel leh a hlate, 2010, Pub by Khawdungsei Welfare Organisation Aizawl
3. Dr R.Lalauva, Mizorama Mizo mi bikte thu leh hla lama talent neite Bio Data, 2010, the author, Aizawl
4. Laibata; Hmar Arsite, 2007, Mizoram Publication Board; Aizawl
5. Lalthlamuana; Hla phuahthiamte hringnun, 2007, Mizoram Publication Board, Aizawl
6. R.Lalrawna; Mizo rohlu, 2009, the author; Aizawl
P.S. Kristian Hla Bu leh a behbawm lehkhabu atana lakkhawm a nih angin, chhuahchhawn atan chuan hman rih lo ni sela. Thianten min endik sak hnuah erawh thuhran a ni e. Reference pawh ka la dah hman lo
No comments:
Post a Comment