262/2018 HIV AIDS VEITE DINHMUN

TOPIC : HIV/AIDS VEITE DINHMUN

(Radio Talks @ All India Radio Lunglei  on 23 May 2018)

HIV AIDS veite dinhmun kan sawi dawn chuan TB Natna leh Mizote chungchang hi sawi lawk ila. India ramah BC 1500 daih tawh khan Rig Veda-ah hmuh a ni. Mizoramah kum 1937 chhovah khan TB kan hmelhriat \an a. 

L. Biakliana leh Kaphleia te, Mizo zinga an lehkha ziah thiam avanga hming dai tawh ngai lo turte kha TB natna vangin an thi a. Durtlang damdawi in sirah 'In te thawveng' an sakah dahhrangin, damlo kan chu sawi loh "He in hi tlawh phal a ni lo. A tlawh kan hmuh chuan a pawi hle ang. Mi tin tana \ha tur a ni" tiin khawhar takin an awmtir zawk a ni. 

Kristian Hla bua hla lar tak tak phuahtu; Zasiama pawh kum 1948 khan TB natna a vei  awm a. Kum 20 chhung zet mahni Kohhran dinah Upa niin, 'In te thawveng'-ah chuan an dah a. Beidawng taka an awm hnuin Tlangnuam tlangval tlawmngai zualin an zawn haw a.  RL Thanmawia chuan  "Tlangnuam khua chu thleng mah se pa nelawm tak chu nel ngam a ni tawh lo va, an khaw pa rawn chu rawn hleih theih a ni ta lo.  Venglai li taka khawbu luahtu chuan a in leh lo a luah a rem tawh lo va, Kohhran zaikhawm leh khawtlang puipunnaa  thusa ber \hin chu hmun reh takah, daitamah a awm a ngai ta. An duhsak vang emaw, an diriam vang emaw pawh ni hauh lovin mi dangin chu natna \ihbaiawm tak chu an kai ve hlauh avang chauhvin a awmna tur inte an sak sak a, chutah chuan khawharin a hun hnu hnung chu a hmang ta a ni...

Natna \ihbaiawm taka na a nih miau avangin... Tlangnuam leh a chheh vela nula leh tlangval, khawtlang mipuite chuan a hlate sa chunga a ruang chu tlaivarpui inhuam hle mah se thil tih thiang a ni si lo. Hrichhe vei a ni miau mai a, nausen hlamzuih thi ang maiin a zan a zanin thlan an lai sawk sawk a, laina hnai zual mi pahnih khat lekin an vui liam ta a ni" tiin khawngaihthlak takin a chanchin a ziak a. TB veite dahhrang a, khung hran an ni \hin ang hian HIV hrikpaite hi khung hran ni lo mahse kan thinlunga kan dahhran dan leh kan hmuh dan chu khatih hunlaia TB veite nen khan a lem chuang awm lo e. 

Kum tam tak kan hmelhriat tawh TB Natna hi kan la buaipui zel a, TB natna chi dang MDR  TB phei chu la hlauhawm lehzual tak a ni. Boruaka leng vel a ni tlat a, vanduaia hip lut leh taksa chak lo chuan an kul cho phah \hin. Kum 1990 (Oct) khan HIV hrikpai chu kan hmu chhuak a, Kum 30 a vei dawn meuh chuan kan ram hi  HIV avangin a zawr ta hle mai. Mi nawlpui hi kan fing tawh a, HIV kaina kawng chi li pawh kan hre tawh vek a, kai theih lohna pawh kan hre tawh hle a. HIV hi boruaka leng vel a nih loh avangin kai darh har awm tak hi a ni a. Mahse, boruakah a leng emaw tih turin HIV kai a pung nasa a, HIV hrikpaite kan la hlau hle kan ti thei ang. 

HIV AIDS hi kan hriat tirh chuan thihpui ngei ngei tur natna \ihbaiawm takah kan ngai a, kan hlau hle a nih kha. A kaichhawn danah nun uluk loh vanga kai an tam \hin em avangin kan thinhrikin, kan endawng nasa hle a. HIV hrikpai nia kan hriatte pawh \ihkhaiah neihin kan kawm serh \hin. Mahse hun inher zelah, HIV hrikpai hmuhchhuahte hi nun uluk lo (High Risk Group) te aiin mi nawlpuiah hian kan hmu chhuak tam tawh lawi si a ni. Thiamna a sang zel a, zirmi ten an zirchiang zel a, kan ngaih ang em em a hlauhawm chu a lo ni chiah lo deuh tih kan hre zel a. A tihdamna damdawi la hmuchhuak chiah lo mahse enkawl theih a nih zia leh enkawlna \ha zawk pawh an hmuhchhuah belh zel a ni. He natna avanga beidawnna khura tlu lut tawhte, lungngai ngawih ngawih tan pawh beisei tur a awm ta zel mai.

Tunah hian HIV AIDS natna bik tana damdawi in hi kan la nei lo a, Presbyterian Hospital, Durtlanga hmalakna Grace Home chiah hi hemi puala enkawlna kan neih chu a ni ta. HIV AIDS natna enkawlna leh damdawi a thlawna lakna Lunglei ART Center hi chhim lam tan a ni deuh mai bawk.

Mi zawng zawngin harsatna kan nei vek a, \henkhat chu a te deuh pawh a ni thei a, a lian pawh a awm thei bawk. Mi ten harsatna an tawh hi a nep tih ngawt chi a ni lo a, harsatna tawktu tan chuan harsatna a tling a ni. Chhim lama HIV hrikpai, AIDS vei ten harsatna an tawh mek te a\ang hian an dinhmun hriat tum ta ila a \ha awm e. A tlangpui chauh kan tarlan theih dawn avangin kaihkawp tum ta bawk ila :

A. HIV HRIKPAI TE LEH A ENKAWLTUTE DINHMUN

1. ART Center, Damdawi lakna hmun a tlem : Chhim lam tih hian Lunglei, Lawngtlai leh Saiha District bakah Thenzawl thlen hma tih hian huamtir ila a dik awm e. Heng huamchhunga chengte hian Lunglei Civil Hospital, ART Center hi an pan khawm a,  Link ART Center Lawngtlai leh Siaha-ah damdawi an lak chhunzawm thung. Damdawi la tura inziah luhna hmun hi kar a hla deuh chu a ni. District tinah emaw, Sorkar damdawi in tina a awm hunah chuan an dinhmun a zia awm tawh ang.

2. Thawktu an indaih lo : HIV Hrikpai, AIDS vei kan tih te hian enkawlna damdawi bakah rilru leh thlarau, chenpui chhungte nen lama inenkawla inhriattir ngai a tam hle a. Chutianga hmaichhan leh Phone hmanga inkungkaih reng turin hetiang lama thawk; ART Center leh ICTC thawktu te an indaih lo hle a ni. A bika enkawla viltu an mamawh avangin enkawltu tur an mamawh zual hle.

3. HIV AIDS tana Doctor bik an mamawh : Rilru lam enkawlna lam chu thuhranah dah ila, taksa leh damdawi hmanga inenkawl tur chuan mi thiam bikte an ngai a. Tunah hian Kum thum vel ART Doctor Chhim lamin kan nei tawh lo a, tu mah dem theih a ni lawi si lo. Hlawh sang zawk duhin Doctor ten an chhuahsan zel a ni. A lungchhiat thlak hle mai, HIV AIDS atana Doctor bik mamawh a ni a. Missionary rilru puchunga thawk duh awm se tih hi duhthusam a ni ta.

4. Counselling chhunzawm reng a har : Counselling chu nunphung hmasawn tura thlakthleng (Behaviour Change Communication) a nih avangin vawi khata zawh mai a theih loh a. Harsatna leh buaina sukianga kawng inkawhhmuh tura Counselling neih reng hi a \ha hle a. Mahse, Indaihlohna avangte, zahzumna avangte leh pan reng nachang kan hriat loh avangin harsatna a thuah hnih fo mai. 

B. MI MAL LEH MIPUI INKAR CHUNGCHANG :

1. Support Group : HIV AIDS veite hian inthup reng renga hun an hman chuan thaw-ip-pikna a zual a. Harsatna an tawhin puitu an nei lo fo \hin. HIV AIDS a hluar zel kan ti a, an inthup \hup avangin tu mah an inhre lawi si lo a ni. Dinhmun inanga dingte inpuihtawnna hun leh hmun an mamawh hle a ni.

Chutihlai chuan Chenpui chhungkaw inkarah te, nupui pasal inkara inthup tlat a awm hian inpuih tawn a theih loh a.   Inthup lova, harsatna inpuitawn tura an dinhmun anga indinthiamtir turin rintlak an mamawh a ni.

2. Update a awm reng \hin : He natna hi khawvel zirchian mek, khawvel harsatna hrivei natna (pandemic) a ni tawh a. Mi thiamten an zir chiang reng a, hmuhchhuah leh \ha zawk an hriat chho zel avangin damdawia inenkawlna leh zirtirna hi a danglam reng a. HIV hrikpaite leh chenpuite pawhin ngaihven reng a \ul a. Inbengvartawn hi kan mamawh takzet a ni.

3. |awng\aipuitu an vang : Natna khirhkhan tuar mektu chuan an lawina Biak in tinah \awng\aipui an hlawh a, thlamuanna an nei fo \hin. HIV AIDS veite hian \awng\aipui an hlawh hlei thei lo a, chu chu sawi loh, Mizo Society-a mawi tak mai, damlo kana sum leh paia inpuih tawn leh \anpuina inpekte hi a la hla hle mai. Sakhuana huang chhungah hian hming lam khera \awng\ai kan duh \hin a, a \ha e, hming lam lova HIV AIDS hi thupuia nei reng theih a hun ta.

4. Sorkar leh NGO-a Ham\hatna chungchang : Sorkar chuan HIV hrikpai, AIDS vei te tan ham\hatna hrang hrang a siam a. Bus-a a thlawna chuan dan tur te, Ration buhfai lak dan phungah te, Nutrition chungchangah te hian ham\hatna awm pawh ni sela a mihring ber ten an chhawr ngam lo fo \hin a ni. 

5. Hriat fuh loh leh hriat dik tawk loh a la tam hle : HIV AIDS hming kan hriat ngun ang leh kan hne tawh dan ngaihtuah hian Hriatna Dik leh Kimchang kan nei tawk lo a. Rindan leh ngaihdan hmanga inenkawla, beiseina dik lo neih hi a awl zual hle a. Chutiang a nih chuan |awng\ai dam thei pan reng a, Moringa hnah emaw, Internet lama puihna leh beiseina zawn reng a awl hle. Thil theih loh beisei reng ai chuan kan ban phak maia inenkawlna ngaihven hi thil pawimawh zawk a ni.

ANMAHNI MI MAL DINHMUN :

1. Self Stigma & Discrimination : HIV Hrikpai hian taksa a na ngawt ngawt nghal lo a. Rilru lam erawh a na nghal ngawih ngawih \hin. Na ai chuan enhran nih hi a hrehawm zawk fo a. Hrikpaite hian inkiltawihna an nei nghal zel a, mahni indah hrangin khawvel hran an nei ti ila a dik awm e. Heng zawng zawng hi kan khawtlang siam a tam zawk a ni. 

A tirah nun khawlo ten an lo vei hmasak \hin vang nge ‘Misual natna’ anga kan la ngaih avang hian kan la enhrang a, kan endawng deuh bik chu a nih hi. Hei tak hi an dinhmun tilang chiang bertu a ni. Mi hriat an hlauh chhung chuan inkiltawihna a awm dawn a, chu chu zirtirna hmanga beih reng tur a ni a. HIV hrikpai an tam tak tak huna reh mai tur anga ngaihna a awm \hin a, chu chu ngaihdan dik lo tak a ni.

2. Retheihna hi harsatna pakhat a ni : HIV hrikpai te zingah hian chhungkaw rethei leh lehkhazir sang lo, rilru paukhauh lo tan hian buaina a tam zual emaw tih a awl hle mai.  Ei leh in chungchang thu te, damdawi in leh inenkawlna hmun pan zung zung te, rilru leh taksa hahdam taka awm thei tura inngaihsaktawn te hi a ngai hle a ni. Kan hnam hi a la naupan angin hriselna lama inenkawl  hi kan la ngaihthah bawk si avangin an dinhmun hi a khirh zual hle. 

3. Natna dang a kaihhnawih lakah fimkhur a ngai : HIV hrik taksaah a lo tam  chuan taksa ralveng sipai an ei chhe hma hle a. Natna hrik dang a lo luhin an kulcho phah fo mai. Hritlang awmna, khawsik leh kaw\ha lo pawh hi buaipui tham a ni fo mai. A kaihhnawih natna dang (opportunistic Infection) a awm thuai \hin. Chutiang natna a awm dan azir chuan Clinical Stage pawh a \hen theih bawk. |halbe vung, Awmna benvawn, Ka na leh Ulcer damhlei thei lo. Khawsik, kaw \ha lo rei tak, Ka na var \hit \het \hin te, TB, Pneumonia reh hlei thei lo te, Anaemia (chhan hriat lova thisen tlem tak) te, PCP-Awmna chi khat, rang taka thihpui theih te, Awmvel te hi a kaihhnawih natna neih awlsam te an ni. 

4. Rilru lama an dinhmun: Rilru ber a dam loh hi chuan taksa hi a dam mawh khawp mai. Taksa kan enkawl uluk ai mah hian rilru enkawlna a pawimawh hmasa kan ti thei awm e. Rilru na reng renga hun hman te leh Inthiam lohna emaw, thinrimna emaw a awm reng chuan damdawi hmanga inenkawl reng a harsa a. Damdawi ei tha a tho hlei thei lo a, phurna reng reng hi a awm thei lo fo. Beidawnna sual (depression) an nei thuai \hin. Phili leh chi ai reng renga hun hmang \hin tan chuan khawvel hi chen a nuam lo a, hlimni kawl a eng thei lo a ni.

Tlangkawmna :

HIV hrikpaite harsatna, an mamawh leh kan hriattur \ul bik tlangpui kan sawi ta a.  HIV Hrikpaite, AIDS vei te dinhmun kan hre chiang thei ta a. Heng a\ang hian \anpui dan tur te, an tana malsawmna ni turin bul i \an ang u. Tunah hian HIV Hrik paiin, AIDS natna kan vei lo a ni thei a. Engtikah emaw chuan kan chhungte, kan \hiante leh kan mo leh makpa hmangin kan la buai mai thei. Chutiang hun a lo thlen hma chuan inpeih lawk ang u.

Original Fonts : VNT Times
Broadcast at All India Radio, Lunglei on 23 May 2018 @06.45 -07.00 AM