263/2018 THALAI KAWMTU THUZIAK

KAN LA BUAI ZEL DAWN! - I

Kum 9000 kal ta khan TB natna vei hmuh a ni a. India ramah BC 1500 daih tawh khan Rig Veda-ah hmuh a ni. Mizoramah kum 1937 chhovah khan kan hmelhriat \an a. TB natna hi Mizovin Ngawr hri kan ti a. Kum 1882-ah German mi thiam Robert Koch-an a hmuhchhuah a ni.

L. Biakliana leh Kaphleia, Mizo zinga an lehkha ziah thiam avanga hming dai tawh ngai lo turte kha TB natna tuarin an thi a. Durtlang damdawi in sirah 'In te thawveng' an sak sak a, damlo kan chu sawi loh "He in hi tlawh phal a ni lo. A tlawh kan hmuh chuan a pawi hle ang. Mi tin tana \ha tur a ni" tiin khawhar takin an awmtir zawk a. 

Kristian Hla bua hla phuahtu lar tak; Zasiama pawh kum 1948 khan TB natna veiin a awm a. Kum 20 chhung zet mahni Kohhran dina Upa niin, 'In te thawveng' ah chuan an dah a. Beidawng taka an awm hnuin Tlangnuam tlangval tlawmngai zualin an zawn haw a.  RL Thanmawia chuan  "Tlangnuam khua chu thleng mah se pa nelawm tak chu nel ngam a ni tawh lo va, an khaw pa rawn chu rawn hleih theih a ni ta lo.  Venglai li taka khawbu luahtu chuan a in leh lo a luah a rem tawh lo va, Kohhran zaikhawm leh khawtlang puipunnaa  thusa ber \hin chu hmun reh takah, daitamah a awm a ngai ta. An duhsak vang emaw, an diriam vang emaw pawh ni hauh lovin mi dangin chu natna \ihbaiawm tak chu an kai ve hlauh avang chauhvin a awmna tur inte an sak sak a, chutah chuan khawhara a hun hnu hnung chu a hmang ta a ni.  Ral khata kohhran inkhawm Pathian faka zai thawm chu hre mah se a zawm ve phak lo va, rimawi ngaina tak Zasiama tan chuan zan lama vabak leh chingpirinu hram chu rimawi a hriat chhun a ni ta.

Natna \ihbaiawm taka na a nih miau avangin pa tlawmngai Zasiama chungah chuan tlawmngaih chhuah theih a ni lo. Ama hla \ha tak takin a awih tlei ho Tlangnuam leh a chheh vela nula leh tlangval, khawtlang mipuite chuan a hlate sa chunga a ruang chu tlaivarpui inhuam hle mah se thil tih thiang a ni si lo. Hrichhe vei a ni miau mai a, nausen hlamzuih thi ang maiin a zan a zanin thlan an lai sawk sawk a, laina hnai zual mi pahnih khat lekin an vui liam ta a ni" tiin khawngaihthlak takin a chanchin a ziak a.

Kum tam tak kan hmelhriat tawh a, TB Natna hi kan la buaipui zel a, TB natna MDR phei chu la hlauhawm tak a ni. Boruaka leng vel a ni tlat a, vanduaia hip lut leh taksa chak lo chuan an kul cho phah \hin. Kum 1990 (Oct) khan HIV hrikpai chu kan hmu chhuak a, Kum 30 a vei dawn meuh chuan kan ram hi  HIV avangin a zawr ta hle mai. Mi nawlpui hi kan fing tawh a, HIV kaina kawng li pawh kan hre tawh vek a, kai theih lohna pawh kan hria a. HIV hi boruaka leng vel a nih loh avangin kai darh har awm tak hi a ni a. Mahse, Boruakah a leng emaw tih turin HIV kai a pung nasa hle.

HIV AIDS hi Natna naupang tak, natna khirh khan tak leh \ihbai awm tak hi chuti maiin a reh dawn lo. Kai hlauhawm dinhmuna ding te ai chuan mi nawlpui kai thar an pung tawh pawh hi mak tak a ni. Kan benga kan hriat hi a takin kan awih lo a nih ka ring \hin. Kristian nun te nen hian inang deuh te pawhin ka hre \hin a. Tu mahin meidil tlak kan duh lo a, kan hlau \heuh awm e. Mahse, Vanram kai tura bei sauh sauh erawh kan vang hle mai.

Heti zawng hian saw ila, kan kristian nun nen tehkhin ila. Kristian rama thleng awm pawha lang lo a ni a mahse, Inpawlna him lo, Pathian duh loh zawng tih hi kaichhawn tamna ber (68.10%) a ni a. Ruihhlo chu sawi loh, hriau thianghlim lo hman a\anga kai (26.57%) pawh hi tam tak a ni. Naupang, pawisawi eih lo ten an kai (3.22%) hi chu rilru a na a, an kaina ber hriat loh (2.01%) pawh hi ngaihtuah tham a ni. 

Drug Addict te, KS te, Mawngkawhur te, Ngawlvei te leh nun thlahdah tak tak te chu an fimkhur tawh a, HIV Hrik an pai tawh mang lo a. A langa \ha ve a ngaih si, mi pangngai anga lang te hian an kai tam tawh zawk a. Sakhaw puithiam a\anga sumdawng hausa, kawngluan a\anga Officer thlengin kan bang tawh lo nia. Chuvangin tunah HIV Hrik hi kan paiin, AIDS kan vei (effect) a ni kher lo thei a, engtikah emaw chuan kan chhungte, kan \hian te, kan \henawmte kaltlangin min la luhkhung (affect) dawn tho a ni.

Chuti a nih si chuan kan rilru hi kan lo inbuatsaih lawk tur a ni. Kum 1986 khan India rama HIV hrikpai hmuhchhuah a ni a, Tamil Nadu sorkar chuan a hmuchhuaktu Doctor panga ngawt a suspend a, Sorkar chu lawm zawk awm tak a ni. Mizoram pawh kan inpeih hmain HIV AIDS in min deng dawt a, kan inpeih hman lo. HIV hrikpai ngeia inringa lo kal \hin te pawh hian inringhlel tak chungin thisen an lo test a.  'HIV Hrik i pai a' tih emaw 'I thisenah HIV Hrik kan hmu chhuak a' tih pawh hian an hmelah 'Mak tihna chhinchhiahna hlir ka hmu \hin' Tu mah kan inpeih ngai lo a, hriat tam erawh chuan a thawk nep deuh mahna; Phili chung an awm loh avangin.

Vai leh hnam dang, rukru leh suamhmang lakah kan ram a boral ai chuan he natna avanga Mizo hnam a ral hi a rinawm zawk a ni. Tuna harsatna hmu reng si hian thil dangah kan la peng leih leih a, tih tur ber hre lovin ‘Where?’ te kan ti rilru reng a. Chhandamna leh Liberal theology kan buaipui a, mahse Pulpit tlangah Kristian ram chhan a, hnam dinchhuah nana pawimawh tak kan him pawimawhna te hian sawi ava hlawh lo tak em!

Ani lawm ni Pu Editor, |halai Kawmtu-ah hian heti chen lek hian HIV AIDS chanchin sawina hmun a awm lo a, a chanchin lairil tak tak sawi pawimawhna zawk kan sawi pawimawh ta a nih hi.