ALLEGORICAL INTERPRETATION
(Ka ngaihdan chuan...)
Pathian thusawi leh ziah kawngah hian hrilhfiah dan chi hrang hrang tam tak a awm a. Chung zingah chuan mite ngaihsan lem loh tak, Pathian thuzirte phei chuan an hman khat tak pakhat a awm a. Chu chu ‘Allegorical Interpretation’ hi a ni. Sap\awng lamah chuan Allegory tih hi thusawi, thuziak, hla leh Drama etc. ten entirna an neih dan sawina a ni a, a sawitu, a ziaktu tum pawh ni lo, ni thei awma kan lo hriatfiah dan sawina kha a ni a. Ruah mual liam ang maia thawkpuat \hin a nih avangin a daih rei lem lo a, hrilhfiahna titamtu mai a ni. Zirtirna dik lo leh min hruai sual thei thu chhakchhuah awlsamna tak pawh a ni. Zeldin thusawi a awl hle a, ni awm tak hmanga thuchheh kual hi a nih avangin sawi mawi chawp a, entirna hmanga hrilhfiah tur zawn chawp ngai hle \hin a ni.
Bible kan chhiar a, kan zir a, kan sawi dawna thu pawimawh tak kan hriat reng tur chu hei hi a ni. Bible thu hian “Tu te tana ziah nge?” tih te, “Engtika ziah nge?” tih te, “Engvanga ziak nge?” tih te kan hriat hnu-ah “Kan tan hian eng nge a pawimawh a, kan nunah engtin nge kan lakluh ang” tih hi kan ngaihtuah tel tur a ni. Chuti a nih loh chuan “Keimaha a thawh dan” tiin kan sawi zuap zuap ang a, mi dangah a thawk ve thei lo vang tih a hlauhawm a ni. Bible sawi dan leh a sawi tum ni miah lo hian mihring \hahnemngaihna avangin kan sawi kur dup ang tih a hlauhawm thei \hin.
Pathian thuziak ang diak diak ni lova, keimahni lamin thlarau lam kawh leh entir neia kan hriat sawina a ni a. Mahni duhzawng, vei zawng leh kan tuina zawng chauh kawhtir a, vuak len a awlsam avangin a him lo fo \hin a ni. Kohhran \henkhat te, thuhriltu \henkhat hi chuan an chawi lar hle a, kalsual kan tih fo chhan pawh a ni a, kalsual chu an inti bik lawi si lo. Lo hmu a, lo hretu tan chuan kalsual, sawisual tih loh theih loh a ni ve \hin.
Mizote zingah hian kan ching uar emaw ni tih theih turin kan hmang nasa a. Nuho ten an puan bih \ha paha ‘Ka thinlunga a thawh dan chuan...’ ti chunga duh tak maia an han sawi hi chuan rau riau bik hian kan hre \hin. Kawng \ha zawka min hruai theih tho avangin hnual suat ngawt theih erawh a ni lo. Tih miah loh tur a ni lo a, chawilar lutuk a hlauhawm kan ti mai a ni. Mahni duhdan leh phak tawka Pathian thu behchhana vuak len lutuk a awlsam em avangin kan Pathian thu behchhan hi kan uluk a ngai hle a ni. Mi thinlunga a thawh dan miin an sawi tlat chuan ‘a thawk lo e’ va tih chi phei chu a ni hauh law. A ngaihtuahna mil, a hriatfiah phak tawka sawi a ni a, a ngaihpawimawh mil tur Bible chang a thlang chhuak pawh a ni thei a, kan hriat phak loh a nih avangin a sawi \euh theih a ni. Bible tum leh ziah chhan piah lam pawh va zeldin vak se a dik lohna tur kan hre dawn si lo a.
Kan rilrua kan ngaihtuahna, kan vei zawng leh kan ngaihpawimawh sawi tur pawhin Bible chu kan behchhan tur a ni tho a. Mahse, Bible behchhanin thu kan sawi tur a ni mah zawk awm e. Chutiang a nih ngat chuan thu chuang tlai leh him lo a tlem ngei ang a. A behbawm lama kal kual vak lovin Thutak tak sawichhuah pawh a awl zawk ang. Kan Pathian thu lakchhuah leh \anchhan, a laimu hre tur chuan Bible sawi chhan i ngaihtuah tel ang u kan ti mai a ni e. Chutianga Bible sawi chhan hre tur chuan engtin nge a him chin chu kan hriat thei tak ang le?
Kan thusawi leh Bible sawi dan, a sawi chhan, a sawi tum a inmil em tih ngaihtuah chungin hun kan hmang ang a. Bible ziah hunlaia mite dinhmun, khawvel nihphung nena chhui hmaksak a ngai fo a. Chutianga a inmil a nih pawhin, Bible thu kan hrilhfiah dan tur chu Bible thu vek (Hmun danga mi) nen a inmil thlap em tih finfiah hnuah a inmil a nih phawt chuan thu \ha tak, rintlak tak kan puangchhuak thei dawn a lo ni. Thupuan leh Daniela ziak chauh ngaihven tan chuan kalsual a awlsam hle a, ziak danga mi an ngaihthah thuai a, nun balance lo tak, kohhran pawh sirhe tluiin hmuh a awl \hin a ni. Bible sawi tum tak aia rilrua thu awm kan chhakchhuah tam lutuk chuan fel hlel a awm thuai \hin a. Kan thusawi tur milin Bible chang behchhan tur kan zawng reng palh ang tih a hlauhawm a ni.
VNT Times @Thalai Aw 2017
No comments:
Post a Comment