274/2018 Ruatlawk Theology -III

ISUA  HI RUATLAWK A NI - III

( Bible : Matthaia 13.11; I Kor 2.7; Epe 1.11 )

Beng hriatna leh ka chhia leh tha hriatna zawng zawngin Isua chu Adama leh Evi bawhchhiatna avanga suala tlu tawh chhandam turin Bethlehemah a lo piang tih chu ka hre ta. Kalvary Krawsa thi tur leh min chhandamna turin ka tan a lo piang a ni tih pawh ka ring ve ta a. Engkim ka hre ta vek mai? A nunna ka tana a hlan angin ka nun hi Isua tan ka hlan ve tawh ang tiin ka thuthlukna (Duhthlanna) ka siam ta ngawt mai a ni. Ka piangthar tawh tihna em ni le? 

Ni mai e, Isua thihna avangin chhandam i ni.Khawngaih vang chauhin min chhandam  (Krawsa thihna kha) tih kha rinna hmangin ka lo ring ve thei ta a ni. Chu  Isua rin baka chhandamna chu a awm thei lo (Joh 14.16). Chutianga ring vek tawh chu engtin nge sualah i tluk leh thin le? Hmanah pawh chutiang ang chiah chuan i piang thara, mahse i da leh a, i tlu leh zel si a ti raw? Hmana piantharna  (Chhandamna) i chan kha a dik ta lo tihna em ni ang?

Ngaihtuah chiang teh. Piantharna kawngah hian mihring hi a duh angin ngawtin a awm thei nghal lo asin le. Mihring hi amahin a piangthar ngawt thei lo.Thlarau thianghlim hna thawh a ngai tih kohhran thurin pawhin a sawi kha. Pa Pathian chuan Chhandam tur a thlang a, Fapa Isua Krista chuan Pa Pathian thlan tawh te chu Krawsah a tlan a ni. Thlarau thianghlim chuan Pa Pathian thlan te hnenah a bik takin hna a thawkzui thin a,a hlawhtling ngei ngei thin. Thlarau thianghlim puihna lo chuan a hlawhtling thei lo a nih chu. Ring thei turin a tanpui ti ila a dik awm e.

‘Keimah lovin eng mah intithei lo’ titu Pathian khan mihring indahsan avangin mahni thua pianthar tum ngawt mai an awm ta. Pathianin belruat, koh bik a neih chuan ava fair awm lo ve! Juda Isakriota te kha phatsan tura ruatlawk a nih chuan  Pathian dik ava ni awm lo ve tiin kan sawi thin. Sam ziakah mantirtu chungchang ziak lawk a ni daih tawh a. A hming chuan a sawi lo a, mahse Mantirtu tura hna ruak kha a zirtirte zinga a awm ber (Juda) chungah a tla mai tih ngaihdan pawh a awm kha le. An nungchang azir zela an chunga tla thina ngai pawh an awm bawk a, a hahdam ru phian bawk a ni.

Tirhkoh Paula ten  Jentailte tieng tua a nu pum chhunga a awm lai ata tawh bel ruat ka ni (Tirhkohte 9.15) an tih chuan kan pawm a, Mari thlan bik, voh bik leh Pathian ngaihsak zawng a nih thu (Luka 1.28) kan chhiar chuan kan pawm em em lawi a. Tehkhin thu hmanga Isua ngeiin a sawi, ‘“Van ram thuruk chu nangni hriat zawng phal a ni a, anni hriat erawh chu phal a ni lo” (Matthaia 13.11) thu te hi kan ringhlel leh lawi si a nih hi ti ru?

Tunlai zir thiamna leh mahni tawnhriat (Experience) atang ngawta Pathian thu hrilhfiah hi a him lo a. Pathian thu hrilhfiahna tha ber chu Pathian thu vek a ni a, sawi nawn teh ang. Bible hrilhfiahna tha ber chu Bible hi a ni a. Sawi tlawr thiam leh tehkhin thu hmanga sawi vul chuk hi pawm nuamin, hriatthiam awl thin mahsela belhchian a dawl ziktluak lo fo thin. Khawvel thil te hi chu a hnuhnung apiang a tha thin a, belhchian a dawl thin a. Mahse Pathian thu leh thlarau thianghlim chungchang hi a danglam ve ngai lo a ni.

Thlarau thianghlim puihna hmang lo chuan a pianthar theih loh a, sual a inhriat ngawt theih loh a. Mahni thuin kan sual hi kan sim ngawt thei lo. Isua thinsena min silfaisak turin Thlarau thianghlim a ngai a ni. Thlarau thianghlim hnathawh dan leh a hmanrua erawh chu sawivek theih a ni lo a, a dawngtu leh a rahah a chiang ber zel a ni.

Pathianin chhandam tur a ruatlawk (Doctrine of Election) chungchangah hian mi tam tak an lo inhnial tawh a. Zirtirna tam tak a pian phah tawh a. A tlangkawmna zawk chu Ruatlawk thu chungchang a zavaia pawm lo chu Kristian a nih theih loh an ti hial thin a ni. Ruatlawk thu pawm leh pawm loh erawh chuan Chhandam kawngah awmzia a awm lo a. Pawm leh pawm loh avanga chhandam nihna a awm hek lo. G.Whitefield leh John Wesley ruatlawk thu pawm leh pawm loh avangin an rawngbawlna an inthen phawk a. Wesley-a chu vanram a kai ve ang em tih an zawt a, Whitefield chuan ‘Ani chu lal thutthleng hnaihah a thu ang a, kei chuan ka hmu phak tawh lek ang; tiin a chhang a. A fiahin ka hria

Inhnialna tura tarlang ka ni lo a, kan piantharna leh kan kristian nunah hian Pathian hi kan ngainep ta mah mah fo thin. Engkimtithei, thu em em a nihzia hi kan theihnghilh ta fo a, kan chhut nawn fo hi tul ka ti thin. Pathian chu a thu khawp a, a remruatna leh a ruahmanna zawng zawng hi Amen pe chunga lo pawm hmiah hmiah mai tur a ni.