276/2018 Thu tiam la, hlen tum rawh

TIAM RAWH (KEEP THE PROMISE)

( Bible : Tirh 13.23; Heb 6.17 )

“Chu mi thlahte zingah chuan Pathianin, thutiam ang zelin, Israelho hnenah Chhandamtu Isua a rawn thlen a: 

Rapthlak thei ang berin a insiam a chhiat khum ang che a, i thih loh vek pawhin at hlen phahna a siam ang che’ ti chung chung pawhin Hamlet-a khan thlarau chu a falin a zui a. A pa thlarau khan ‘min khawngaih suh, min ngaithla zawk rawh tiin a fapa hnenah a chah a. ‘Tualthih thu-ah Phuba la turin i tiam ngam em’ tiin a sawi a. Hamleta pa chuan ‘Luikam buarchhia leh tlaw ni la chuan ka hrilh lo ang che; tiin a tual thih dan kha a sawi a.

Kan chan a that a, kan dinhmun leh nihna lantir tur te, hma kan sawn zel theih nan thu kan tiam thin a. Thutiam hi mi tu emaw hnenah i tih ngei ngei tur i hrilha i sawina a ni a. Ziak leh tawngka hmanga tarlan thin a ni. Thutiam chu a chiang a ni tih lantir nan hming ziak te, awm khawih chungte, thingthi chungte, thisen hmang tea nemngheh a ni thin. Thutiam chu hlen ngai a ni e. Thutiam anga ding lo kan en sir he thin a, kan ngaisang ngai lo a ni. 

Pathian thutiam angin Isua Krista chu kan hnenah a lo kal a. Lalpa chu a thutiam kawngah a muang lo a, a thutiamah a rinawm em em zawk a ni. Pathian chuan a thutiam dawngtu turte hnenah a thu a thlak mai mai dawn lo tih chiang taka tihlan a duh a, chhechhamin a tinghet a (Heb 6.17) Pathian hi a thutiamah a hlawhchham tawh em? Thutiam sut hni hne turin rinawm loh lai a nei tawh em?

Mihring leh mihring inkarah te, inrintawnna te, hmasawnna tur te, kan that tlan zawkna turin thu kan tiam thin a. Thutiam a hlawhtlin chuan hmasawnna a awm thin. Thutiam hlen lo kan tawng tawh em? Kan ring leh ngai tawh lo a nih hi. Thutiam zung zung hi chu mihring zingah an rintlak loh duh fo thin a. Loh theih lohvah lo chuan thu an tiam ngai lo reng a ni.

Tunlai khawvelah kan rinna a tla hniam a, kan hmasawnna a muang a, keimahni leh keimahni pawh kan induh khawp ta lo a nih hi. That kan duh a, kan tha thei lo a, hrisel kan duh a, kan hrisel thei lo a nih hi. Hlim kan duh a, kan hlim zo tawh si lo. Sual laka inthiarfihlim kan duh a, kan thei si lo. Kan khawvel chhe mek hi siam that a ngai a, hma kan lak a hun ta. TKP thutiam sawi zuah zuah thin, tihlawhtling tura peih leh miah si lo kan ni a. Thenkhat chuan thutiam tihlawhtling turin kan theihna leh thiamna hian a phak lo fo thin.

Chuvangin kan thutiam a hlawhtlin theihna turin bul kan tan dawn a ni. Kan thutiam tihlawhtling turin a hmalakna tur fikfak tak tarlang ila. Chungte chu mihringte hma tiam lovin, Pathian hmaah kan tiam dawn a ni. Kan tihhlawhtlin theih leh theih loh chu kan thu a ni lo a, Pathian thu thu a ni a. Tawngtaina nen hma kan la ang a, hlawhtling turin ke kan pen ve phawt mai dawn a ni. 

Chungte chu ngun takin lo ngaithla, tihhlawhtlin tuma ke pen i tum loh ai chuan tiam lo law law mai rawh. New Year Resolution (Kumthara tihhlawhtlin tum) ang mai mai a ni dawn lo a. Pathian hna kan thawhpui ve theihna tura hma lak i duh a nih chuan Pathian hmaah Tawngtaina hmangin eng emaw ber hi thlen ang che. Hengte hi nangma tan chauh ni lo, i kristianpui te thatna tur te, ringlo miten Pathian an rin theihna turin ngaihtuah chiang hmasa ang che. 

Hamlet-a pain “Luikama Buarchhia leh tlaw ni la chuan ka hrilh lo ang che’ tih ang maiin Pathian be tura tawngtai thei ngat i nih avangin Challenge ka han siam dawn a ni e. Pathian thutiam anga Isua khawvel dam nan a lo kal ang khan khawvel tana malsawmna i nih theih nan Kumtharah thu tiam la, hlen tum rawh.

1. I bula awmte ngaihvena dah pawimawh hmasak ber (Lungngaia an kun lai te, lawmte lawmpui hun te, an dinhmun hriatthiampui turin)

2. Pathian thilsiam hmasak zawk ramsa leh nungcha te zalenna tura ke pen. (Pathian fate kan ni a, an zalen thlahlel takin Pathian fate lo lan hun an nghakhlel asin)

3. Ram leh hnam hmangaihtu (Patriots & Nationalist) ni tura theih ang tawka hmalak zel.

4. Theih ang tawka sual (Social Evils & Problems) do tura ke pen