275/2018 Paihthlakin kan awm dah ang e

PAIH THLAKIN KA AWM DAH ANG E

( Bible : I Kor 9.26-27; Phillippi 3.14 )

chutilochuan mi dangte hnena ka tlangaupui hnu pawhin eng emaw tiin keimah ngei hi paih thlakin ka awm dah ang e.

TKP hian tum kan nei thin a. He lai vela tal pawl mai mai a, hun hman ral ngawt kha kan tum a ni lo. Khawvel intihsiakna anga hmingthatna leh inchawilarna te, in promote ngawt kha a tum lah a ni hek lo. Thalai te Programe hmanga inpumkhat a, rawngbawlna sawtzawk kan neih theih nana hun hman hi pawimawh kan ti a ni. Isua krista ringtute nun dan ni awm renga kan awm theih nan kan buatsaih a ni. Chuvangin hun hi ka ren dawn lo.A lo thlawna a ral hi a hlauhawm a ni.

Eng nge kan dam chhan hi le? Hrisel taka nun hian hlim takin kan awm theih phah tih ngawt hi em ni? Chutiang chuan awm ila hrisel lohna avang emaw, harsatna hrang hrang avangin kan la thi dawn tho tho si a. Tu nge chatuana dam tura inngai awm che u? tu mahin chatuana dam a, thi lo tura inngai kan awm lo ang. Kan thi vek dawn tih chu kan hre reng mai. Mahse engtika thi tur nge kan nih a, engtik hi nge thih hun chu le? Thih hun hi a awm thei em ni? A la hun lo hle mai tiin kan inthlah ni tin a ni lawm ni?

Nun kan hman chhung hian eng ber hi nge kan hlenchhuah tur chu ni ta ang le? Thenkhat chuan mi lar tak, mi hming tha tak nih a, mite hriat ve nih hi kan chak /hin a. Mi thenkhat chuan eng mah ngaihtuah lem lo a, nung ve naw naw, lo thleng ang ang tuipui mai thei kan awm zel a. Mi thenkhat hausak duhin an van ruai ruai a.

Sum ngah hi kan damchhan em ni?

Lalpa tana a ram din hi 

Ka duh ka lungawina damchhan a ni si” tiin kan sa bawk thin.

Mahni tum ram hriat a, kan thlen duhna leh kan thlen hun tur hriat hi thil pawimawh tak a ni a. Paula’n tiam chin lam chu ka pan ngat ngata tih thu a sawiah hian Vanram kai ngawt hi a tum a nih loh thu a sawi a. Isua Krista’n khawvela hna thawk tha lawmman hmu tura a koh angin a kal hram hram zel a. Chumi tihhlawhtling tur chuan amah leh amah pawh a intipachang lui zel a. Lawmman hmu turin a taksa chu a inthunun theih thu min hrilh a ni.

Lallukhum chhe thei lo (Felna lallukhum, Chawimawina, nunna etc) hmu tura bei kan nih ang hian tum kan nei tur a ni. Mi tam leh zual, Isua Krista ke bula hruai thei turin kan beizel tur a ni. Isua ke bula hruai tur chuan kan hruai tum te dinhmun hrechiang tak chungin kan bei zel tur a ni. An mizia ang leh an duh te hre reng chu Chanchin tha hi kan atchilh a hun ta hle mai. 

Chanchin tha avangin eng nge i tih ve tawh le? Chanchin tha avangin eng nge i tih loh ngam ve tawh le? Lal Isua ke bula mi dangte hruai turin vawi khat tel ve mai kha a tawk thei a. Lal Isua ke bula mi dang te hruai turin vawi khat tel loh ngam mai kha a tawk thei asin. I zei loh ang anga titak tak chunga i tih ve mai te khan mite a hneh thei a, i thiam em avang te, i tihtak zetna (Seriousness) vang pawhin mi ten Isua an hmu thei bawk. Dan nei mite zingah chuan dan nei anga awm mai kha a tha e. Juda te zingah Juda mi angin, Sportsman zingah chuan Sportsman anga awm ve a, rilru zau tak neih kha a tawk mai e. 

TKP, Zaipawla inhmang tak kan nih a, inthlahdah leh thahnemngaihna rilru nei lo leka kan awm a nih chuan Pathian hming kan tichhia ang a. Rui leh harhfim lo, zawm thaw taka kan awm fo chuan TKP member ni awm lo reng kan ni ang. Mittui tla chungin rawngbawl mah ila, hlima lawma lamin awm thin mah ila “MI thinlungah chuan Paithlakin kan awm dah ang e”. Thahnemngai taka rawngbawlin awm mah ila, kan tawngkam leh thil tih avang hian paithlakin kan awm dah ang e.

Hmanah chuan Group/House colour thlan ngawt pawh hi harsa tak a ni a. Kan zo lo tur anga ngaihna lian tak a awm a, Unit Colour emaw kaihhruaina anga inthuam te kan harsat tlat a. Tunah chuan hma kan sawn ngei e. Sports ni chauha kal tha leh thahnemngai kan nih a, Kohhran Programme leh zaikhawm, kohhran hnatlanga tel ngai miah lo kan nih chuan Mi thinlungah paihtlakin kan awm thei a ni. Zaipawla inhmang viau, Sunday School pawimawhna hre ik lo kan nih a, Thlanlaih leh mitthi lumen, khawhar in kala rual kan pawl loh chuan mi thinlungah paihthlakin kan awm dah ang e. 

Outcast te dinhmun te, Outlaw dinhmun te kan hria a, Eden huan atanga hnawhchhuah te dinhmun kan hria a. A taka hremna chang kher lo mah ila, Mi thinlungah kan nunin thu a sawi si loh chuan engtin nge nungin rawng kan bawl ang a. Kan tlangaupui hrep hi engmah lo maiah kan chhuah palh ang e.

Chuti ni lo a, intihhlimna rilru chauh pu chunga infiam tur ni ila chuan Pathian thu kan lo sawi ve thin te, Krista leh Kohhran tana kan thawhna te hi eng mah lo mai a ni ang. Inkhel thiam tak tak leh infiam thei tak tak tam tak an awm a. Kan chevel lai hi min nuihzat ngawt ang le. A nih loh pawhin, kan inkhelh leh infiam dan velah hian kan intithintim ang a, kan lungawi lo ang a. Piangthar tih tur zia ang kha kan nei lo palh ang a. Paula’n vawi tam tak Isua Krista Chanchin tha lo tlangaupui tawh mah ila. Sualah tluin paihtlakin ka awm palh ang tiin a sawi hi a thleng ve palh ang.