277/2018 Ngaihnawm ka ti bang thei lo

ISUA CHANCHIN MIN HRILH RAWH

( Bible : Sam 139.14; Joh 3.16 )

I hnênah lawm thu ka hrilh ang che; hlauhawm tak leh mak taka siam ka ni si a: I thiltihte hi mak tak a ni a; Chu chu ka  nunna hian a hre chiang hle a ni

2019 leh Nuai sang sawm hi puntir ila, mihring chuan chhut chhuak turin kan harsat hle a. Computerah han chhu lut ila, awlsam takin a chhut chhuak nghal zung zung ang. Chutiang Computer chu mihring siam a ni. Mihring chu Pathian siam a ni.

Khawvel hmuhchhuah thar te zingah Thlawhtheihna te, Mobile phone te, Lunga Battery vuah te, Kal thlak te, Test tube baby adt., te hi mihring siam ropui tak tak a ni a. Hmelchhe lutuk tan pawh an hmaiah Plastic surgery an ti a, an lo hmeltha thei tawh a nia. Thil hmuhchhuah leh siam thar chanchin hi ni tam tak sawi tur a awm ang. Kumkhaw sawi tur daih erawh pakhat mah a awm lo thung. Mahni thla kan han la a, kan han post zung zunga, nalh hi kan inti em em a. Kan phak ang tawkin ngaihtuah chet chet ila, a mak a ni tih bak hmuhchhuah kan nei lo ang.

Anih leh mitdel hi mit vartir theitu kan ni em? Mit pakhat pawh kan siam chhuak tawh em? A chhelai engtin tin emawa zai that theih chu a ni ngei e. Clone/Test Tube baby te kan ti ngei tawh alawm. Pathian anpui mihring hi kan la siam thei lo ngei a. Mahse hma chu kan sawn tawh hle a ni. Thilsiama zawnga chungnung ber chu kan va ni tehreng em!

Mihring hi kan ropui a, kan mak a ni. Pathian anpui, a aia hnuai deuh chauha awm kan ni a. Beiseina tawp thei nei lovin beisei kan nei reng a, khawl leh hmanraw tha ber ber nen hun kan hmang a. Natna laka kan dam theih nan damdawi kan hmang a, nuam tinreng duhin kan siam zel a nih hi.

Thil siamah rinna kan dah zel a, kan lungawi thei chuang lo a. Kan thinlungah hian hmunruak kan zawng zel a. Kan aia thu awmin kan hria a, biak tur, min thununtu tur Bawngpa te siam chawpin milem an bia a, siamchawp peih lovin thingbul lungbul an bia a. A vengva deuh pawlin Aeropagi-hriat loh pathian tan an ti a. Milem an han be ta cheng a, milem thuhnuaiah an kun peih chuang lo a, anmahni thu bawkin an awm a. Milem be peih lo pawhin pathian be peih chuang lovin anmahni thu thovin an awm a. An lungawi si lo.  Mi thuhnuaia kun peih miah si lo hian an thuhnuaia kun theihna tur eng emaw chu kan zawng lawi si a ni.

Lonewolf Evangelist pakhat, Pu Laichhunga khan ‘Ka tap ka tapa’ ti khan vawi tam tak a sermonah a sawi thin a. Patling meuh tah tah hi ka ngaihdan a ni ngai lo. Mahse maw, Pathian fapa meuh a thilsiam tana lo kal hi a mak ka ti. Lal ber chuan min ko lo a, Tlawm tak maia ranthleng atanga min lo zawng zawk hi a mak a ni. A lo kal mai a ni lo, a nunna kan tan a hlan nia. 

‘Thiam tawktea ka ngaihtuah hian.... 

Eng an ranthleng, Kraws a thlan le.... 

Sawi nawn leh rawh min hrilh rawh, 

Isua ka tana a tuarna chu

Kalvaria ka tan damna,

Aw ngaihnawm ka ti bang thei lo e.

Political Party, tualthah thu, Maksak tak pawh hi rei kan sawi peih lo, kan hne zung zung zel. Lal Isua chanchin hi chu a mak a ni, chatuan thlenga sawi tur a ni. Sawi zawh tawh a awm lo, Sawi nawn a awm thei hek lo. Sawi thiam leh thiam loh pawh a ni lo, miin a thinlunga  khat liam a sawi hian a ngaihnawm mai a. (sawi ve ngawt erawh tlem chuan kan ning deuh mai thei.) Kan Upa min te hian kum engzat nge an lo sawi tawh ang ka ti thin. An la ning chuang reng reng lo, sawi loh hlauvin an preaching list te hi an thlek an thlek thin. An theih dawn loh pawhin an duhsak zawngte an pe hram hram thin a ni. Keini chu Pathian mak tak kan nei a, fak leh chawimawi hi kan tih tur a ni tih kan chiang si a nih hi.

A ngaithlatute pawh hian kan ning em? Miin Thlarauva a sawi chu kan ngaithla reng peih a, Hmun hla tak thleng thlengin kan pan ruak ruak thin a ni lawm ni? Thilmak chhuisen loh kan Pathian thil tum te hi hriatfiah vek chi a ni lo. I a tulh tulh a ni mai. 

Isua chanchin chu mi sawi vak ai hian mahni thinlunga a thawhdan hian zuk chiang ber a. Chuvangin Pathian chuan Kan thinlung a en a, kan thinlunga kan inpekna chiah hi a duh a, mi dangah emaw, kan hausak leh retheihah a innghat lo. A hmanrua lah a ni hek lo. Fak leh chawimawia hun hmanga chibai buk nasa apiang hian Isua chanchin hi an hre chiang a, hriat zel chakin an ngaihven thin.