272/2018 RUATLAWK THEOLOGY-I

ISUA  PIAN TUR HI RUATLAWK A NI - I

( Bible : Luka 1.30-31; Isaia 9.6)

Pathian i rinna kawngah hian Ruatlawk thurin hi i ring em tiin zawt che ila. “Ring lo” tiin min chhang ang a. Min chhang nghal lo a nih chuan “Ring deuh tho” ti chungin i ne ne ka ring deuh ngawt a. Chik zawka ngaihtuah chuan Chhandamtu tur Lal Isua pian tur thu hi vawi tam tak Zawlnei ten an sawi lawk tawh si a. ‘Leilung pian hmaa talh tawh Beramnno’ tih te pawh a awm kha. Khawvel suala a tluk chhiat tur thute hi Pathian hian a hmu lawk vek a. A hmangaih em em a fapa mal neih chhun min chhandamna turin krawsah khaikan a nih tur thu pawh a hre sa vek a ni. 

Chuti leh tho tur si chu huan laia thei kha phun loh mai awm alawm. Engvangin nge thei rah kha ei loh tura a hung mai loh tihte hi mi finga inngai awm tha peih lote thu dawn a ni. Pathian engkimtitheia ruahmanna leh remruatna hi engvangin nge hriatfiah vek i tum kher le? I ngaihdan a rawn che em ni? Pathian remruatnate hi a fel vel vek a, mihringte ngaihtuah phak tawk leka rorel chi a ni lo. Chhuifiah phak rual loh Pathian a ni tlat a lawm le.

Min chhandam turin Isua Krista lo pian tur thu hi hman atanga ruahman lawk vek a ni tih i pawm a nih chuan chhandam tur, Vanrama kai tur hi an awm sa vek tih i pawm leh si lo em?  Medil tla tur hi an awm (ruat) sa vek a, Pathian hian engkim a ruatlawk vek tih i pawm leh si lo em le? Paragraph dang i chhiar hmain han ngaihtuah chiang teh.

Pathian chatuan thil ruahman hi a ril lutuk a, keini lo inhriat dan ai hian Pathianin min hriatna chu kan tan a mak lutuk a; A sâng êm a, kan phak lo a ni. (Sam 139.6). Isua Krista hi khawvel chhandam turin a lo piang a, kan tana lo piang ni na na na, hremhmunah kan kal thei an awm dawn em ni le? A fapa mal neihchhun min pe a, mahse thilpek la duh lova, ring duh lo an awm chuan chumi tan chuan pek a ni lo, hremhmun tla turin ruatlawk an ni tihna a nih chu. ‘Tu pawh a ring a pianga an boral lohva, Chatuana nunna an neih zawk nan’ (Joh 3.16) a ti mai a ni.

Isua lo pian tur thu chu ruatlawk a ni a, a dang hi chu ruatlawk a ni lo tiin i ngaihtuah thin em?  Chhandam tur leh Meidila kal tur a ruat sa a nih chuan ava fair awm lo ve tih ngaihtuahna a awm thei  a. ‘Meidil tla tur sa ka nih chuan keimah vang a ni lo vang a, Pathian vang a ni ngei ang’ tih hnialna pawh a awm thei e. Mihring hi suala kan tluk hnua kan rilru puthmang chhiatzia tarlangtu a ni mai awm e. Isua chu Grape huana hlawhfa hlawh petu a ni a, a thu em alawm. “Ka ta na na na chu ka duh duha ka tih a thiang lo vem ni? A nih loh leh kei ka that avangin nangin i itsik em ni? tiin (Matthaia 20.1-16)ah khan a chhang fel et mai asin. (Part-II lamah kan chhunzawm dawn nia)

Krismas hi mi zawng zawng tan a ni a, Mi zawng zawngin an lawm (Celebrate) thei a, lawm tak (merrily) pawhin an hmang thei ngei alawm. Mahse Kristian te tan krismas hi a ni deuh ber thin. Thinlung lamah Isua pian chhan (Chhandamtu a nihna) kha a thlengkim tlat a. Kan khawtlangah Krismas hmang lo an awm ngai lo a, mahse chhandamtu a lo pian avanga chhandam kan nihna hlimpui hi chu kan tam lem lo ang. Chhandamtu lo piang hi chhandam lohte hian an lawmpui suau suau thin ngawt zawk asin. Kawng dung leh khawlai, fianrialah an lawm sup sup thin a. Chhandamtu lo piang hi chhandama te zawk hi kan lawm loh hmel hne hne ngawt thin mai. A lawm (celebrate) dan chu eng pawh nise lawm (merry) taka hman mai tur a ni. Khati mai khan lawm (merry) mai rawh, chu chuan a programe siam (lawm) danah chuan kori a tu hle ang. Engkim kha a nuam tawh mai dawn a ni.

Kan bawhchhiatna te, kan sualna te hliah khuh tura Lal Isua a lo piang hi lawm em em tur a ni ringawt. Thil dang ngaihtuah vak a ngai lo. Hlim taka kan lawm theihna turin thil danga inbuatsaih vak pawh a ngai lo e. Thil dangah lawmna i zawn chuan i ro tulh tulh ang a, nuamah a ral ringawt mai ang.  I lawmna kha mi dang kutah a innghat tihna a ni dawn a. Isua piang hi i lawm ve tak tak lo tihna a ni dawn a ni. Pathian fak leh chawimawi, lam chunga kan lawmna entir mai hi kan tih tur dik a lo ni zawk. Chutiang aia lawm dan tha a awm chuang lo e. Kohhran hoten mipui nawlpui tan pawha awlsam tura an duan lawk hi  ka khawp kham lo ti ni-awm fahrana interek hrang lovin; Pathian biak in leh zaikhawmna hmunah hian duh tawk hmuh tumin thahnem ngai la, thil dang leh a behbawm velah thahnem lo ngai fal duh suh. Kawng dik ber a ni e.