15/2012 University Hostel Life

P.G BOYS HOSTEL, MIZORAM UNIVERSITY,  AIZAWL

(Chawngtepa nen Chawngtelui-ah tuia inchiah dai pahin nunhlui kan sawi a, Kan Hostel nun kha dawt nge thutak, a hreachiangtute tan leh a thlen lai kha chuan a nuihzatthlak em a ni, mahse ka ziak chhhuak zo lo vang tih erawh ka ring.)

Hun kha leh chen kha a liam tawh a, kan nunhlui leh lenrualte nena kan lehkha zirlai, kan hun hman te kha a thar zel a, lunglen sawi chang chuan khang hun kha kan sawi chhuak lo thei si lo a. Hnathawhna leh eizawnna avang te, mahni khua-ah leh Mizoram hmun tinah hian kan inzarpharh a, kan tam tham avangin khaw hming emaw chhinchhiah awlsam danin kan inhre ber zawk a, hming hmerh hian kan in ko ngai meuh lo.

Keipawh eizawnna avangin Chawngte khua-ah ka kal zawk a, chutah chuan hmana Chawngtepa ngei mai kha ka hmu leh ta anih chu. Nui miah lova fiamthu thawh reng, a ṭawngkam chhuak hi fiamthu nge thutak tih chan reng ngai a ni a. Fiamthu a nih leh nih loh chu a hnu-ah a hriat chauh ṭhin a, kan nuih vur vur chuan min lo bawl hman leh nge nge ṭhin a ni.

Ava lunglen thlak em!! Engkimah min buaipui a, a ṭul ang zawng zawng min tihfel sak hnu-in khawlum pumpelh nan luiah lendeng turin min hruai a, eitur kamramte kan pai bawk a. Ngaiteh, tuiah kan inchiah hmasa a, kan lenden tur chu vawi khat pawh a bawm aṭangin kan la chhuak lo. Lak chhuah pawh kan tum lo, nunhlui sawiin kan nui tlawrh tlawrh a, darkar chanve zet kan han nuih chu maw le…

Post Graduate Boys Hostel, Chaltlangah chuan zirna hmun khatah, thingtlang khaw hrang hranga chengte kha kan awm a, a ṭhen chu Hostel-a lo awm hrep tawhte an ni hlawm a, keini erawh Hostela la awm ngai miah lo te kha a tam zawk kan ni. Kan tan chuan a lunglen thlak zual bik hle. Discipline a awm hran lo a, puitling vek tawh kan nih avangin mite tana hnawksaka khawsa pawh kan awm lo. Eng emaw changa han rik hlut erawh mipa kan nih avangin a awm lo thei lo. A sual fal deuh te pawh an sual dan kha a ril a, mite hriat theih turin an awm ngai lo a. Fiamthu leh thutak thliar hran theih loh khawpa inpawh leh inngam tawnin hun kan hmang ṭhin.

Khang kan hun hman hrang hrang te kha, lung tilengtu leh fate tana thawnthu sawi tur kan neih chhun a ni. Sawi chhuah chang hian kan nui lo thei ṭhin lo. Amah hmuh hian a nuih loh theih loh a, ka sawi nuihzatthlak ang em tih erawh ka hre lo.

Kan inhriatna tak chu Lunglei College-ah daih tawh a ni a, a chet dan leh mizia tak tak erawh chu Mizoram University Hostelah daih a ni. He Chawngtepa bula awm hi chuan inven reng a ngai ṭhin a. Inven loh karah kan kumkhaw sawi tur thil hi a lo thleng hman reng ṭhin. Chuti anih loh chuan phuba lak nana thungrulh dan ngaihtuah vat vat hi a ngai ṭhin. Hostelah chuan keini aiin an lo lut hmasa tawh a, senior an ni a, zahna chen awm mah sela, kan inpawh dan a ngai reng a, tun thlenga la inkawm ngaih kan ni. Khatih lai pawh khan Dubi Mual kawngchhuka ke ulh der tlat mai. Damṭha pangngai tan pawh a pawtu emaw a puak a emaw nih a peih awm loh zia chu he kawngchhuk zia hmu tawh tan chuan a hriatthiam theih ang. Kal ṭha thei lo, tlawmngai der si chu, A ṭhianpa (Paithar, Lawngtlai khua) sa ṭha bik lem lo tak kha a inpuak thlaktir pek a. Hostela thlan tla leh chau tak maia a paw thla chu a na hlein an hria a, mi sawi a hlawh khawp asin. Hostelah a paw thleng a, a room-a a muttir fel hnu chuan kebai der eih lo hian, a tho a, pheikhawk bunin inkhel turin a tlanchhuak nghal a, a ṭhianpa thinrim chuan alo umchhuak nghal nia.

Hostel-ah chuan Sakawrdaipa, Hmar hnam dik tak leh an zirlai pawl hruaitu pakhat, ṭawng duh tak mai hi a lo lut a, Chaltlang YMA te chuan YMA Member ni duh tur zawngin kan Hostelah chuan an lo kal a, kan lo inngaihtuah ṭha ang a, a hu hovin kan ti fel dawn nia tia an inthlah hnuah chuan. Chu sakawrdaipa hnenah chuan 'Hei YMA member tur Hostelah an lo zawng a, I measurment lak a ngai tlat mai' tiin, a san zawng, rih zawng, ban len zawng te a teh sak kha chu ala awm ang ve tho a. Ka reh zau zawng leh hnar len zawng thlengin a tehsak a, a tehsak thei pawh kha a har dawn nak laiin, a la nui miah lo kha a makna a ni. Chu sakawrdai pa chuan a roommate hnenah 'i measurement a la ve tawh em' tiin a zawt a, YMA Member ni turin chuti ang em em an tih ngai loh thu alo hrilh zet zawng. “Khawnge Chawngtepa kha, ka han rep teh ang” tiin thinrim em emin a zawng a, a hmu zo lo hlauh. A hnua a sawi leh dan chuan "HPC Area a awm anih avangin 'uluk I ngai alawm' alo ti" a ni awm e.

Tehsak sawi takah chuan Hnahthial aṭanga hla vak lo khua, tunah chuan eizawnna zahawm tak neiin, nimin piah lawk khan nupui a nei a. A senior roommate mawlh kha a bawl nasa ṭhin a ni. Chu pa nena in roommate an nih avangin “Roommate, ka reh zau zawng leh beng hlai zawng inang hi chu mi special tak an ni a, khawvelah hian an vang khawp mai, anmahni ang an awm tawh ngai lo" tiin a hrilh a, eng emaw a tuihnih zauh pah chuan, thildang a tih san leh daih a. Chutah a roommate bengverh zawng tak a lo ni anih kha. A roommate chuan Tehsak turin a dil ta ngei a, inla hman lo taka awmin a innghahtir a, a tum ang ngei chuan a ka reh zau zawng leh a beng hlai zawng chu a teh mil ta chat chat mai le. A tuk maiah chuan an khaw nula pahnih an lo leng a, Chawngtepa nena an inkawm lai chuan a inbual zo lo chhuak insiam zo, inchei parh sarh (an khaw nula pahnih awm lai) chuan, “Roommate, an hre ve awm der si lo a’ tiin a hlim nui vur vur a, a thildang sawia an ti ti lai chuan a ṭawngkam ngai bawkin, “Roommate-a, an hre ve awm der si lo a” a ti leh ṭhin a. A inleng hmeichhiate ngaih pawh a ṭha ta lo. A hnuah chuan “Roommate an hre ve awm si lo a, an awm lai hian kan teh leh dawn a mi?" a rawn ti ta. Chawngtepa pawhin hmeichhe awm laia han hrilhfiah a, han tehsak zawng a hupphurh ve ngei mai. Nimahsela, a tur nasat em avangin hmeichhiate a hrilhfiah hnuah chuan a tehsak ta ngei a. Beisei ang ngeiin, a teh tling leh ta chat chat mai le. Hmeichhe pakhat chuan alo man rang kher mai. Khuh der chhuan lamin pawnah a tlan chhuak a, a nui ta ṭiah ṭiah a, a hnu fe-ah pawh chuan a rawn lut khur der der nia. Tun thleng hian a awmzia a la hre lo vang chu.

Hepa bawk hi alawm, chaw ei tura a chhuah hlanin A dawhkanah chuan “U Z, kan lo kal a, I awm si lo a, kan haw leh ta mai, tlai dar hnihah kan lo leng leh mai ang, insawi a ngai hrih lo, nakinah I hre mai ang” tih a ziah chawp chu a dawhkanah chuan a dahsak a, room a chhuah san nghal daih a. A hnuah chuan a hmu ta ngei a. “Chawngtepa, lo leng an awm em?” tiin a zawt a, Chawngtepa chuan ka hre lo, dawrah ka kal daih a, engmah ka hre lo a ti a. A nih leh dawr aṭang chuan “mi, lo kal chho I hmu em”? . “Aw hmu e, tunlai nula ho hi an chhe lo hlawm riau mai a”  a ti duh lek fang a. Chutah Class kal tura a insiam lai chuan, ‘Roommate I va  insiam har ve?’... ‘Ngawiteh, ka nuam sam lo riau mai, Class ka kal lo mai teh ang’ tih chhuan lam a siam a. Tlailama nula lo leng turte chu Nilengin a nghak ta anih kha. Hostel chawchhum bak mi dang an lo kal thei lo.

Vawikhat chu Class hrang hrang te Annual magazine-a thlalak tar tur lak (shoot) tur a ni a, Formal dress taka inchei theih nise tiin an puang lawk a. A zanah chuan pian nalh leh pian thiam a lo sermon khum leh a ni ang chu, a roommate chu Tawnzau var leh track pant ha-in a kaltir leh kha! Chu chu ala ngaih hna thiam theih deuh a, thlalak dawn vela a laipawng thleng rawka a pawhchhohtir zet kha zawng nuih lamah kal mah se kan lo tim deuh chu anih kha.

Tlabung Higher Secondary School zirtirtu a chhaih dan zet kha kan nuih pui nasa ṭhin. Zahawm takin hnathawh nei tawh mah sela amah pawhin ala sawi bang thei lo. Tlai thim dawn, room ṭhenkhatah chuan light chhit a ngai tawh ang tih turah hian Chawngtepa bulah chuan a han chho a. 'Ka light hi a eng thei tlat lo mai a, min lo ensak teh a' tiin. Ani lah chuan "Engtin nge a awm? A kal phe zeuh zeuh ṭhin anih chuan zanah I chhi tlaivar ṭhin em?" (Zankhua-in light a ON tih chu a hre sa reng a) Chuti anih chuan tuilum pip pepah hian minute nga vel chiah ila, ni zungzamah hian pho ila, khami Strats** (a phuahchawp a), paw var deuh chek  kha alo insiam ṭha leh ṭhin a. A ṭha ang reng riau, han ti ve chin the ni tlak hma hian a ti a. Tlai ni tlak hma a hem ṭhat hman tumin inchunga tui tlingah chuan a tlan chho ta vawn vawn anih kha. Tuiah minute nga vel chiah a, hman hmawh taka a nghak lai hmel kha tun thleng hian ka la nui lo thei lo a ti. A rukin alo han enthla leh ngei a nih kha. Chawngtepa hian tlem lai deuh khan a zuk zawng chhuak a, chutah an inhmuh hlim chuan a sikul naupang te bulah "Hepa hi a nih hi Tube Light Bulb min chiah tirtu kha, a hmel en ang hi a ni lo, Misual tak a nih hi" tiin a zungchalin a kawk nia! A naupangte bula mawi hnai taka introduction pek tum kha a thinrim ṭha leh a ni awm e.

Chaw ei tura a kal hian room pakhat zawn a thlen apiangin kel be ang hian vawi hnih a be ziah a. A tirah chuan a awmzia an hre lo, a hnuah Rahsivengpa hian alo hrilh fiah a nih kha. Tlai khat chu chaw ei tura a kal, chupa room an thlen dawna a vawihnihna a be lai tak chuan a rawn tlan chhuak a, "Chawngtepa heti ang em em a, inhmusit chu thih thleng rakin ka do let ang" tiin a rawn thinrim nghal hle a, Mahse engtin tin emaw a thawi dam leh hram a ni. A hmui hmul erawh a zuah tawh lo chiang khawp mai. Chawngte aṭanga Lunglei a zin pawhin he Baptist College-a thawk pakhat hian a lo hmuak char char ṭhin a ni awm e.

Rahsivengpa, tunah chuan Zirna-in lar takah a thawk tawh a. Mi zahawm tak a ni. Mobile phone-te a la awm lo a, landline pakhat kha hosteller ten kan inṭawm luih luih a ni ber mai. Mi pakhatin Phone call rei taka hman, inbiak chuan midang a ti buai a, chu vangin mi dangte ngaichang chunga hman a ngai ṭhin. Vawikhat chu Phone room chu chhunglam aṭangin a inkalh tlat a, phone hman ve duh chuan an nghak ṭhap a ni awm e. Chutah Rahsivengpa hi alo chhuak a, hlim tak leh thinlung lam eng phet phet ni awm khawpa mawi hian a awm a. Chawngtepa phone hman duh chu a thinrim ta tlat mai le. Phone room-a a lut chiah tih chuan a Re-dial nghal a, hmeichhia hian alo la ngei a, a phone receiver puana hup pah chuan “Sawi tur pawimawh leh hrilh theihnghilh che ka la nei a" tiin a be nghal a. Hmeichhia chuan "Eng nge ni ta, ava pawimawh awm ve" a tih rual rual chuan Chawngtepa chuan “Ih maw, hmanah ka tleirawl lai hian ka duh loh deuhin fa ka nei tawh a” tiin amah ni awm tak chuan a bia a, hmeichhia chuan hrilhhai ang reng tak chungin phone chu a dah nghal daih a.

A tuk Rahsivengpa Class kal haw chu, thinlung thim bawk, amah thim bawk, hmuh a hrehawm duh ngei mai a ti. Thla tawp a ni a, chhungten pawisa an lo thawn hun tur hisap lai vel anih avangin, Chawngtepa chu Pawisa pukah a dil nghal a. nei lo hle mahsela Rs 60/- (Cheng sawmruk) chauh pawh I neih chuan a tawk e tiin a hnehchhuh ti tih ta a. A dil chhan a hrerenga inthiam lohna a neih ve avangin a puk tir lo ngam si lo a. S.R.S/CADS te kha la lar hek lo, Hostel piahah chuan kalpui turin a sawm nghal a. Ava kalpui a, rilru hah damdawi pakhat, zu fun khat chu an lei ta a nih chu. Chutah Hostel chungah chuan an chho tlang nghal a. Chawngtepa hnenah chuan Zu fun lek kang pah chuan, zu hi ka la in chhin ngai reng reng lo a, ka indawn a ni tiin zei lo tak chung chuan a seh hawng a. A zei loh avang chuan ala thlauh keh zui nia. Ba inṭhin a nuam lo duhkhawp mai a ti.

Vawikhat pawh Chawngtepa hnenah chuan 'Phone hi ka biak laiin a ri churh churh zel mai' a ti a. Ani chuan "Aaa, biak rei hian a Coil a sa ṭhin a, I lei khan han liak dai la, a zia mai ang" a ti a. 'Ala reh chuang lo' tih zawhna chu "liak dai tur chuan rei deuh hlek kha  liah a ngai asin" tiin a chhang a. A liak rei khawp tlauh tlauh mai a ti.

Hepa bawk hi Zirna-ina thawk anih avangin MPSC buatsaih MCS Exam an neih laiin, a vengtu (invigilator) ah aṭang a, Thiam thei deuhte chuan 'Paper Please, Sir paper ka duh' tiin ban an phar ṭhin a. A vengtu ber khan Chawngtepa bulah chuan " paper I duh ve em??" A ti sek ṭhin a. Phuba lak dan tur alo ngaihtuah chhuak pek anih kha. Chawngteapa hian Paper a mamawh tak avangin  a hminga kovin “Lala?”paper ka duh a ti lung lung a, A vengtupa chuan a hre duh der si lo a, A hming pum ngei mai chuan LAL********* paper ka duh belh ka tih chu a han ti zet zawng, a rawn thleng rang kher mai. Pe ṭha ve ta mai lo chuan, a dawhkana theh thlak pahin “kha I tling dawn chuang lo, Chakma sumo ah haw nghal rawh” a ti ve ta ngat a. Nui lo an awm lo a ti.

Chawngtepa hi ṭawngkam thiam tak anih avangin chaw eia sawmtu hi a hmu thei bik riau a, Hostelah chuan sa hi rawp a nat avang chaw ei chhuah mawlh hi kan nghak hlel ṭhin a. Vawikhat chu serkawnpa (1) hi chaw ei ve turin a sawm a, Birthday lawmthu sawi ṭawngṭai lai chuan a thleng chhunga chaw-ah chuan hmarcha hi alo phumru hman tehreng a nih kha. Chaw an han ei ta chu, a rawn irh fiak ta ak ak mai a. Serkawnpa (1) chuan “Hmm, inhmusitah pawh chin tawk hi a awm ngai a” tiin chhak hreh tak chung chuan thlan sa phul, mawm tle hlarh khawpin a ei zo ta hram a. A inchhir ve khawp ang a ti.

Hostelah hian phone call register bu a awm a, an lo biak duhte an awm loh chuan phone lo dawngtu chuan "Engtik laia lo bia nge? khawi aṭangin nge? Engnge thuchah duh in nei em? Tunge phone lo dawng? " tih hi kan lo chhinchhiah sak ṭhin a. Thla thar tir a ni a. Chhungte pawisa thawn chungchanga phone kan dawn sap sap lai a ni a, Register-bu kan check ngun lai a ni. Register bu alo ti hnawk leh a. (Chawngtepa bawk kan ring leh a). Serkawnpa (1) hian register bua ziah chu a en a “Capital Travels, pawisa thawnna hmu, Ṭhuampui ah chuan I pawisa lam theih” tih messgage a hmuh avangin a tuk zingah class pawh kal lovin, Saihapa chu min zuk lampui teh, pawisa a lo thleng dawn a, I pawisa pawh alo thlen bik loh kha, inpeizawn (Treat) dan te pawh a awm alawm tiin a sawm a. An pawisa neih chhun Rs 30/- chuan ṭhuampui panin Taxi chuan an kal ta a. Ṭhuampui Counterah chuan chuti ang pawisa awzawng alo thleng si lo. An pawisa neihchhun an hman zawh tawh avangin City Bus fare tak ngial pawh an nei lo a. Ke-a an lo haw chau hmel leh an thlan tla huh dup hmuh chuan an thinrim tih hi inhrilh kher a ngai lo.

Serkawnpa (2) hian nula leisak ṭhi mawi deuh mai a nei a. A chhuang hle nghe nghe a, khatih lai hunah kha chuan Sipai ten an awrh ṭhin, mahni hming ziahna awm ṭhin, phek thlir thler lar vanglai kha a ni a. Sekawnpa (2) chuan “A mawi chu ka ti lo, min leisaktu thinlung hi a ni mawi ka tih ni”hi a ti deuh fo a. Chutah Serkawnpa  inbual lai chuan surai chhia tawh ala kawl ṭhat hmang chuan “Buia” tih hi alo chhut sak a, pherh deuh nuan a nih avang chuan naupang ziah zir tir ziak hi a ang ber a. Chu ṭhi a awrh an hmuh chuan an nuih deuh tet tet ṭhin a, nimahsela a chhan reng a hre si lo kha. Rahsivengpa chuan alo hrilh a ni. Engdang ngaihtuah lo chuan “Chawngtepa thiltih a ni maw tiin ngaihdan a siam a, a dik em avangin a pha duh ta bik lo a. A ṭhi mawi thu emaw, a leitu emaw, sawi nawn chu sawi loh, kha ṭhi reng reng kha a awrh ngai tawh lo a ti.

Kolasibpa nen (Tunah chuan High Schoolah a thawk a) an bazaar a, thla tawp lam anih avangin pawisa an ren dun hle mai. Secondhand-te en pah chuan an khawtlai a. kolasibpa chuan Superman-a lem chuanna T-Shirt hi a rawn lek chhuak a, Hmm tih pah chuan a dah leh mai a. Khatih lai khan Supermana T Shirt-te chu tuman ha chhuak ngai hek lo. A dah tawh chu ava la ṭha ve ngat a, hei chu a puan ava ṭha em!! Awm mai mai nanah hak a nuam ngawt ang, mahse a lian deuh anih hi, ka van awt em” a ti a. A dah ṭha ve leh mai a. Lei rawh a tih chuan a bawlah a ngai dawn si a, a thlek nawn leh vang vang a. Chutah Kolasibpa chuan a rawn thing chhuak leh a. Lawm tak chung chuan a lei ta a. A tlai a tlai chuan a sufai nghal a. A tuk zing chaw eitur chu Chawngtepa chu Dinning hall lamah alo kal hmasa a.  Kolasib pa lo lut, T Shirt thar rawn ha hmel chu an lo nuih sung hlawm a. Kolasibpa chuan a man reng kher mai. Chawngtepa chaw eia kun lai ringah tak mai chuan “Nang hian min bawl a maw? Pawisa neih loh nak laiin tiin a thing nawk nawk a. Chumi hnu chuan a roomah tlan chhovin a han inthlak nghal a, a ha nawn lo chiang khawp mai a ti.

Chawngtepa hian nula kawm, rim leh ti ti hi nuam a tih em avangin hmelhriat pawh a nei tam a. Lenna pawh a a hre tam ṭhin. Thingpui leh a hmeh tui tak thlakhlelh avang hian ṭhenawm hnai vaia len luh kan ching ṭhin reng a. Vawikhat chu Saiha pa, hmelṭha vak bik lo hian lengah a sawm leh a. A peih lo deuh chuan ka leng lo mai ang, lo va leng leh mai rawh. Mahse hei a lehkha thawn tur ka kawl a, chhiar tir nghal la, min lo ken haw sak leh dawn nia tiin a chah a. Saihapa chu a kal ve mai a. A lenna nula chu lehkha pek pahin I chhiar nghal ang a, min lo hawnsak dawn nia tiin a pe ve mai a. Chu nula chuan chutia Love letter ang hrima lehkhathawn uluk chu tiin, zunchhuak chhuanlamin Bathroom/Toiletah chuan aluh pui ta nghal a. Chu lehkha ah chuan “Hei ka zawhte no khawilai hi sava no enin lo en la, nangmah aiin I thingpui siam kha a thlahlel zawk bawk a, Chini aiah chi kha lo al la, tihpalh angin hre lo der tlat ang che. Thil min lo hawnsak tura ka tih pawh hi, chhuanlam siamin a remchan loh thu lo sawi mai rawh”tih chu a chhiar fuh hlauh mai a. A hmel leh zawhte no khawi in ang lutuk chu bathroomah chu nula chu a nui tlawrh tlawrh a, a chhuak tur insum thei lo chu a lut leh ṭhin a. A chhungte ngaihṭha lo chuan a damlo emaw tiin an ngaihven hle a ni. Thingpui pangngai pe ta mai lo chuan Chi a thlum sak tehreng a nih kha. Saihapa chuan inzawh har a ti ve khawp mai a ti. A sawi leh danin.

Punjab aṭanga vai lo kal, Vikram Malik Sighn-a hi a awm a, Forestry zirlai a ni. Vai ti thawr thawr anih avangin a hmel a ngei deuh nge, zing chaw ei kham hnuah chuan bathroomah a lut a. A lo kalh hnan tehreng anih kha. Nilengin bathroomah a awm a, alo au nasa deuh a ni ang, tlaia kawngka ava hawn chu a mitmu hi a eng vek a ti. Kha vai pawh kha ‘Bachao’ ti a u lo khan ngawih ve mai awm a ti duh lek fang a.

A sei dawn ta, sawi tur a ngah a, a sawi ṭeuh a, kei pawhin a sawi dan ang lo deuh te, chhiar ti nuam tura her rem deuh te ka nei a. Part II-ah chiang zawkin kan thual nawn leh dawn nia... Amah Chawngte pa Vawikhat chu chu a hritlang a, Rahsiveng pa hian lehkhathemah damdawi a ziak sak a. Chaltlang area pharmacy zawng zawngah Chawngte pa hian zawngin a hmu zo lo.... T...-a i damdawi hi ka hmu lo, a zuartute lah hian ngatan nge an ti zel' a ti a.... 'PREGTEST' (raipuar leh puar loh test na pad, zunkhum chi) hi an lo inziahsak chu lo niin.... A zawng kual ve hle niawm e