A PAWI HMA NGEIIN
(Beli leh Zaluaia chu an fate chanchin sawiin)
Beli : Zova pa, kan fapa awm dan hi ka mang a ti ang thin. A nunzia hi a danglam lutuk a, a ute ho ang hi chuan awm se hlim tak hian A rawng ka bawl thei tur a nia. Khuk ral daih te hi ka chak rum rum thin a nia!!
Za-a : A ute ho ang chuan awm se, I chapo phah khawp lo vang maw? Pathianin kan kutah a dah tawh a, theih tawp chhuah a, kan enkawl hun a ni dawn lawm ni? Lei rohlu berte enkawl tura tih ber I mangan tlat te chuan le.
Beli : Fate hi pahnih chauh lo nei ila, 'Bawiha' hi piang lo law law se rilru a hahdam tur a nia tiin ka ngaihtuah fo thin asin.
Za-a : Chi tam tak thlaha lo pung tur kan nih kha, a thuhrimah fa nei thei lo te hian fa an awt thin asin. "Fa neih tlem hi changkanna a ni" "Enkawl zawh tawk fa nei rawh" te hi an ti ngawt a a nei tlem apiangin an enkawl hneh lo ting mai zawng a nih hi a.
Beli : A bul kan tran dik tawh loh vang nge ka hre lo, a mize danglam lutuk hi ka hrethiam lo a ni. Lehkhazir mang hlei lo hian thil hi a hre chak em em a. A hriat sa a chhawr thiam bawk si lo a nih hi.
Za-a : Tunlai thalai mizia pawh hi kan zir a ngai a, unau an inang diak diak ngai hlei nem maw le
Beli : A ni hi chuan min chhang ang pawng pawng thin lah tak a. Zilh ngaihna pawh ka hre lo.
Za-a : A chhan che kha a zalenna a ni a, a dik nia a hriat ang kha a sawi mai alawm, ngawi renga chhang ngam lo, zawm si lo nun hi a chep em a sin.
Fela : Kan bang hma bawk a, thingpui inchhung leh tlem ka lo leng dawn, min hnar haw kher tawh suh ang che.
(Zamlovi leh Fela an lo inzui lut a)
Zamlovi : Kan hlazir hi chu kan sa chhuak mawl tawp thin hi a ni mai a, ka duh khawp lo thin ngawt mai. Lo thu lawk rawh kan inthlak lawk ang e aw.
Beli : Fela, lo thu rawh, in va bang hma ve a.
Fela : Nia, Conductor hian hlazir boruak hi a en thiam tawh a, a boruak a zirin kan zir rim thin a ni e. Tun lai kan zaipawl chu kan ro hulh ni ber hian ka hria!!
Za-a : Hlazir leh programme zawh hian mahni inlamah in haw nal nal hlawm thin a. Member thlah leh tlawhchhuah hun remchangte hi in dap ngai ta lo emaw chu ka lo ti a. Thenawm khawveng pawh tlawhchhuak peih lo, intihhlim tuma KM tam tak pan leh vang vang thin in ni vek tawh emaw ka ti asin.
(Zamlovi a lo chhuak a)
Beli : Mama pa, I mu tawh ang hmiang, ka chau riau mai a!!!
Za-a : A la hma alawm le, hei kan ti ti ve dawn hlek a, mut hi I chak huam huam zel mai a(h)
Beli : Lo inkawm rawh u, Kan va mu ang e….. Mami, Bawiha tlai tawkah a lenchhuah leh kha kawng I lo kalh hnan ang e aw.
(An inzui phei nghal a.)
Fela : Lo thu hnai ve deuh la, ka seh lo ang che.
Zamlovi : Min seh lo mah la, min ham leh vak si ang e (A nui sak a)
Fela : Eng nge inham chhin ang I tih ei
Zamlovi : Tunlai chu I buai lutuk a, text leh phone pawh I hman bawk si lo a, I phone hi lo kawl daih ila a tha ang a?
Fela : Nia, min lawmpui a, ngaih tha zawk awm tak I nia lawm. Mahni thua zalen taka hnathawh hi chu a nuam a ni. Hlawk le lua lo mahse ka hlim a, ka chau ngai miah lo asin.
Zamlovi : Chau lo, lo leng bawk si lo. Ka tel lo pawh hian I lo hlim tho a ni maw?
Fela : Chuti pawhin ka sawi loh kha, ka nun zawk hi alawm ka sawi.
Zamlovi : (A kut va khawih pahin) Thla thar hi ka nghakhlel a, ka hupphurh bawk si. Engtin nge ni ang le?
Fela : I dawn thui em mai a. Awm tawp rawh hunin ala hril mai ang chu.
Zamlovi : Ka hming chhe ting tang ang a, I reh leh daih ang tih ka hlau alawm. Induh hun hi I hre ropui si a.
Fela : Mi mah rilru hah ve nak laiin, kan hun tawn azirin kan sawiho mai dawn alawm. A pawi tak tak a ni. Mite hian min ngai fel hlawm ropui si a.
Zamlovi : Duhthlan tur chi thum kan nei ang. Inruk, doctor pan, palai tirh nghal ni mai
Fela : Nia, Thla tharah kan sawi leh dawn nia, ka va haw ang e aw. Pawn thlengin min lo thlah la?
Zamlovi : Ka hlau zo tawh che asin le. (An chhuak a, rei lo te hnu-ah Zamlovi a lo lut a)
Sonnet chhamin a zuia
Hmeichhe chiang kuan loh hun lai I hria em?
An chian lai tak a ni duh zawk asin
Anchhia atan a duan a ni thei em?
Malsawmnaah an chhiar zawk thin asin.
Finfiahna tha ber, thup theih miah loh chu
Thlasik anga lo thleng thin thichhuak hi
Krossa Tlanna thisen chhuak ni lo hi
Minu te dinhmun hrilhfiahtu ber chu
A hun lova Buai pui awm, zahpui awm
A huna thawvenna, fiahna hman theih
Rairah, falak, chhungpui fa, hring turin
Hmeichhe hmeichhiat nan chhinchhiahna a awm,
Than thi, thi hul, hmeichhe rilru fawmkem
Rual pawl leh rual chhin, puitlin hril turin
(Bike a lo tlan ri rum rum a, )
Zamlovi : Bawiha chu I tlan chak thei lutuk an ti che a. A pawi thin khawp mai
Zova : Pawi nang, an tlan chak ngam loh vang mai mai alawm (Thut thlengah a mu nghal a)
Zamlovi : An ngam lutuk a, a mawi pawh hi dawn ve la
Zova : Pawi lo, ho em mai
Zamlovi : Pawi lo ti ngawt mah la, a pawi hnuin engtin nge I tih ang?
Zova : Hre lau. Hahtlak thin.
Zamlovi : BE leh Zuchhia te hi ilo in ve ang e aw? An thih sup sup hi.
Zova : Teuh lo mai, Tui chhuan so overrr ngat lo chu ka in ngai lo hrim hrim.
Zamlovi : TV ila en dawn em ni? Ring lutuk lovin a volume kha pe la, ka nu hian a ngaihtuah thin em che a sin. A mut theih hi chuan tihharh loh hram tum ang u (TV/Chhota Beem a ri ring sauh a)
Zova : A pawi hnuin engtin nge I tih ang? A pawi hnuin engtin nge I tih ang? ( A phun mawlh mawlh a) Mu deih ang, mai mai
(Tangka Lawmi chuan Tv a lo en a)
Hmuchhuaka : In awm em?
Tangka Lawmi: Awm e, Lo lut rawh
Hmuchhuaka : Pi Tangka Lawm, vawiin chawlh a ni bawk a, kohhran thalai ten hnatlan kan tum a, a hna a hautak deuh si a, hnatlang ve turin Fela-te unau kan lo sawm ve deuh a.
Tangka Lawmi: Kohhran thalai pawh hi inthluakah hian sum a lut tawh a nih hi. Chawlh ve chhun te lah hi hnatlang inti fo mai a. Leh lutuk mai
Matei : In lo leng a ni maw? Dar 8 hma hi chuan ka tho thei hlawl lo a ni e
Gangte-a : I meng thei tho alawm (a nui suk a)
Matei : Zanlaia I rairah post kha ka sawi ve mai ang aw
Gangte-a : Fiamthu a nih kha, vawiin chu ilo hnatlang ve ang chu.
Partei : Nia, ka nu a rem mai lo em ni?
Tangka Lawmi: Inte hi ilo ti fel ang chu ka ti asin le. Unaua chhuah kher hi chu tul ka ti lo a. Mahse, I kal loh chuan I tum leh bur awm tho si a. Thingpui kha siam kep ve la, Ka va leng teh ang. hahtlakzz
Matei : Ka nu hi chu hna hi a duh lutuk a, a buaithlak thin a ni.
Gangte-a : Mate, I nu chu A thluakah khan sum a lut a ni zawkin ka hria. A pian hlim hian i pi-in a hring lawk thei lo ang a, pawisa hian an thlem chhuak a ni ang tih a rin theih alawm le. Tawngtaipuiah ka lo thawh ang e
Matei : Facebook kal tlangin mi I thawh ang, mite kha I lo mentioned leh ang e aw.....
Gangte-a : Khawvelah hian a tawka nun hi a har a ni. Hnathawh tam leh duham, Pathian ngaihsak lo nih kan hlawh a, Hnathawk lova Pathian ram tana ke pen nasat leh mi a, hman nih kan hlawh zel chu a nih hi.
Hmuchhuaka : Pathian hi hmasa ber se, engkim hi a lo fel vek a ni mai. Hawh teh u, I chhuak mai ang u, kalna tur kan ngah si a, kan tlai lutuk palh ang e.
Matei : Tawng pahin hna ka thawk thiam lo ang bawkin thingpui ka lo siam thiam lo a nih hi maw le, In phawt ula.
Gangte-a : (kal pah chuan) Fiamthu avang mai mai te chuan thingpui chu hlawh lo mah ila a pawi hlei nem!!!
Matei : Hnatlanna-ah tui deuhin ka lum dawn tho che u alawm, chaw ei tui mai ule.
Gangte-a : Chaw ei tui ule.
(Hnatlang turin Zova chuan Tangka Lawmi fanu a sawm a)
Zova : In awm em?
Tangka Lawmi: Lo lut rawh…. A insiam a nih kha, in va hah bik lutuk ang e aw, Hnadang thawk thei lo lekin in lo thawk chau ang e. Hnadang thawh tur tibuai khawpin hnatlan loh tur aw.
(Dawrah ka kal nghal a nia tiin a fate a au lung lung a)
Matei : I va inpeih hma ve a, Truck-a kal ai chuan Bike ken kha a nuam ve alawm le.
Zova : Petrol man ka chhungte I dil ve miau hek lo alawm le.
Matei : Ka bike a ni si lo alawm, eng nge petrol leina ka dil mai mai ang. Eng ilo fahran chu vawiin nilengin mi dil leh reng tho ang chu.
Zova : Hausak dan chu ka thiam tawh a, Retheih dan pawh ka thiam tawh asin
Matei : A engtin chuan maw le? I hahthlak thin em mai
Zova : Hausa-a awmdan chu tuna ka awm ang hi a ni a. Retheih dan chu maw, Pawisa nei lo pawha hahdam taka awm a, khawi ve? Ti-a dil hreh loh hi a ni mai alawm
Matei : Kutdawh rilru hi chu a kristian lo ngawt mai
Zova : Kutdawh a? Kan hruaitute pawh kutdawh an hlauh vang leh retheih an hlauh vangin alawm thalai hnatlanga chhuah kim ngai loh zawk. Thu tha deuh deuh sawi hi chu an thiam hle si a. Microphone hma-a aw then tur chu nise an pung leh truam truam awm si a.
Matei : Ni tho a, mahse an tel lo pawhin kan thawk zo leh vek mai ang. Zam reng reng suh
Zova : Zam lah lo e, an tihtur an tlin lo em alawm. Tun dinhmun angah te chuan hlawh ka neih a, Car ka neih ve hunah chuan hruaitu nih ka tlin ve lohna tur hi ka hre bik lo. Neihah hian an teh teh chek a ni ang chu
Matei : Chuti ang a ni bik lo, Pathian min pek an nih hi. An thu awiha, an aiawh te pawh hi a tul ve fo asin.
Zova : A ni thei lutuk ang, mahse saw-pa saw chu Pathian min pek a ni lo ang, a tawng tam vang hrim hrima hruaitu ni a ni ang.
Matei : Eng nge maw saw-pa pawh saw I huat em em le? Ka ex a nih vang maiin maw? Zam reng reng suh, I tha zawk fe alawm.
Zova : Insiam vat vat mai teh a.
Matei : Ka inpeih tawh reng alawm... Au Fel, kan kal aw...
(Hnatlang lovin Tangka Lawmite inah)
Fela : (SMS Hmanga Text tih hriatin, phone a lo khawih nep nep a) Min lo sawm rawh ka tih kher chhan chu hnatlan hma-in nizan a mi kha sawi dun lawk ka duh a, kan tlai chuang lo ang
Zamlovi : I mu thei meuh na nge a? Zan khat i mu lo dek dek a, i buaichhe nghal a ni maw?
Fela : Nia, ngaih tha lo tak chungin i lo tuar rei tawh awm hi ka tia, ka khawngaih lutuk che asin.
Zamlovi : Eng nge i ngaihdan hrim hrim a? I ngaihtuah dan chu
Fela : Ngaihtuah chhuah pawh ka nei lo, ka nu hrilh tawp ka duh a, a ni ngaihdan dan a ni mai. Min chawmtu a la ni si a Ka ni chhingi, hrilh turin zingah khan ka va kal a. Vawiinah te chuan a hrilh mai thei a ni.
Zamlovi : Nia, min duh loh pawhin ka tuar thei tho ang, kei chu ngaihtuah ka ngai lo a nia.
Fela : Duh loh thu kan sawi loh kha, I dawn thui em mai a.... (Va kuah a tum lai takin)
(Tangka Lawmi a lo lut a)
Tangka Lawmi: Nangni pahnih bawk maw, Engkim ka hre vek a nia, ka rilru a hah lutuk hi ka thi-in ka hria.
Fela : Eng chu maw i hriat a?
Tangka Lawmi: I ni chhingi, hrilh rawh i ti a ni lawm ni??
Fela : Nia, tihngaihna kan hre lo a lawm.
Tangka Lawmi: Lokal teh u. Hetah leh hetah hian thu teh u. Hnaltang in tlanbo ta sa sa, hnatlang lovin ka zilh hrep dawn che u...... In ingaizawng tih chu khawtlangin an hria a, Condom in hmang lo tih pawh khawtlang hian an la hre dawn khawp mai. Man chawi lovin hmeichhia I mutpui a ni thei a, I mutpui man erawh ila chawi dawn khawp. Ka lawm lo khawp mai. Rairah run kan nih belh leh dawn ta a nih hi.
Fela : Rairah loh pawhin a theih tho alawm le. Rairah pi nih kher i duh a mi a?
Tangka Lawmi: Engin nge i chawm ang a, Chawm hlawmin chawmhlawm a hring leh dawn chu a nia. Chu pawh chuan chawm hlawm bawk a hring lehin a nia ka rin ni...Huiha
Zamlovi : Ka pi, a pawi khawp mai. Keimah pawhin ka chawm hreh miah lo a nia, Chawm loh dan pawh kawng a awm tho ang chu. I duh chuan.
Tangka Lawmi: A Zaipawl memberte berin chuti chuan maw inngaihtuah a? I pi chu ka ni reng dawn hauh lo mai. Tangka Lawmi, te chu min han ti a, Intodelh a ka thawhrimna lamah min ko el e te an ti tak a. An la hre khawp ang.
Fela : Ka nu kan la sawi ho hman lo hrim hrim alawm, nizanah ka hrechiah a, nangmah hrilh dan tur che sawidun kan duh a, hnatlang kan kal tlai mai alawm le.
Tangka Lawmi: Tunah a uak, a uak tawh a, kan la sawidun lo tih mai mai. Family Planning chu in hlat hle mai maw? Ka hah, tikhan lo awm ang che u. Room-ah ka han kal lawk ang e, i niin min hrilh chiah a, inngaihtuahna hun pawh ka la nei lo.
(Room lamah a lut a)
Zamlovi : I nu bulah mah sawi tur avang a nih chuan, ka chhungte bulah phei chuan an mittui tla ka en ngam dawn emaw ni le??
Fela : A pawi tak tak a ni, thih tha-in lo tang ve hram hram la chu hetiang hian kan awm lo tur a ni.
Zamlovi : I ti tau ang a, kar khat chuang kha i thinrim leh reng dawn a, a hrehawm ve tho asin.
Fela : A tha lama titau leh karfunga hmang ka ni tihte kha i hre tak si lo a.
Zamlovi : Ka chan ang che tih ka hlau ve tho a, mahse kan virpilh a ni ang e. A nih ang anga hmachhawn tur hian huaisenna ka nei thei ta-in ka hria.
Fela : Ka nu kha chuan hrin loh tura pai chu a duh awm lo khawp kha a, a ngaihdan thlaktir nan rilru-in I tawngtai ve ve teh ang..
Zamlovi : Lalpa, harsatna ka tawh zawng zawng hi nang ka dah hmasak loh vang che a ni a, Tangka Lawmi ngaihdan ni lo, i aw ngaichang turin min tichak zawk teh. Engtiang pawhin ngaihdan nei se, i malsawmna-ah chhiarin Kristian chhungkaw din turin hmathar min laktirtu ni mawlh teh se.
Fela : Aw Lalpa khawngaih chunga khawngaih lehchhawnna hun tha min siamsak la, ka bawhchhiat nawn leh avangin min ngaidam la. I rorelna hmachhawna insiam tha turin huaisenna min pe ang che.
(Room atangin Tangka Lawmi a lo chhuak a)
Tangka Lawmi : Ka ngaihtuah a, A pawi hma ngeia engkim lo zirtira hrilh lawk vek tur ka nih teh lul nen, Kei, Tangka Lawmi hian ka rochante hi tangka in ka lo thleng trep alawm le. Ka lo ngaihtuah tawk lo che u a ni. Ka thiam loh vek a ni... (A ngawi deuh reng a)
Tangka Lawmi: Engtika nge innei tura Palai kan tirh ang tih bak ngaihtuah tur a awm lovin ka hria a. Mahse damchhunga in inneih theih dawn lova fahrah chawm ai chuan tinneih loh ngam a tha zawk.
Fela : Ka nu tut tut chu
Tangka Lawmi: Tut tut lo, induh leh Kohhrante chu va intrawntir phawt ula, damchhunga suihtungturut a nih phah thei tho alawm le. 'Biakin inkhawm hma-a an inbawhbet e' tih hnu thlaruk vela 'an inbawhbet leh lo e' tih ang vel a ni.
Fela : Ka nu chu
Tangka Lawmi: Pu Zaluaia-te nupa chu an chuai ve rawih ang chu.... Kei chu naktukah tu hring nghal mai thei ula a nia ka duh tak ni.
Fela : A hun lova a hrin chuan kan buai leh si ang e. A hun aia hma emaw a aia tlai emawa hrin chu a tha lo a. Mahse rawngbawlpuite chu an zahawm dawn a ni.
Zamlovi : Ka pi, (a inthiam lo, a lei a chhuah deuh a), Ka nu leh pa pawh kan la hrilh si lo a.
Tangka Lawmi: Hawh teh u, Pu Zaluaia te nupa chu i va hmu ang u. I intawngtaitir teh ang u, A pawi tak tak hma hian....
Character :
R.Ramdinsanga : Za-a as Chhungkaw pa
K.Laltleipuii : Beli as Chhungkaw nu
Lalremruati : Zamlovi as Fanu
PC Lalramdina : Zova as Fapa tlang val
T. Lalremruati : Tangka Lawmi as Thenawmnu
C. Laldiksawna : Felnunmawia as Tangka Lawmi fapa
Lalropari : Matei as Tangka Lawmi fanu
C.Chanchinmawia : Hmuchhuaka as Thalai hruaitu
H.Zothankima : Gangte-a as Thalai hruaitu
No comments:
Post a Comment