DROPDOWN MENU

11 May 2015

22/2015 Kristian thumal thar

KRISTIAN THUMAL THAR

Tunlai khawvel mi ten kristian leh kan sakhua an hmuh dan hrang hrang ka ngaihtuah a, thil ni thei awm ang te ka chhui ve thin a. Sawi tur tam chu nei lo mah ila, keini hi kan lo inenfiah theih nan heng thu pali hi kan tarlang ve ngawt teh ang. Thu leh hla lama tha tak, a that lohna sawi tur awm miah si lo; Kristian sakhua hi kristian nun leh nunpui dan hian sakhua tha tak a nihzia a lantir thei lo a ni. Albert Einstein-a Theory ang deuh a ni ta (Eng tluka chaka zin a, naupan lai hmuh leh theihna ang deuh) a thu lama dik thluam si, a taka dik emaw hmuh tur emaw awm miah lo ang hi a ni. 


Platform Kristian: Kan zoram khawvel hi bible thu leh nundan tur tha hrang hrangah hriat kawngah chuan kan sang ta hle mai. Bible chang khat thu vawng lo an awm ka ring lo. Kan society nena inzawm tlat Pathian faka zaiah pawh kan sang e. Awmkhawmna apiangah khuangri hriat tur a awm zel a, a thu leh thluk chu a ri zel zul zel mai a, thil tha tak a nih lai hian min hruai bo thei hmanrua a ni ve thei bawk. Pathian thu, Fakna hla leh Tawngtai thiam avanga thlamuang ta ngawt, bo intih hre miah si lo kan pung ta hle mai. Huraitu nihna dnhmun luah tupawh eng mi pawh chu dawhsana tawngtai thei turin kan beisei zel a. Kristian, hruaitu, hmalatu zawng zawng chu dawhsana thu turah kan ngai ngawt bawk. Dawhsan kan ngaihsanzia ka ngaihtuah hian Lansarh kan tum ta lua a ni. Thil tihtheihna leh lansarhna bak ava hring lo em! Nun chhungril lam kan tlakchhiat phah hlauhawm ani. Platform Kristian chauh ni lovin, a langsar lo laiah te, a hniam lai berah te, a biru laiah te, hmun rehah te pawh Kristian nih ngam hi a hun lehzual ta hle.

Gospel Commercial:  Mihring hi a hu hova awm tura siam kan ni a, mal taka inkhur bing kan thei lo vek a ni. Mizo society hian Kristianna hi a duh huam huam a, kan hmasawnna pawh a ni reng a ni. Kawng hrang hrangin rawngbawlna kawng kan zawh a, kan phak loh thleng thlengin sum kan tuak a, rawngbawlna-ah hian kan buai tak meuh a ni. Isua theih nghilh thak khawpin rawngbawlnaah hian kan buai zo ta. Pawl leh kohhran hming changchawiin, dawt var kan sawi a, sumtuak nan thil tha lo zawk pawh kan zuar a, kan fakmawi thin. Chhungkaw hrang hrang theihna hre lo lekin kan bel lui a, thawhlawm kan tuk a, kan khawn ta thin a nih hi. Miin a phalna lam ngaihtuah lova an hlawh leh lakluh ngaihtuaha kan barlui ngawt thin hi sim a hun ta. Chanchin tha hi a kual zawngin kan zuar ta mai em ni? 

Gospel blackmail : Kan ngaihhhlut zawng a inthlak zel a, Sipai ngaihsan hun a liam a, Driver ngaihsan hun nen, Officer pak huam huam hun a kiam a, Photographer kan um ruih ruih mek lai hian Kohhrana thawktu (entir nan Pastor, Missionary leh Evangelist etc.,) kan ngaihlu a, kan bawh leh hle mai. Thil tha tak pawh a ni. Ram rorelna leh Khawtlang inawpna hmunah te, inlaichinna kawngah te kohhrana an hmingthatna  leh lansarhna changchawia hma-theh ta mai lah bo lo. Kohhran huang chhungah thawhlawm thawh tha tura phut leh kar thiam riau te kan pung ta zel a. Lawm avang thawh (Thawh + lawm) ni tawh lova, Thawhhlauh (Hlauh + thawh) hi a awm theih ta hle. Kan ram economy, chhungkaw economy thlir hian sakhuana hian min rawk ta chu a ni ber mai a! Kan inkhawmpuiah te, kan sumtuak danah te hian sorkar sum tlang tihek zawng leh hlethletna rawngkaia kan dil min tihhlawhtlinsak loh chuan ti ni-awm fahrana kan nawrseh fo hi chu sim a hun ta.

Advertised Kristian: Kristian nih hi infakmawi ngai miah lo, nundan hmanga lanchhuahtirna tur a ni a. Kan thiltih that leh hnathawh, rawngbawlna te hi fakmawi chawp ngai lova mite hmuhtir tur a ni. Dawt var nen lama kan nun, kan thil tih dik lo, kan sawi mawi ta fo hi mak tak a ni. Lal Isua kha chu a ngawi reng a, keni chuan human rights kan changchawi leh mai dawn a ni. Thilpek pe tha, Kohhran bel leh rawngbawlna thawhhlawk chu langsar tur anga dahna a awm a. Thilpek tam lam aiin pek bang la awm ah reng teh a ni lo. Biakin lian leh ropui chu kohhran nuam leh nunga ngai an pung ta.

Heti ang mi hi chu Kristian zingah mi tlem te pawh an lo awm a ni thei e, nimahsela, kan hmai tibal thei tu a nih avangin fimkhur a tul hle a ni.

No comments:

Post a Comment