DROPDOWN MENU

Thursday, May 26, 2016

187/2016 MAY Ruahthiampui kan tuar dai

THLIPUI A TLEH

May day, ni 1 May 2016 Zan ka inkhawm bang chu inthlak sawk sawkin, inkhel ka en paha, kan nu thingpui siam chu ka in a. Naupang pahnih lum ti chuan tukverh an lo hawng darh vek a.  Nakin lawkah kan thlabar dawn tih hre lek lovin a nuam phian a. Tukverhte kharin dar 9.15 velah chuan ka nu nen an mu ta diak a.
Dar 9.30 a lo ri a, current a thim a, kawl a lo phe zawr zawr a, thli thaw nghal vuk vuk chuan ka ngaih titha lovin pawn leh tukverh, engkim chu ka enfel zo hman hram tih chuan thli a tleh ta. Thlabar miah lovin ka kai tho a, Choka ‘tapchhak’ bul thingremah chuan ka nu a thu a, naupangte nen ngui hmel takin an thu nghuai hlawm a. Kei chu an bulah thu-in thlamuan thei turin huaisenna reng ka nei lo. Heti tak maiin thli tleh leh rial tla hi a hlauhawm ang tih reng ka hre ngai lo.


Ka la hre reng thin a, kan tleirawl laia Pu Rosanga te, Pu Chawngsanga te, Pi Zapi, Pi Tebawih te, Pu Damrea te chhungkua thli hlauva an lo riak thin chu nuam ka ti hle mai! Keini’n nuam tiin an fate hmaiah belmang te kan lo hnawih mai mai thin a. Kan fiamthu ata langlakin an thlamuan phaha kan inhlimchhuah hi a ni ngawt thin. Nu leh pa thlazar hnuaiah kan awm a, kan thla muang hle thin a ni. Hlauh enah kan lo en ngai lo hrim hrim a, nuam kan tizawk thin. Kumpui lingleta Pu chawngsanga te chhung thli hlauva an lo riak thin mak ka tihzia ka ngaihtuah a, ka inthiam ta lo tawp mai. Ka pa thla zar hnuaiah a nupui fanau nen a in lum, a hunlaia rinawm ve tawk tak thin kha tunah chuan a neitu awm loh hriat fahranin a ding awn bui a. Khawvel hi a inlumlet chak ti ru? Tunah chuan inhumhimna a ni tawh lo a, tanpui ngai in a lo ni ta! A hnuhnung apiangin in an lo sa tha zel tawh a. Kan awt lehling ta fu mai a!. Kum sawm thum a vei awrha Pathian mite, rim taka hnathawk thin; rem hre bawk si chu an kang dawrh dawrh a. La lut tlem mahse an hmang daih zaia sual lam atan sum an seng ve lo a, an tuarchhel bik em a ni.
Thli a tleh nasa zual a, ti dek chungin kawmchar kawng khar awng atang chuan ka bih ngam tawk a. Thenawmte inverter on erawh ka hmu ruai ruai a, inverter ka awt lam ni lovin, thlamuang taka RCC tukverha an lo dak thla ngam kha ka awt a ni. Inhulhimna tur an nei tha em alawm tiin ka ngaihtuah a. Bati a chhit en theih lova, a thim mup a, kan Laltin ung tawh tak eng riai riai hmang chuan kan inchung kan en thup mai. Thingthu nung zawng zawng ka thuk thawlh a, Sepui ruah tuar awmzia hi ka hre ve tawh a, tunah chuan hrilhfiah leh chuan ngai lovin ka hrefiah ta khawp mai. Tih theih kan nei lo a, engtikah nge tih nghah kha kan theih tawk a ni mai.
Chung lamah vanrial a rum a, rial a tla ri zut zut a, kawl a phe zuai zuai a, ka ngaihtuahnaah chuan kan thenawmte in hi ka nu, elkun tawh tak hian a thleng hman an gem?  Thenawmte Veranda ka paw thleng hman ang em, Leikapui epa inte; inbualna leh inthiarna nuam sa ve deuh bual inah ka luhpui zawk dawn tiin ka khaikhin a. Rial sawmhnih dawn chaw ei dawhkanah a lo tla tawh si a. Chawhtawlh leh brite chhin ka chhawp hnai a, lak mai theiha inring ka ni. Bawiha hmel chuan kan thi dawn a mi tiin min zawtin ka hria. Vala a vai thrut a, che eih lo hian a meng bial kawk kawk a, ka nu men danah chuan a mangang apianga a tih thin angin a tawngtai tih ka hre thei bawk.
Thih hlauh vang ni lovin kan in hi a tlu ang a, Mizoram news leh whatsapp lamah kan chanchin hi a darh chuai chuai ang tih ka hlau tak zet a ni. Lal Isua vanga mualpho te hi chu ka huam ve thin a, ka hlau lem lo. Isua vang pawh ni lo, retheih vang leh chhungkua hman atanga kan lo tangrual loh vanga mualpho tur chu ka ngaihtuah hman vek a. Khaw hrang hrangah thli leh rialin ina denchhiat nasat zia ka hre bawk si. Tih theih ka nei lo, vawi tam tak -maimit chhing ngam si lo, ding chungin ka tawngtai mawlh mawlh a, ka thu hlei thei lo a ni. Min chhang ngei dawn tih ringchungin kan thla a muang si lo a nih hi. "Mualpho lovin kum tam in awm tawha zanin ka remruat chu in dal theih a ni lo" tiin min chhang tlatin ka hria a, ‘i thu nise’ tiin ka tawngtai ta a.
Inchung atangin intring a lo tla chuai chuai a, choka kil lam chung a ri dawt dawt a. Engpawh lo thleng se, helamah hian tlanchhuah tur tiin rilru ka siam a,ka hrilh nghal a. An hria em ka hre lo. Hlauhna hmunah hi chuan minute khat reizia ka hria a, darkar chan ve zet thli tleh hi ka la hre ngai lo, tui a hal huam huam a, in reng kan tum si lo. Sona ka bih zut a, thut reng ka tum lo. Zun a chhuak a, zun cheh loh kan tum mai a ni.
Dar 10.15 a ri a, a zia deuh, tui an in a, an zung bawk a. Che lovin kan ti ti a, in tawngtai ve em tiin ka zawt a. Bawiha chuan tawngtai tehreng mai tiin, Vala chuan ‘Awi, ka rilru in ka tawngtai quit thrak, chhung inkhawm kha chu nep te’ tiin. Ka nu erawh a dan pangngaia min chhang lovin, a awm thung. Hei dar 10. 25 ah chuan min mutsan ngam ta. Ka mu thei dawn chuang lova, Kawmhnuai leh enfel ngai ka enfel a, dar 10. 40 ah he thu hi ka ziak a, dar 11 ah chuan ziah zawh hram ka tum e. A patlin loh theih hle mai.


No comments:

Post a Comment