DROPDOWN MENU

Thursday, June 08, 2017

216/2017 Inspirational Speech

Kan zoram khawvel hi ka thlir a.
Hawina lam apiangah hian mang a ang a ni. Chhe ta vek erawh a ni lo
Sorkar skula thawh duhin an phe sup sup a, an fate erawh private skula dah an duh si
Sorkar skul building a tha tual tual a, an zirna erawh a hniam telh telh mai.
Kan ram leh hnam hruaitu tur zirlaite hmakhua hi ava thim em!



Eirukna tihtlem nan Central sorkain ruahmanna tha a siam a,
Chumi phenah chuan remchanna lak kan lo tum zel a
Kohhran mite chawpin eiruk dan kan lo zawng zel chu a nih hi
System tha aiin rilru dik leh tha hi kan va mamawh tak em!

Tu Kohhran nge Bank kalphung mila loan la zet a,
Self Help Group insiam chawpa Loan la thin?
Tu kohhran nge sorkar thawhpui zeta
Khawmpui lian leh inhlawhfakna tura sum dil thin?

Khawnge dikna leh rinawmna chu?
Thu maiah hian a tawp em ni?
Pulpit leh biak in chauha rinawm hi a tawk em?
A takah tiha a taka thawh a ngai a ni lo em ni?

Hmuh theihin kan mizoramin hma a sawn mek a
Hmuh theihin kan khawtlang a chhia a ni lawm ni?
Hmuh theihin kan hmanrua a changkang tawh a
Hmuh theihin kan chhungril a chhe tawh a ni lawm ni?

Anih loh leh kan ngawihsan mai mai dawn em ni?
Thenawm khawveng tan kan tangkai zo tawh lo a
Kan ram leh hnam tan engtin nge kan tangkai theih ang?
Awm awl si, tangkaina nei si lo hmabak chu ava thim em!

Father Case i hre ngai em?
Mahni inchhungkhur pawh chingfel thei lo an punga
An sentet atanga enkawl loh fanau an nei tlat alawm
A bul atanga dik lo chu eng correction centre mahin a correct thei lo

He Mizoramah hian mahni inthat kan va pung nasa ve
Han bih chiang ang aw!
2006ah - mi 70
2007ah - mi 52
2008ah  - mi 61
2009ah  -  mi 73
2010ah  - mi 97
2011ah - mi 72
2012ah - mi 82
2013ah - mi 47
2014ah - mi 65
2015ah - mi 113
2016ah - mi 92
Kum sawm chhungin kumtin mahni inthat mi 82 chuang an awm ziah asin!  Rapthlak tak a ni. Malaria avanga thihna, AIDS avanga thihna te nen khaikhin la, kan vei ve tawkin i hria em!

Kum sawm thun pawh tling lovah hian kan ram hi AIDS avangin a rum ta tak zet a ni
www.mizoramsacs.nic.in webiste hi i tlawh chhin teh ang.
Kum 1990 atanga 2016 thleng khan
Mihring nuai thum sing li leh sangthum zaruk sawmriat pasarih thisen test atangin
Mi 11001 zet chu HIV hrik pai an hmuchhuak asin
Sing khat chuang lek i ti a ni mai thei e!
Thisen test atanga chhut chuan 3.2 percent zet a nih chu.
Chumai a la ni lo
Mihring lunung atangin chhut chiang teh ang
Raipuar, nu naupai hian vawi hnih thum an test nawn thin a
Damdawia inchiu thin leh mi fimkhur bikte chuan thisen an test nawn fo thin a.
Mi nuai khat singnga hi chu test nawn an tling hrim hrim hian ka ring thin
Chuti a nih chuan a lunung thisen test atang chuan 5.6% vel kan niiin a rin theih ang
Mahse kan vanneihna chu nu naupai tam leh tam loh hi
A hluar leh hluar loh teh nan an hmang lo hlauha
He kan chhut chhinna hi chu a rintlak loh a ni.
Rintlak se chuan nu naupai za an test zela pakhat vei an awm pawhin a sang lutuk kha a ni thin a

Awm mai mai thei i ni em ni?
HIV hrik i pai rih lo pawh a ni thei a
Engtikah mah ka kai lo ang i ti maw?
i inkuangkuah reng thei bik lo ang.
I thenawm khawveng hmanga i kawngkhar an kik ni chuan
I monu, i makpa, i unau, i thian kaltlangin a lo lut anga
I inveng seng dawn em ni?
Mizo damrei chhung chawhrual hi a hniam zel i phal em ni?

Kum 70 chuang kal ta khan kaphleia’n Thlirtu a ziak a
Kaphleia ziah a la dik zel hi kan insiam that loh vang a ni lawm ni?
Lehkhathiam, ziak leh chhiar tamna ramah hian
Lehkhabu tha nunkaihhruai thei aia
Thenawm khawveng titi a la innghat tlat kan ni lawm ni?

Ziak leh chhiar tih thu hlaah chuan
Ziak leh Ziah chungchang ka sawi lo
Mi tam zawkin kan ngainat Mobile phone leh
Kan Computerah lungawi hlimna kan zawng meka
Kan nunphung a dahlau a, a vawchhia chu a nih hi
Kan bula khawhar beidawnga kun mek leh
Thihchak ngawih ngawiha harsatna tawk an awm laiin
Harsatna an tawk em tih pawh ngaihsak hman lek lovin
Internet nen hun kan hmangral ta zel chu a ni sia leh

Thu min tiam rawh
Midang bula i awm laiin anmahni aiin i mobile phone i ngaihsak lo zawk ang tih hi
Chuti a nih loh chuan
Albert Einstein khan hlauh deuh a nei a,
Kan khawl hmasawnna hian kan hmaichhan inngaihsakna a luahlan hun hi ka hlau a, chutiang hun a lo thlen chuan khawvel hi mi mawl chenna leh inthlahchhawna hmun a nih a hlauh thu a sawi a.
Bula mite kawm tha peih tawh lo, mahnia tlat fal tuma interek hrang zel i ni em?
Khawl hmasawnnaah hian lungawi tumin chenchilh mah la
I khawharna a hnem tak tak thei lo che asin.
Pathianin siam ang takin mihring bak a awm chuang lo a.
Hmaichhan inngaihsakna tluka hlu hi a awm lo.

Artificial turf phahin TV haw hawpui dur dur mah ila
Economic nghehna a awm chuan loh chuan kan intlakral zel ang
Sem policy an zuar a, dawn tumin kan lo phe ta suau suau a nih hi
Chhurbura mimawla kan ngaih mahin THA CHU NGAI E a tih kha
Khawnge Participation Policy chu?
Tawngkam thiam hluak hluak a tawk so ta lo

Thian chhan thih ngam te hian kan ram tan thih in ngam lo maw?
Eiru sumin eiruk thup nan mipui an hrai a
Fel nih an hlawh zel tho a ni lawm ni?
Thudik chu ala lang chhuak ang a
Thudik lo pawh ala lang chhuak tho ang
Thup reng theih a ni lo

Nang Kristian, kan ram kalsiam hi ngaihtuah chiang la
Tih ve theih chu i nei alawm!
Hlemhletna holam mai mai pawh chan ngam la
Dik nia i hriatah chuan thih thlengin ding ngam rawh
Thih hun bak a damthlen theih loh
Lalpa rawn la, i chhia leh tha hriatna hmang la
Mite tehkhinin inthiamchawp tawh suh ang che.





No comments:

Post a Comment