Kum thar thutiam
Bible : Numbers 30.1-2
Tin, Mosian Israela thlahte hnamho puipate chu a bia a, :Hei hi a ni, LALPAN tu a pêk chu. Miin LALPA hnena thu a tiam emaw, chhechhama mahni intiamkamna emaw a neih chuan a hlen ngei tur ni; a htu ang zawng zawng chu a ti vek tur a ni.
Pathian hian thu a tiam a, a tiam ang ngeiin a hlen ngei ngei \hin. Thutiamtu chu a rinawm si a. Thutiam pawh hi a ngai pawimawh khawp mai a. Nula, dinhmun nghet lo tak pawh, a pasal neih hmaa a pain a hriatpuia \ha lo a tih chuan thutiam a tling lo. Pasal a neih hunah a pasal erawh chuan a sut thei a, a pasal neih hnua a ngawih reng chuan a thutiam chu a nung, a tiam a ni tihna a ni a. Ngawih chu remtihna chanve a ni si a.
Pathian hmaa inneih thutiam kan nei a, kan hlenchhuak thei lo fote hi tiam loh law law zawk tur nge? Nupa in\hen leh si, Dan puitling, Dante-a innei ngei ngei in\hen hi kan va tam tawh tak. Thutiam bawhchhiatna hla “In lungtat a par a mi?” tih te hi kan duh em hi. Inchhir tak chunga vawi sawmli a lo phone pawhin a a hnawla, a reject peih a nia.
Mihringte erawh chuan thu kan tiamin kan bawhchhe fo mai. Thutiam laka rinawm chu mi zahawm tak an ni a, hma an sawn zel \hin. Pathian laka kan thutiamte hi a hlawhtlinna tura theih tawp kan chhuah a ngai \hin. Mihring laka thu kan tiam pawhin kan zahawmna, kan nihna humhim nan hlenchhuak ngei kan tum \hin a. Thutiam ngai pawimawh lo chu an dazat tlat. kan ring tawh ngai lo a ni.
Ramhuaite pawh hian thu an tiam ve a nih ka ring \hin. William Shakespeare khan a thawnthu “Tiam rawh” tiin a pa thlarau khan Hamleta hnenah a sawi a. Hmun tam takah pawh kan hmu thei ang.
Hmanlaia Babulon ho kha Kumthar thutiam nnei hmasa berah an ngai a. Kum 4000 kal ta khan an lo ching daih tawh a. Rome ho khan an an ching zui ve leh ta a ni. Kumtinin an lal ni lai chu an lal a ni tih nemngheh nan te an hmang a. An kumthar thutiam an hlenchhuah chuan an pathianin mal a sawm dawn niin an ngai \hin.
Kristiante pawhin kan lo ching chho zel a.Kum 1740 vel a\ang khan Methodist kohhran dintu John Wesley, kan Kristian hlabuah pawh a hla tam tak lehlin a awm hi. Hepa hian Kumhlui thlahzanah emaw, kumthar niah emaw inkhawm buatsaihin Pathian thu chhiar te, Hlasak leh kumthar lawmna hun a huaihawt \hin a. Chuta \ang chuan a lo lar ta zel a ni awm e. Pathian hnena intiamna chauh nilovin mihring, mahni tana intiamna pawh a lo lar ta zel a ni. Tunhnaia America rama an zirchiannaah chuan 45% zet hian kumtharah thu an tiam \hin a. 8 Percent chauhin an tihlawhtling \hin a ni.
Kum 1953 April ni 4, Zing dar 7.45 khan India ram Prime Minister Jawaharlal Nehru chuan REID HOUSE (Assembly House ang) Member 24 zingah thu a lo sawi a. Thla sawm pahnih chhunga tih tur emaw, kum hnih chhunga tih tur emaw ruat lawk \hin ula tiin fuihna a sawi a. Mizo zingah chuan ruahmanna sawi hmasa a ni. Chutiang ruahmanna fel kan neih kil kel peih loh pawhin ruahmanna ngai lutuk lo thutiam chu kan nei thei alawm le.
Tunlaiah chuan kan thutiam ziah chu kum thar thutiam a ni. Pathian nena kan inlaichinna chungchangah kan tiam fo a. Mihringte inlaichinna leh mahni tan thu kan tiam \hin. Hlenchhuah loh tur thutiam hian sawtna a thlen lo a, rilru natna a thlen zawk thei a. Hlenchhuah tuma thutiam erawh a sawt em em a ni. Shakespeare chuan ‘hmuihmul nei lovin a hmuihmul chhala thu a tiam chuan awmzia a neih loh thu min hrilh a. A hnuaia thutiam atan chuan a \ha hle a, hlenchhuah tumin kawngkhat tal i bei ve dawn em? Kan dinhmun azir zela tiam chi a ni.
Pathian nena kan inlaichinna zawnah hian eng ang hmasawnna nge thutiam kan neih ang?
1. Chhung inkhawm zan tin, emaw Kar khatah vawi hnih tal emaw, Sunday zingah tal neih ka tum ang
2. Sunday school kaikim ka tum ang.
3. Bible chhiar chhuah ka tum ang.
4. Chhungkaw tan hun tam thei ang ber hman ka tum ang.
5. Hla ka sakin ka theih tawpa ringin ka zai ang a, ka tui mai ang a, Pathian ka chawimawi thei ang
6. Pathian faka lam kawngah hmasawn ka tum ang
7. Kohhran leh a pengte tana thawhlawm, target dik taka pek ka tum ang
Mihring inlaichinna leh hmasawnna kawngah nge thutiam kan neih ang?
1. Phone a tlem thei ang ber ka khawih ang. Mi zinga ka awm laiin \ul tawpah lo chuan ka khawih lo ang.
2. Meizial leh kuva, zu etc nghei ka tum ang. Emaw ka chak tawp khawkah lo chuan ka ti lo ang.
3. Ka bul hnaia awmte nena inkawmna (ti ti) tibuai thei khawpin engmah ka dah pawimawh hmasa lo ang.
4. Lehkhabu chhiar tam ka tum ang, emaw thlakhatah pakhat tal chhiar ka tum ang
5. Dam taka ka ek theih apiangin ek inah lawmthu sawi \awng\ai neih ziah ka tum ang.
6. Thil dik lo ka hmuhin ka hai der tawh lo ang. Emaw dikna ka chawisang ang.
7. Ka eiru tawh lo ang etc etc
Thutiam pawimawhna kan hre ta. Kum 2018 chhung hian engtiang angin nge hma sawn kan tum a. Kan mimal nun, chhungkua leh Kohhranah. Pathian nena kan inkarah hian kum \ha tak kan neih theih nan kawng khat talin thu kan tiam thei dawn lawm ni? Hlawhtlintir tum ngei turin?
P.S. Kum thar 2018 zan zaikhawm kaihhruaina ka hmang ve dawna, kan inbuatsaih a ni e. Update 250 tlin tir tum vang ngawr ngawra update a ni pah bawk.
No comments:
Post a Comment