ISUA HI RUATLAWK A NI - II
( Bible : Matthaia 2.1-8; Johana 20.29; )
Isua chu Bethlehemah a lo piang ta ngei alawm. Mi zawng zawng tan a ni. Piangthar leh Piangthar lo tan pawh a ni a, Chatuana nunna kan neih theih nan leh kan Sual chhandamna turin a lo piang a ni. Thi mai tur chhanchhuah a nih theih nana mahni nunna meuh hlan tur an awm a nih hi chuan a ropui hle. Krismas chu a zo ta!
Pathian thu kan pawm dan sawifiah nan te pawh hian Krismas-Isua pian chungchang hi tehkhin thu tha tak niin ka hre thin. Pathian thu chhiarin thenkhat tan chuan a hriat zung zung theih mai a, chhiar reng si a, hre thei miah lo pawh a awm theih a ni. Thlarauva hriatna atang lo chuan thinlung lamah a fiah thei tlat lo a nih chu. Chutiang bawk chuan Krismas hria, Isua pian thu hria, engah vak ngai lem lo an awm a. Isua pianchhan hria a, a tur ve renga ngai pawh a awm theih a, a pianchhan ngaihtuaha lawma, hlima, zaia lam lo thei lo pawh an awm bawk; chung mite tluka krismas hmang nuam an awm lo ang.
Isua pian tur thu hi thlun lawk vek a ni a. Juda mipuite chuan Messia; Rom awhbehna hnuaia chhuah zalen turin an ngai a. Beisei leh rindan an lo neih lawk avangin a thelh chiang hle a. Tlawmna nun nena Lal Isuan khawvel hneh a tum dan hi khawvel mite ngaihah chuan a awih awm loh em a ni. Mahse, khawvel mite hriatthiam aiin khawvel mi zawng zawng ban phak tawka alo piang hi tihpalh thil thu a ni lo. Pathian chatuan thil ruahman hi a dawngsawngtu azirin a danglam mai thin a lo ni.
Khawchhak mifing pathum te leh Artabana (Khawchhak mifing palina) te kha chuan an khawvel finna, Arsi chanchin atangin Isua a lo piang dawn tih an chhut chhuak a. An neih sum tam tak sengso turin an kal chhuak a. An rin lohna lamah Isua a lo pian avangin Bawng in lamah an kal mai a, ringhlel miah lovin Birthday Present ropui tak tak an pe a nih kha. Artabana pawh hian kum 30 chuang zet Isua hmuh tumin a zawng a ni, khawvel finna hian Isua hnen a hruai thleng a ni.
Lal heroda, khawvel lal ropui pawh khan Isua Pian thu hi a hre ngei a, khawvel mifingte hmang pawhin zawn chhuah a, chibai bukna rapthlak pek a tum a nih kha maw. Mi fingte pawhin bum mai mai theih an nih lohzia tilangin Heroda chu an hrilh lo khawp mai. Isua thah tumin nausen a rawt ta chiam mai a nih kha. Khawvel lal ropui pakhat ve maiin kan tana pianga, nunna hlan tur hi dal chi a ni lo.
Pathian vantirhkohvin a hrilh te lo chuan Isua pian hi zuk hre lo a. Berampute hnena a inlar ang khan Khualbuk vengtu hnenah inlar ta se, bawng inah an awm lo tur a nia. Pindan chungnung leh huhil ber an chang ngei ang le. A nu leh pa, a chhungte tan lo chuan nausen pakhat piang kha a ni ve mai a. Mahse, Thlarau atang hian a lo fiah ber zawk a ni.
Heng mi chi thum kan tarlan atangte hian Isua Krista pian dan leh a thihna turah hian engkim hi ruahman lawk vek a nih a chiang hle a. Mihring finna, fing lutuk lo atang hi chuan a fiah lo a, duhdan leh beisei dan neih hi chuan thelh a awl hle bawk. Khawvel thila inbuatsaihna lam aia tlawmna leh thinlung lama inbuatsaihna zawk hi Krismas kan hman dan tur chu a ni. Khawchhak mifingte anga hriatna nei hawt si loh chuan eng kan thleng lo ang. Setana duh zawng anga krismas lawm lovin Pathian fak leh chawimawia kan lawm hian a lo ropui ber zawk alawm le.
Bethlehem chhiarpuia kal te, Isua pian hunlai khawsaho khan beng hriatna chuan Isua pian thu hi an hria a ni mai thei a. An chanchin kan hre tam lo hle. Vantirhkohte leh Pathianin Thlarauva a hriattir loh tan chuan awihawm loh pawh a ni ang e. Keini, nunga awm mek te hian ‘hmu lova ring apiang an eng a thawl e’ min tih avangin kan tana nausen lo piang hi kan hria a. Thlarauvin a hlutzia a hriattir tan leh piangthar tak tak tan lo chuan Lal Isua pian - krismas vanga lawm hi a har a. Beng hriatna hmanga hria mai tan chuan phurrit a ni thei a, dan anga kal liam leh mai tur a ni. Engtin nge Isua pian hi i thinlungah a thawh tak chiah le? Kum dang nen i lo tehkhin thin em?
No comments:
Post a Comment