DROPDOWN MENU

01 December 2015

54/2015 Bawngpupar a vul leh ta!

 BAWNGPU PANGPAR A LO PAR LEH TA

"Bawngpupar a lo vul leh ta!" tih ngawt hi ka rilru-ah a awm a. Bawngpu pangpar ka'n tingawt a, Nihawi lem pangpar ti pawhin I hre zawk mai thei a. Pu Zoramthanga Serthlumpar tia I hria a nih pawhin I demawm chuang lo e. He pangpar hming dik tak hi eng nge tih pawh a hriat theih lova.  Kham bakbahai leh ram chhawr bawk loh turah ho khat neiin an lo par eng tuar thin a. Chu chu he thu ziah nan hian a tawk a ni. Mawi taka thlir mai loh chu tangkaina tur a awm lem lo a. Ram pangpar a nih avangin a par hi han thliakin, Pot mawi tak leh remchang takah pawh khawi thin mah ila, a mawi hlei thei lo fo. Rei a par theih ngai loh vang a ni. Chuti ni suh sela, mi koham leh sum mena meng ho hian an vai nasa ngawt tawh law'ng maw?


Khawi hmunah pawh engtin pawh chei bawl ila, Chhiahhlawh chei ang maia uluk ngai leh a behbawm mamawh tam a ni. A awmna hmuna a par hian a mawi tawk em em a. Rilru dang put tak thut avanga thlai chin taka chin  chi pawh a ni lo. Chei mawi leh zual emaw, uluk taka khawia mawi leh zual chi pawh a ni lo. A awm hmuna a lo par vul mai hian, sikni eng leh Pathian thilsiam a nihzia min hriattir a, sum leh pai hlutna min theih nghilh tir a, Pangpar bawr khat hi engzat man nge tih nen lama chhut chi a ni lo. 

William Wordsworth-a Lucy kha nge Violet pangpar kha ni zawk ang tih nen lam ka tehkhin fo a, han chhiar thar leh teh. (chhiar ri ngei thei la)

She dwelt among the untrodden ways
Beside the springs of Dove,
A maid whom there were none to praise
And very few to love:

A violet by a mossy stone
Half hidden from the eye!
Fair as a star, when only one
Is shining in the sky.

  Eng emaw hriatchhuah I nei ve lo maw? Nipui a thawk tantirh a, luite dung boruak nawmzia I hre tawh  a nih chuan a hlutna belhchhah turin pangparin hringnun hahchawlhna min pek theihzia leh thlamuang taka awmte hnenah chauh chawlhna a pek theihzia I hre thei ang. Vei leh helhkam, lungkham neite hnenah chuan fakna leh chawlhna a awm ve lo  a ni. Sikni eng an sawi apiangin Tlaizawng par an sawi tel thin a. Kei zawng tlawmte-a par thin Bawngpupar sawi hi a remchang ka ti fo.

Khawvel ngaihlu apiangte hian engkim hi sum hlutna hmangin an teh thin a. Mawng vawmba ang sekin hun an hman a ngai a. An chawlh hahdam nan an thawkrim sauh sauh nia!  "Lalpa sum ka ngainep a…." tih te chu khawi lamah va tidik suh. Khawvel hi eng mah lova thlirtute tan lah inlemkhual ang maiin an hmu a, an bula chen hi a hrehawm hrep lehnghal a. A thilsiamte atang hian Siamtu  chu an hmu thei lawi si lo a ni. Lumen laia khawfing chah dawna K'u Dana tawngtai ang deuhin, "Lalpa kan thinlung battery down tawh te hi min charge full sak la, khawvel pawh hmu chul rawk thei turin" tih ang hian  FULL leh lutuk a, engkim hi an hmu chul zo ta vek a nih hi.

Pathian hian I thinlung hi a lo charge full lutuk nge a thilsiam mawina hi I hmu lo zawk? Bawngpu pangpar tih avanga hnamdang hmelhmai bak I mitthla ngai lo a nih chuan inenfiah ang che. He pangpar tlawm tak hi khawvel lehlamah thawnchhuak ve ta ila a man chu a to ve  tho ang le! Eng nge a hlut loh bikna chu ni ta? Foreign atanga pangpar chawk luh chauh hi mawi I lo ti zawk em ni? Sap hming nei pangpar chauh hi mawi I ti a, Pot-a hun emaw, eiruk inlian taka awm pangpar chauh hi I chhinchhiah bik a nih a, Mangkhawng in leh Khamhuai in chhunga khawi chauh hi chhinchhiah bik suh ang che.

Khang pangpar lem leh chawm mawi chauh te kha I tan an hlu lo.  Khati ang pangpar kha chu mi hausate tan chauh an par a, inlengte hmuh turin an vul asin. He pangpar hi chu mi zawng zawng tan a par a, hmun tha leh hmun mawi, thianghlim hi par vul nan a hmang ve lo a. A awmna hmun apiang hi a mawipui zawk asin. A awmna azirin a zia a thup ve lo a, harsatna leh retheihna karah pawh a nihna ang angin a par a, a langsar mai a ni. A thihhnu-ah kan ram tana lei tha-ah tal an lo chang thin. Vanneihna pakhat erawh a nei ve , pahnih pawh a ni thei bawk, thlasik hun nuam lai taka par a chhuang thei hi a ni a, mi dangte tana a par thei pawh hi a ni awm e.

Fak leh chawimawi duh avang emaw, a nuam lai chauhah hian I par thin a nih chuan I thih hnu chauha fakmawi chi I ni ngei ang. Chuti a nih chuan he pangpar ang maia a thih hnu-a mawi zawk, a par khawro tak cheimawi pawh awlsam zawk an ti mai ang che. I thih hnu-ah an fak luai luai ang che a. I chenpuite tan hnemhnan awm loh ve khawp ang! Nunna kan neih tawh loh hunah hian mite nunah engtin tak par zel ang I maw?  
                                                              

No comments:

Post a Comment