NU THU AWIH TUR. AK AK!
Ka nu thu awih loh hi ka la nei ngai lo a, chumi avang chuan inchhirna tur ka neih pawh ka la hre lo. Ka inchhir ngai bawk lo ang a, ka lawm em em zawk a ni.
Ka inchhir ve teuh ber chu tuichen a phal loh vanga tui chen ka thiam ta lo hi a ni a, chu pawh star te nena picnic lai chauha inchhir ka ni. Țhiante chu Khurpuiah an cheng ru a, tui hleuh an thiam vek a, an tui cheng tur hi ka zui hnuang hnuang țhin. An tui chen inthup nan hmawlhin an sam sei tak kha an thai a, an khuih mawlh mawlh țhin. Gel leh Lotion tih vel chu kan naupan laiin a hming an la phuah ve lo a ni ang, ka hre ngai lo. Haw lamh erawh tlem chuan min awt ve thung a.
Tlai infiam chaw ei huna haw ve tawh țhin tura min hrilh ziah kha a ni ngai a. Thim thleng țhaka ball ka lo pet ta țhin erawh ka tui luat vang a ni a. Thuawih lovah pawh ka inngai lo.
A thu ka awih har pawl tak pakhat chu, nakum chu nupui nei la a țha ang a ti a. "Aw" ka ti. A vawi khat sawina a nih vang pawh ni lovin, ka chaka ka chak loh vang pawh a ni lo. Aw tih mai kha a tan chuan a hlu em em a. Ngaih țha tak khan a awm ta reng bawk a, kei erawh ka ngaih a țha lo thung. Ka hupphurh tual tual nia. Ka tana țhatna tur bak a ngaihtuah ngai lo tih ka hriatchhuah fo avangin ka thla erawh a muang thung.
Choak dum, Choak dum, engtin nge i hram țhin? tih naupang hla hi kan hre vek a, Nu thu awih tur, Pa thu awih tur a ni, Ak Ak tiin kan chhunzawm țhin a. Naupanlaia hun khawhral nan hla mawlmang tak min lo zirtir a, inbawl nan min sak nawn tir fo țhin a. Țangkaina reng reng nei lo emaw ka lo ti țhin a. Mahse a lo ni lo tawp tih zanin hian ka ngaihtuah chhuak ve tlai khaw hnu nia!
Thilsiam dangte pawhin nihphung an lo nei a, Sava a zawnga kan hlut loh ber, a sa pawh kan ei duh loh Choak vai chaw țhing tlan mai mai te pawh hian Ak Ak nu thu awih tur, Pa thu awih tur an lo ti a. Chawngzawng sa a thur a, ei mi a ni lo tia kan sairawkherha tin pawh kan tin chhin duh loh, saihlum pakhat nen pawh a inhen meuh lo a ni. Chung sava tlawm tak te pawh chuan nu thu awih tur an lo ti a.
Kha hla țhing zet emaw ka lo tih țhin hmang khan ka thluak an lo su a. Zirtir ngài loh kha min lo zirtir reng zawk a. Formula ing erh tak tak, tun thlenga a hmanna ka la hriat loh ai kha chuan a țangkai zawk asin. Thununna a keng tel a, rilru dik zirtirna chi a tuh a, damchhunga hman nghal tur a lo ni a, ka mamawh ber a lo ni zawk.
Nute thu hi lo Dik lo deuh mah sela a dik ber a. Fate tan a țha ber bawk. Ak Ak tih thu awmze nei lo hmang khan nun awmzia min lo zirtir ru reng zawk.
Bollywood filmah chuan pawisa la lut tam ber an tih țhin, Bahubali2 film in a lo khum tak PK Film Mizo țawnga lehlin (dubbed) ka enlaia, a changtunu aw ni awm takina Amir Khan bula a sawi ri kha ka bengah a cham reng. Zu rui der thiam tak aw ang maiin "Choak hian 'Ak Ak' a ti a" tih ngei mai kha. Kha nu aw ngei mai kha, ka va ngaizawng tak e aw. Ka lerh ta lutuk em?
No comments:
Post a Comment