DROPDOWN MENU

13 November 2018

271/2018 Rinawmna chu hunbi tiam chinah teh tur

Rinawmna

Matthaia 25.21 : A pu chuan a hnenah, ‘Bawi tha leh rinawm, i titha e; tlemte chungah i rinawm a, tam tak chungah ka awmtir ang che; i pu lawmnaah lut rawh,’ a ti a. (Matthaia 23.23 ; Tita 3.9-10 )

Introduction : Kan khawtlangah hian Pathian thu aupui a, benchhenpui kan tum a ni. Khawvel mite mahin Zu ruiin buaina an siam a, an zah loh phawt chuan engnge kan tim reng bik ang? Party Politics atchilh ho pawh an lama eng vangin nge kan lam loh bik lem ang le? Chhinchhiah nan Flag an tar a, an inzahpui lo a ni ngai a. Eng vangin nge Isua Krista hi kan zahpui bik ang tiin ka ngaihtuah a ni. ‘Make some noice’ tiin an au rual dual dual a, a nawm hmel viau thin chu a nih hi. 

In lama TV lo ente pawhin nguntaka min lo ngaihthlaksak turin ka ngen che u a. Zirlaite pawhin kan zirlai dah thain, Party mite pawhin kan thu khelh mek dah thain min lo zawm ve turin ka ngen che u a. In party chungchang kan sawi dawn a, lo ngaithla uluk ang che u. Pastor te ka enfiah tira kan thusawi tur hi a him turah pawh ngai ila.

Minute 15 aia rei lo hmang tura hun pek ka ni a, thusawi thiam tak tan pawh minute 15 hi chu har tak a ni. Thupui har ber pawl ‘Rinawmna thu’ sawi tur a ni a, Thusawi mi ka ni lo lehnghal a. Ka Talent tlemte dawn hi Thlarauvin min tihpunsak turin ka lo penchhuak a ni.

A awmzia : James Dokhuma ‘Tawng un hrilhfiahna’ lehkhabuah chuan Rintlak, rinkai, rin ngam tiin a sawifel mai a. Rinawmna kan sawi dawn chuan rinawm lohna tehkhawng hriat a ngai a. Chu erawh chu kan hre sa vek awm e. Phatsantu hi rinawm lo a ni a, phatsan loh ngawt hi a tawk lo a, rinawmzia tilang tura thiltih neih hi a ngaihthu kan puangchhuak dawn a ni.

Nihna leh thil tih hmanga lanchhuahtir chi a ni: Sawi maia fiah chi a ni lo, nihna leh thil tih hmanga lanchhuahtir chi a ni. Tawngka hmanga an rinawmzia sawi zung zung thin hi an rinawm loh duh hmel zawk asin. “Kei chu i lakah hian ka rinawm khawpa’ ti awlsam zung zung thin te hi duap an kai fo thin. Ka thih thlengin, Chatuan thlengin  ka rinawm ang ti thinte ai chuan a taka lantir thinte hian min hnehin, an lanfiah tir thin zawk.

Thudik lo hi chu thup theih a ni lo, thudik pawh hi zep theih a ni lo. Engtikah emaw chuan a la langchhuak dawn tho tho a ni. He khawvelah hian i thil tih ruk emaw, i zep ruk emaw, i hlep ruk  emaw, thil dik loh i tih pawh kha lo hailang kher lo mahsela Vanah chuan hailanin a la awm tho tho dawn. Khawvel mite pawh hian ngaihdan chu kan lo nei thin a sin.

I sem ruk, i rawlruk thin te,  I hlep ruk tin te, i ruk te hi hre kher lo mahse mite hian sawichhuak kher lo mahse ngaihdan an nei asin. Vantlang a bum theih loh.

Hlawntlinna tura inkaihhruaina kan nei thin : Khawvelah hian thu kan tiam thin a, chumi chu hlawhtlin tir turin hma kan la thin a ni. Thutiam hlawhtlinna tura ke pen thin chu mi rintlak, rin ngam an ni thin. Chutiang mi chu mi rinawm kan tih thin chu a ni lawm ni? 

Kalsual tur ven ngawt a tawk lo a, awm mai mai ngawt a tawk hek lo. Ngaihdan pawh nei lo a, awm mai mai emaw, ni ve tawp nihna lam a kawk hek lo. Thutiam leh thuthlunga rinawm tur chuan kan thutiam hlawhtlinna tura hmalak a, ke pen a, peipun a ngai thin a ni. Mahni vanram thleng tur chu sawi loh,  midangte nuna Pathian rama hruai luh chu a har khawp ang. Kan tum ber tur a ni dawn lawm ni? Pathian ram din hi kan damchhan a ni zawk lo maw?

Talen khat kawltu hian ruk a ruk kan hre lo, a tihsual em em pawh a awm lo. Mahse Talent peipung tura hma a lak loh avanga a lo kawl ngawta a awm mai mai avangin “bawih sual leh zawm thawpa’ tia zihhlau a nih mai bakah a neih laksakin a nei zawk hnenah pek a nih kha maw

Hun tiam chhungin thutiam leh beisei chin a awm thin : Nupa karah te, Inngaihzawnna karah te, Party boruakah te thu kan tiam thin. Thu kan tiam kher lo a nih pawhin mite, mipui ngaihdanah beisei kan nei thin. 
MNF/Congress party-a kum khat chhunga membership fee pek khan ken tel a neih chu rinawmna a ni. VOTE thlak hunah pawh a vote ngei beisei a ni a. Congress/MNF Party-a Cheng nga a pek khan a kum lehah MNF ngei ngei tur tihna a ni lo a, kum khat chhunga tih tur leh beisei (roles and expectation) a hlen a ngai a ni. MLA-ah, VC-ah, YMA ah, khawvel thilah pawh hunbi (term) a awm thin. Anih hun chhung apelh tawh chuan a do let thin. Sual do let a ngai tawh ang hian.

Membership fee pekna tur nei lo ZPM ah pawh a ni tho. Tute hnenah emaw in pawl chu kan lo vote dawn nia, tia intiam zung zungin a vote leh si loh chuan rinawm lo a ni tho tho. Congress ni reng si, MNF ni reng si Mahni awmna party vote duhtlat lo chu rinawm a ni thei chuang lo. Uire a ni Uire a ni. Denhlum mai pawh ni lo, sihhlum tlak a ni.

TKP te hian thutiam kan nei a, TKP kan nih chhungin kan tihhlawhtling tur a ni. “Ka chakna Isua Krista chu ring tlatin, ni tin Pathian ka pawl ang a, kan kohhran Pathian biakna leh hnathawhnaah ka tel zel ang. Khawtlang thatna leh inunauna tinghet turin ka thawk ang a. Krista hnenah mi dangte hruai ka tum tlat ang” tih kum tina tiam mai pawh duh tawk lo a, a saka sa thin te hi i inenchiang ang u. 

Kum 40 kan nih thlenga he thutiam neitute hian isua kan ring a, ni tin kan tawngtai  pawh a ni thei e. Khawtlang thatna leh Inunauna tura Party hem thlak tlat te, chhungte chawilar tlat te kan awm em? Whatsapp kaltlanga khawtlang thatna tur emaw tia iak iak, inlungrualna tichhe tura sawisel deuh reng kan awm em? Kan thutiamah kan ding tak meuh maw? Krista hnena mi dangte hruai ka tum tlat ang tia intiam zut zut hian Party kaltlangin em ni Mi dangte hnenah Isua Krista kan hruai ang le? Hnaisai lo mai, BJP pa hian engtin nge MNF/Congress/ZMP chu Krista hnenah a hruai teh lul ang. In-ei lo theuh theuh chu ‘ka ha se’ a ni ringawt.

Kristiante tan chuan Isua Krista laka kan rinawmna hi chu damchhung a ni. Thih thlenga rinawm thei lo chu phatsantu nihna a ni a. Rinawmna chu thihthleng a ni tur a ni a. Thih hunah chiah rinawmna chu a famkim thei ang.

Lawmman leh hremna a awm thin:
Bawih tha leh rinawm, zawmthaw tan pawh lawmman hi a awm vek thin. Talent khat leia phuma kawl ngawt kha a tihsual loh hmel nen khan zawmthaw nihna a ni a. A neih an laksak bawka, lawmman chu a dawng lo khawp mai.

Sual vangin thlemin i awm a, tawktarh vangin i awk ta ngei a. Chu tawktarh chu i nei ta ngei alawm. Chumi hnu chuan i zalen tawh asin. Lawmman i lak tawh vang emaw, Pawisa i dawn vang emaw, Contract i thawh vang emaw, eng vang pawha i rinawmna i hloh a nih chuan Pawisa, thilpek vanga lei i ni a. I inhralh tihna a ni. Lawmman chu i hmu zo tawh tihna a nih chu. Rinawm lawmman chu beisei suh ang che.

Tlem te chunga rinawm chu tam tak chunga hotu-ah siam a ni a. Tlemte chunga rinawm lo pawh hremna a awm tho thin. A mawiah leh a lang chinah dan leh thutiam te zawm famkim thin mah ila, dan thu pawimawh zawk –  felna te, khawngaihna te, rinawmna te kan neih si loh chuan Lal Isua hi a lawm lo ang.  Party member ni ngawt emaw, ni chiah lo chunga Vote chu an pute MLA, Unit hruaitute an lawm lo a, duhsakna an dawng ngai lo ang hian kan Lal Isua Krista pawh hian Piangthara inchhiar, che chhuak miah lo leh thil tih nei miah lo, nuna hmuh tur awm miah si lo chu lawmman a pek a rinawm loh a ni.

He khawvelah pawh hian rinawm chu kan ngai hlu a, kan chawimawi thin. Rinawm lo chu hrem kher lo mah ila mi thinlungah reh thei lo a insiam thin a nih hi. Kan rinawm avangin lawmmante, chawimawina te, fakna te hi dawng lo mah ila Vanah Chatuan atana chawimawi lawmman kan la dawng ang. Kristian rama inchhal, a chhunga chengte hi sual laka fihlimin Isua Kristia thutiam hlawhtlinna tur hian i thawk sauh sauh ang u.

(To be delivered on 15th October 2018  @TKPOpenAirserivce)



No comments:

Post a Comment