DROPDOWN MENU

Tuesday, February 05, 2019

286/2019 Leadership Eng nge? (Hruaitu nihna)

Leadership hi eng nge ni ?

Tawi tea hrilhfiah dawn chuan "Chhan eng emaw avanga mite nuna nghawng (Influence) tha kan neih dan" hi a ni ti ila a dik awm e. Ka hmel that em vang emaw, Thu ka sawi thiam vangin emaw, ka thlarau mi vang emaw; Member ngaihsak vang te, thawhlawm pek that vang te, zai thiam vang te leh chhan eng emaw avanga mite nuna thu ka sawi phawt chuan Hruaitu tha tak ka ni tihna a ni. Chutih lai chuan ka zaithiamna avanga Hruaitu tha ka nih a, mite nunah nghawng a neih chuan Hruaitu tha ka la ni mai lo a, kawng hrang hrangah entawn tur nihna ka neih tel chauhin Hruaitu tha ka ni tihna a ni. Mite nuna nghawng tha tak a neih khan ken tel tam tak a nei ti ila a dik awm e.


 TKP ah hi chuan hruaitu tih hian Executive Committee member te hi TKP hruaitu an ni (FOD Inkaihhruaina) Chuvangin O.B ni kher lo pawhin hruaitu kan ni tihna a nih chu. Member ka nih pawhin memberpuite nuna nghawng tha leh entawntlak ka hnutchhiah phawt chuan hruaitu ka ni na. Inthlan hmanga nihna (Designation) nei kher lo pawhin hruaitu tha a nih theih a,  chu ber chu hruaitu tha nihna chu a nih zawk chang a awm thin bawk. Pawl Inthlan hmanga hruaitu nihna chuan tawp chin a nei thin si a. A hun (term) a tawp velah a nundan leh a awmphung atangin hruaitu tha a ni em tih chu thlir zawk tur a ni. Mi thenkhat chu inkuangkuahin an thu mai mai thin si a.

Hruaitute leh an hruai mipui te chu tawng sang hnih an inkarah a awm tur a ni a. Hruaitute hi an kal vut vut ang tihna lam ni lovin, Mipui ten an chimbuai lohna turin an inkarah awl a awm tur a ni tihna a nih chu. Mipui kal chak lutuk avangin hruaitute hi kan chim palh ang tih hlauhna a ni a, chu chu Bible sawi dan a ni.

Thi beh (Designation etc) avanga tih tur chin hi hruaitu tan chuan a awm a. Thi beh lote an inthlahdah deuh a nih pawhin thlan chhuah chu an inthlahdah thiang lo a ni. Thlan chhuah bik ten Tih awm tak tih loh a hlauhawm em em a, tih loh awm tak tih pawh a hlauhawm em em bawk. A thlangtu a zah rualin a thlangtute erawh hruai tum dan a nei tur a ni thung. 

Rorelna kenkawh kawngah theih tawp chhuahin, a hlawhtlinna turin hma a la ang a, a hlawhtlin loh hlauvin thu rel a veng tha bawk tur a ni. Thil sawina hun leh hmun a thliar thiam ang a, a hun takah engkim a ti thei tur a ni. Ngaihdan nghet tak a nei ang a, chu a ngaihdan chu thlak tum lo ni lovin, thlak hei turin a ngaihtuahna a hmang thin ang. A ngaihdan sawina hun erawh a tul hunah huai takin a sawi thei tur a ni. A hruai mipui te kal penpui lovin, kawhmawh bawl hek lovin, a zaizap zawngin kalpui a tum ang. Mi tam zawk duhdan chu zawh tur a ni a, zawh hma hauhvin inbah palh theihna lakah a inveng lawk tur a ni a. Huaisen takin a zawh tur a ni lawi si.

Memberte phut chhuah reng turin a awm lo ang a, Member te a phut tur a ni hek lo. A telna awm takah a tel mai ang a, a phur leh phur loh lam ai chuan memberte rilru puthmang zawng zawng hi a kutah a awm a ni tih a hre fo tur a ni.

Hmuh lawk theih loh (unforeseen) thil a lo thlen changin rilru dik leh ngil (Positive thought) nei chungin a sutkian dan tur a ngaihtuah thiam ang a. A chi-ai mai tur a ni lo a, dem tur zawn ai chuan puitu tur a zawng thiam tur a ni. Amah kha mi famkim a nih loh avangin engkim a hre vek lo a, engkim a thiam vek hek lo. Mi theihna leh thiamna hmang thiam apiangte hi mi hlawhtling an nih thin avangin, mi theihna hmang thiam a, hai chhuak thei apiang hi hruaitu hlawhtling an ni thin.

A hruai memberte hian mi fel leh fing an mamawh lo a, mi ngaichang tak chunga mi inpe leh hmahruai thei an mamawh zawk si a.

No comments:

Post a Comment