DROPDOWN MENU

22 July 2015

32/2015 She said, 'It kills'

Duhthawh taka min fawpin min liak a,
Mawi hnai taka min thehchhuah hian ka vui.
Mamawh lai chauha min hria hi ka vui,
A dang chak hian i awm leh huam huam a.

Mi zingah rimchhia ka nih phah ta a.
Mi zingah min ngai thin ka hria a,
Mala i awmin min ngaizual thin a,
Min fawh changa ner lovin min duat a.


I kamchhe tleuh nan chauh min hmang fo thin.
Thil dang nen sawhbawlah min hmang bawk thin.
Mi zahawmte zingah min zahpui a,
Zahawm loh phah nan erawh min hmang a.

Ka tel lovin i awm thei bik lo a,
I tum chuan i tithei tih ka hria a.
Rualpawlna atan min hmang fo thin a.
Rual erawh i pawl loh phah ta zawk a.

Min kalsan la i tan a tha zawk a,
Min kalsan chuan a hrehawm hle ang a,
Nang pawhin min ngai ngawih ngawih ngei ang a,
Rim hre lo tur i vannei phah ang a.

I hmui heh sen erawh ka hrereng ang.
I hmuia i chuk tuah hun a awm ang,
Thil dang tuina zun tifiahtu mai ka ni ang
Chutih hun chuan hriatreng ka ni lo ang..

Min kalsan hma poh leh i hlim ang a,
Min kalsan hma poh leh i lawm ang a,
Min kalsan hma poh leh i lawm ang a
Min kalsan hma chuan i hrisel ang a.

I tel lovin ka leng thei hian ka ring,
I tel lovin ka hlim thei hian ka ring,
I tel lovin ka nuam zawk hian ka ring,
Nang ngaih leh bansan a har hian ka ring

Man tama hralh tlak ka ni tawh lo a,
Man man taka hralh chi ka ni lo a.
Naupang hnenah chuan min hralh tawh lo la,
Naupang nun tihchhiat phah tawh lo ila.

No comments:

Post a Comment