DROPDOWN MENU

Thursday, October 22, 2015

45/2015 Expository Sermon

TAWRHNA HI PATHIAN LANFIAHNA A NI
Bible : Joba 1.1-8, 42.1-6,  38-41

Ka tawrh hi Lalpan a phal vui thei ka ni lo,
Malsawmna  dawn  chhiar  ka thiam lo,...
hlimna leh lawmna chauh ka chhiar thin,
Tawrhan leh lungngaihna zawng pawh hi.....
Malsawmna danglam a lo ni. 
Joba nihna :
Joba hi a hunlai kha chuan Pathian thu awih ber (Amah anga famkim, mi ngil, Pathian tih mi, thil tha lo laka insum thei mi tu mah an awm lo -1.1-8) leh Hausa ber a ni a (1.3). Nimahsela, tlakchhiatna in a nang a, fa mipa7 leh hmeichhe 3 chu a chan a, a neih zawng zawng  chan a, lusun khawharin a awm reng bawk a, chu mai ni lovin- Amah pawh natna hrang hrangin bawmin panchhia a bawhkhat tlat a ni


Thawklehkhatah  Joba, mi awhawm tak chu mi rethei, neih nei lo leh natna raptlak tak veiah a lo chang a, mi tih leh en dawng a lo ni ta a. Tunlai ang chu nise, HIV/AIDS emaw Hepatitis C ang te pawh hi a ni mai thei. A thian kantu te pawhin thilpek leh hnem tum lo takin an chachhuah a, a sual vangah puh a ni. Mahse a vui ngai lo a ni.

A chang chuan mi suaksualte an vannei a, mi felte an vanduai fo chu hriatthiam a har a ti a. Pathian hnenah pawh zawh duh a nei a, (Mahse, engkim titheia hnenah chuan sawi ngei ka duh a, Pathian nena ngaihtuah dun ka chak a ni - 13.3) a ti a. Lei lam malsawmna a ni tih reng a hre lo a, Van malsawmna a chan hi a la hrefiah deuh deuh dawn tih reng a hre lo. 

Joba ngaihdan dik lohzia hrilh turin Pathian chu a inpuang chhuak a, bung 38-41 kha han chhiar teh u. Joba chuan Pathian ropuina a hmuh avangin a inpuang chhuak a, a tlawmzia a sawi thei ta a ni.

Pathian leh a thiltum a pawimawh ber :
Joba pan hnaiin a bawm khat a, a nupui fanau leh a hausakna ranrual zawng zawng a chan vek hi Setana thu a ni lo a. Pathian thu leh Pathianin tawrh a phal vanga Setanan kutthlak a ni a, a mawhphurtu pawh PAthian a ni. A hraitpuina tel lovin Setana khan a tuartir ngawt thei lo a ni. Engvangin nge Joba, mi fel tak hi a tawrhtir kher kher? Pathian tum leh ruatah te hian kan tel ve lo a. Joba anga A remruat leh thil tuma tlukluh mai hi kan tih tur a ni. Engkim i ti thei tih ka hria a tih atang chiah hian I tum dal rual engmah a awm si lo a ti ta a ni. Chu a tawrha rilru Pathiana a nghah atang chuan Pathian remruat pawimawhna a lang thei awm e

Pathian leh a thil tum hi kei ni hriatfiah phak a ni lo :
 Bung 38.2 ah chuan “Tu ani nge? hriatna lova thurawn thup botu hi” ti chungin amah leh amah chu a inkawk a, Tu nge ni hre ziktluak si lo a, hriat ve phak pakhat pawh nei si lo a, Pathian laka vuia chhuah chhal ngawt ni tiin amah chu inchhirin a sawi ta a ni. Engmah hre si lo hian engtizia nge i remruat hi ka lo sawisel a, ka hriat phak lohte chu ka lo vui mai mai ni tiin Pathian ropuizia a tarlang a ni. W.Evans-a chuan “Kan Pathian hi chhuichhuah vek theih Pathian ni sem chibai buk tlak Pathian a ni lovang” a ti a. Keinin hriat fiah phak a ni lo a, a remruatna hnuaia tluk luh a, tuar a tul a nih pawhin tawrh mai hi kan tih tur a ni.

Amah hriatna rahchhuah : 
Joba rilru sakhat a tlawm a, a intukluh hnu khan “Beng hriatna mai zawngin ka hre tawh chiak mahse, tunah zawng ka hmu ta che.   chuvang tak chuan ka inten a, vut leh vaivuta thuin ka sim ta e -42.5-6” tiin a tlawm ta a. Pathian dikna remruat fel tak ringhlel angzia zanga ka lo vui a, ka lo zawt kha ka tisual der a ni a tihna a ni. Tlawm taka awmtir kha Pathian thil tum chu a lo ni - Amah Pathian chibai buk tura tuarna hmanga Joba tihtlawm kha Joban Pathian a hmuhfiahna tur leh a lanfiahna tur a aremruat a ni si.

Hman tangkaina :
Joba angin kan thil neih te kan hloh fo a, kan duh te kan nei thei lo a. A chang chuan Uniform emaw incheina avang emaw ten kan hnual a, kan inkhawm lo a, Pathian chu sawi loh nu leh pa lakah te kan vui a, kan nuar thin ti ru? Pathian thil tum hrefiah tur hian kan tawrhna te, malsawmna kan dawn te hi chhut ngun thin ila. Kan rin Pathian hi kan hrefiah telh telh dawn a ni. Pathian hi demin, i lo vui ve tawh thin em?  Lalpan a thu malsawm rawh se. 

 Expository sermon  tih chuan Joba tawrha atanga Pathian lanfiahzia sawina  a ni a, Chik taka ngaihtuah ngai a nih avangin a kim lo ang tih ka hlau hlel lo e.










No comments:

Post a Comment