DROPDOWN MENU

Tuesday, March 31, 2015

14/2015 Aizawl zin thu

                    THINGTLANG vs KHAWPUI RILRU



    “Vawiin chu luiah ka kal dawn nge ka pem dawn” tih ang maiin khua a enin a hawi vual vual ang a, Sumo Counter a bia ang a, Ticket ala awm sia “Aizawl ka zin thut teh” tih min hrilh lai chuan ka lo ngaihtuah pek a. Kum hmasa lama Pension kan thlah tak kha ka bulah chuan a lo thu a. Ani hi Damdawi dawra hmeichhe zirlai naupang te te te, an hnung lama pawm thut thin. Fiamthu avanga hmeichhe rak hlim ngaihthlak nuam ti chi a ni. A fanu ngei pawh khawdang zirlai hmuhin a hmu nge, a hmel a hmuh theih loh vang zawk a dula pawm chungin a lo chawi kang leuh leuh tawh a ni awm e.

    Pension a chak chhan ber pawh rilrua a thawh dan anga awm tawp kha a ni a. A hahdam thlak ber a ti nghe nghe a ni. Chuti ang avanga Aizawl zin tur pawh a ni reng a. District khat hruaitu nihna a nei a, Table Tennis lamah hian a phusa ber pawl a ni. District aiawh fehchhuahna a awmin a ho lo ngai lo a, a kum piah lama a zahawmna pakhat a ni.

    Nizan lamah tawngtaina a chham tel loh vang nge kan khawdai Tawngtaina hmunah chuan a tawngtai rei phian a. Km 180 chuanga thui kan chuan chhungin thingpui leh chhang bak a ei lo a, a hautak lo hle. Hautak emaw uchuak emawa nun hi a chin than loh thil a ni a. duh pawh a duh lo. Hair Oil pawh a mamawh tam lo khawp mai a, chu erawh a duhdan a ni bik lo.

    Sumo khatin mi hrang hrang kan chuang a, Gwahati kal tur sumdawng pahnih, hausak hmel taka ring cherkhawngna vuah, Pathian thuhril tleirawl pahnih, Zirlai Admission buaipui tur pahnih leh Damlo tlawha zin nen. Pu Zaia ber chu kan ngaichang zel a, a duhzawng a sawi a, kan ngaithla a. Sumdawnna leh dam loh chungchang emaw Pathian thu emaw kan sawi lo. Lehkhazir lam kan sawi lang hek lo. Hla ngaihthlak lamah kan lungrual hek lo. Kawng tluana “Aw a na, a na em mai (Daduhi)“ ngaihthlak ngawt te zawng, A na si lova beng a na hma duh em mai a ti. Inlungrualna pakhat chiah kan nei a. Chu chu Fiamthu hlimawm a ni. Hlimpui ve miah lo Nghawng cher erawh kha chu Doctor chhawnchhaihtir chi nge damlohna a nei tih ka hre lo.

    Chin lem nei lo fiamthu pawh hi a hlimpui reng theih loh a, motor engine ri kara khuavang kal lai  a awm ve thhei tho a lo ni a. Reh satliah ngawt hi khuavang kal lai a ni si lo. Mut chhuakin min zam avang chuan tarmit dum tle chi chu ka vuah a, ‘chhingmit chhing lovin chhing ru teh ang’ ka ti a. Ka mu thei lo, an ka a kal ta riau a nih pek chu. Buaipui zawng a in ang lo mang teh tak e! Driver chuan a ha sen lutuk buaipuiin, lehkhapuan chhia chuan a ha a nawt zauh zauh a, a sen tur a ni lo reng a ni. A front seat-a thu nula pahnih te chuan a sen tur sen lo buaipuiin an hmui an hnawih sen mawlh mawlh a. Ka hnung lama thu te ka leh ha sen lo lutuk leh ngaihthah lutuk erawh buaipui lo mah sela a rim chhhuah erawh buaipui ngai a ni, enkawl ve an ngai a ni. Mi dang tan malsawmna an ni lo tlat.

    Aizawl khawchhung kan lut a, kan thu tung tlang at hlawm a, mu hil rawh u tih chi kan ni tawh lo. Thlen thuai thuai kan nghakhlel a ni. Thingtlang atang chuan Aizawl hi a ropui em a. Khamkhuai hi khuai a ni a, Khamhuai hi Thlahrang a ni. Aizawl mi hausa tam tak insa kan hmu a, kham chheng chhia leh rem lo tak takin in an sa a, hlauh nachang hre miah lovin mi dangin an luah a. Pakhat chim avangin a dang a chim lo thei dawn lo tih hriat tak tak pawh ka hmu teuh. Kawngpuiah motor an tlan nguai nguai a. Mo an hruai em ni dawn le tih tur a ni. Kan khua chu nise Innei an awm ang a, mo hruai an awm a ni ang kan ti ngei ang. A nih loh pawhin Champion lawm leh a hmuaktu te an ni ngei ang. Mahse kan khuaah chuan a ri thei an hmet ri a, an au ruai ruai a, a tawpah an zai zel thin kha a ni si a. Kawngpui lah chu a han tam khawp a. Kan khuaa kawngpui pakhat paltlangtu bela in sa thin kha kan ni a. An ni chu an insak behchhanin kawngpui an lo nei zel a ni ang. Sorkar siam sak vek a nih ka ring.

    Hei hi Aizawl a ni. Mizorama chhal an la awm ta cheu bawk. Zin tam loh vang ni lovin khawdang zawng zawng aia mihring an tam vang ni hmiang ka ti. India hi thingtlang siam a ni a, Thingtlang a boral chuan India a boral ang tiin Mahatma Gandhi khan a lo sawi tawh a. Thingtlang ngaihsak loh an nih chuan Mizoram hi ngaihsak loh ang an ni ang tih ve ka chak a. Thingtlang mite hi khawpuiah tho an lo awm khawm avangin tunge khawpui mi chu le? Khawpuia an pemluh zel avangin thingtlang hi ngaihsak loh tur em ni dawn?

    National Informatics Centre, Secretariat-ah  Computer Training kan nei mek a ni. An thusawi khi ka hriathnu, ka thiam hnu vek a ni. Ka computer-ah eng nge an khawih tih an hmu thei chuang lo a. An Internet te chu ka han browse chhin a, chak pep pep tak a ni, kan khua ngaihtuah chuan. Internet a chak bawka thingtlangpa Aizawl kal hian ka blog ka han update mai mai a nih hi.. Mite pawh Aizawl vawi tam an kal a, a tam zawk phei chu kal hah ngai lovin an cheng sa reng a nia, eng nge kan khua-ah Broadband a muan em vei ni! Hnaisai lo hian. Ka update khan em mai.
Da blues Happy Birthday 18th ANNIVERSARY : 27/03/2015

No comments:

Post a Comment