DROPDOWN MENU

25 March 2015

12/2015 Lonesome Star

LOKESH SINGH

Hmuh loh hlau, hmuhfiah hlau siin!!
En ngawt chuan mizo a ni nge ni lo tih a hriat theih loh a, enga pawh chu nise a hmel a faiin, a zahawm a, a khabe hmul leh hmuihmul chawr deuh hmuh chuan pa upa lam, a dam tur zat ve aia tam a hmang tawh a ni tih a hriat hle. A hnathawhna hmun, a thuamhnaw leh a uluk dan en chuan mi namai a ni lo tih a hriat hle a ni. A tawng zung zung loh avangin a hnathawhna leh a thilsiam lai-ah chuan a ngaihtuahna a pe tih erawh ka hre thei. Amah chu Lokesh Singh a ni a, Gurhkali ka ni a ti. Gurkhali vek nupuia nei a ni. A nupui neih thu pawh kum 4 hnu-ah chauh a chhungten an hria a, an hmuh rualin an hre nghal a ni. Lungleia inbeng bel turin an lo let a.

Ka khawlpui Oil ka tlan kang avangin a khawlpui lam chu a chhia a, Piston thar nena siam that tum mah ila, a thar a nih avangin siam danglam a ngai a. Company Agent lam Mechanic ten Lathe Machine-a nuai tir turin min hrilh a, Lathe Machine pawh la hmu ngai lo chuan a awmna zawt chiangin ka pan a. Ni tina lo tlan pelh fo tawh thin dawr pakhat chu ka pan ta a nih kha. Ka tlan pelh fo dawr kha ka lut a, min lo chhawn lem lo hian a hna chu thawkin, nghak hrih turin min hrilh satliah mai a. A hmasa sa a ngai pawimawh hmasa a, a hna a chhiat dawn ai chuan Customer Care chu a dah pawimawh lem lo. Dah pawimawh turin midang kuta hlan chhawng tur mihring pawh an awm chuang lo a. Amah chauh a ni mai si a. Sumdawnna-ah chuan hmel hlim put a ngaih thin avangin a ni hi chu a hlawhchham sa ti ila a dik awm e. Mahse, hlawhtlinna a neih erawh a taihmakna leh tawpsan mai duh lova a chhunzawm zel hi a ni tih ka hre thar a. Zirtur ka ngah em avangin ka zawt a, a chanchin ziah atan ka dil a, ka ziak ta a ni. Power Supply khaihlak chhung chuan ka duh ang hriat hman loh hlauvin a nunhlui min hrilh teuh a. Ka tangkaipui hle. 

Kum 1981 khan mipa naupang kum 13 mi a nih laiin a chhungte phal lo chung chu Lakhipur atangin a tlan chhuak a, sual vang erawh a ni lo. Ram tha lehzual chakin, nunkhaw nawmna tur zawngin Shillong-ah a kal ve tawp mai a ni. Naupang tlanbo a ni lova, thiamzir tura fehchhuak pasaltha a ni. Kekawr hak tur tha a nei lova, nei turin a kal ta zawk a. Barapani UCC lama Thir Gate leh tul siama thawk turin Company hotu chu a be fel ve mai a. Kum 13 mi chu inhlawhna tur leh Training nei nghal turin a awm nghal a. Child Labour awmzia a la hre lo a, Hria pawh nise a danglam chuang lo. A hlawh pawh mite aia tlem niin, mite aia tlem  chung pawhin a dawng mumal lo erawh hrehawm a ti a. Naupang rilru ang lo takin an hotupa ber hnenah a RIGHT a CLAIM ngam a, mahse a CLAIM chhuak lo. Amah a CHHUAK ta zawk a ni.

A dikna chanvo humhalh nan a bei a, a chanvo a bo phah lawi si. A huaisenna chuan hnawhchhuah a hlawh phah a, a hlawh tur pawh a hlawh loh phah a ni. Mahse a dil tlut tlut avangin a haw-na tur khawp pawisa erawh a dil chhuak a, a thlawn ni lovin, a thawh hlawh tlemte an pek theih vang a ni. Awmna tur nei ta lo chu a awmna tur neih chhun Lakhipur lamah chuan let leh mai a rilruk a, letna kawng erawh a hre tawh lo. Jowai bulah Lakhipur chu a awm emaw tiin Motor lian hnungah a chuang a, Jowai bak an kal thlen dawn loh avangin a chhuk ve nghal a. An khua chu engtia hla nge a ni tih pawh a hre lo. Jowai Traffic point ah chuan Mut bu tlem phahin a mu a, a tuk zing khawvar ruala awmdan tur ngaihtuah chawp turin tui takin a mu thei a. Chutih lai chuan Police Duty ten an chhir tho a, a dinhmun leh awmdan te a hrilh hnu chuan an bul lawk workshop-ah chuan Manipur ho an awm a, chutah chuan riak ve mai turin an tir liam ta a ni. Chuti lo zawng, a hma kar lawkin intualvuakna a lo thleng tawh si a. Chu naupang chu an lainat avang leh duhsakna avangin zan riahna an dil tir a ni.

Manipur hnathawk ho pawhin an lo khawngaih a, chuti anga thiam thil zir duh nafam chu an zirtir a, kum 4 chuang a zir tawh hnu chuan Aizawlah lo chhovin, A u mipa, Coat thuia inhlawh chu a bel ta a ni. Kum khat dawn thawh tur nei lova a awm hnu-ah chuan Lunglei pa pakhat hian inhlawhna tur, Lead Machine Dawr enkawltu a zawn thu leh thawk nghal turin a sawm a. Pawisa Sang chuang ADVANCE a a pek theih avang chuan Lunglei awmna zawng chawpin a lo phei ta a ni. Chu chu Kum 1986 kha a ni. Chu dawrah chuan ka awm mek a, tawng pai leh tham chhalh chungin a chanchin chu min hrilh mawlh mawlh a, a tiphur tur a , “Um, E, a ni maw” tih bakin ka tibuai phal lo a ni.

Chu dawr hming chu 'Lone Star Motor' a ni. Dawr ropui leh thianghlim a ni lo, Oil rim leh Khawlah pawh, India at laia siam ni awm tak thir tlang, rih hmel fu fu inhung chu a ni mai. Bang leh a remchang apiang chu Oil hian a mawm a, a dum vek tih theih a ni. Hmuh rual rualin Shillong veng keltila workshop mitthla nghal theih ang hian a awm a. A neitu chu Pu Vanzama ni ta-in ka hria, Kum 11 kal ta khan Aizawlah remchanna avangin an pem a, chu dawr engkim chu Pu Lokesh-a kutah chuan an dah vek a. Lei chhawn a tum leh tum loh te, mahni puala Dawr siam a tum chhin tawh em tih te ka zawt a. A chhanna mawl te chu tum lo, lei chhawnah dilin emaw mahni pualin Dawr lo siam ta pawh ni ila ka pu te hian engtin nge hlawkna an neih ang a, tunge an sumdawnna hi enkawlsak ta ang, keimah anga rintlak tur an hmu dawn em ni tiin min chhang a. Ka mamawh laia min khai chhuak a, min hriat hmaa min ringtu a ni a, hetia ka enkawl sak hian kan hlim tlang a, kan lawm a, thildang kan mamawh lo tiin min la chhang thei nia.

Kum 30 chuang he eizawnna hi i thawk tawh a, i ning ve thin em? Eizawnna dang dap emaw hahdam taka awm te hi i tum chhin tawh em tih zawhna mawlmang tak chu; Thiam thil dang ka nei lo a, Hnathawk tura siam mihringte hian kan chawlhsan daih chuan hlimna kan nei let thei lo tiin min chhang a. A kristian hle a ni. Kristian erawh a nih ka ring lo.  A theihna milin a thawk mai a, a hmanhmawh vut vut lo a, a chawl ngai lo  a nih erawh ka ring thung. A fate thlazar hnuaiah hnathawk lo pawhin a awm ve thei tawh ngei awm si a. Hlawhfa dang lak belh emaw midang rawih chhawn pawh a tum chuang lo a, Lone Star Motor a ni tlat a. 

Charles Mackay khan Dee luikam, chhangphut hertu nun a sawi khan 'Tuman min awt lo a, tumah ka awt hek lo' tih hla sa chungin lungawi tak khan a chhangphut her kha hahtak chungin a au chhuahtir a. Lalber awh hial nun erawh a lo nei a nih kha. Chuti ang chiah chuan Ekpaihin in felfai taka a phiah hian a zahawm a. Ek rim chu chhe hle mahsela Taima taka hnathawktu chu a zahawm an ti em ni kha? Lungawi zel ching a, nun dan ka lo thiam ta tih fak hla sathiam kher lo, nunpui thin te hian min hneh fo thin. Pu Singha pawh hi mi tam takin kum tam kal tawh atang khan an pan tawh thin a, kei anga buaipui teh hurh phawh hi a la hmu bik lo a ni.

He lungawina a neih ka hmuh hian ka awt a, ka rilru no tak hi a hneh a ni. A tawngkam takin "Lunglei Minister, MLA, Parlamentary Secretary te hi an tlangval laiin an Bullet Bike leh an motor siam ngaih khan ka siampui thin a, kan inhre ve lutuk alawm. Dil ila chuan min la hria ang a, an zarah ka fate College kal zo tawh te pawhin eizawnna tha zawk hmuhsakin an chawm thei tawh ngei ang. Mahse, min la hria nge min hre tawh lo tih ka hre lo a, min la hriat chu ka ring ve" a ti.

(Ni 20.5.2015 hian a chanchin hi ziahah ka dil a, ka ziak ta a ni. Mahni dikna chanvo haichhuak ngam naupang kum 13 mi, chhungte phal lo chunga mahni thu-a kalchhuak Mizo zingah hian kan tam lo viau ang.)

No comments:

Post a Comment