DROPDOWN MENU

Wednesday, March 25, 2015

13/2015 Most welcome Cheque

           KA LAWMZIA HI

     Ka tuina zawng a nih vangin lehkha zir ni lo, lehkha chhiar hi nuam ka ti a, ka ngaihtuahna awm ang ang ziah chhuah te hi ka atna pakhat, fing anga ka inngaihna kawng awm chhun a ni a. Kei aia thiam, fing leh fel hian thu sang tel, a nuai bi leh chhiarsen loh an lo ziak tawh a. Thu tha tak tak leh chhawrnahawm tak, kan tu leh fa te tana rohlu, ram tana hmasawnna khawp hiala tha te an lo ziak tawh a. Vanram chahbi atana hman theih tur khawpa tha; Chhandamna kawng te an lo ziak tawh a. Hrehhmun atanga chhanchhuahna thu leh vanram thlenna hial khawpa thu tha te pawh an lo ziak tawh bawk a ni. An la ziak zel ang. Chung zinga tam tak chu a thu chhiar vek theih a ni lo a, a bu chhiar sen lah a ni hek lo.

    Chuti angin mite tluka thu ropui leh hlu ziak ve kher lo mah ila, ka nun nena inzawm hi chu ziaka dahthatna pakhatah ngaiin ennawn pawh awm lo hian ka ziak ve mai thin a. Ka hmana ka tui ta thut a nih chuan ka ennawn leh thin. Mite fuihna leh zirtirna, tehkhin thu ka hlawkpui em em te leh lehlin ngai thutawi te pawh miten chhiar se ka tih avangin ka ziak ve thin a. Ka chhiar ka chhiar a, tha ka ti hle thin a ni. Mite ngaihdan erawh ka hre lo. Mahni nun phawrh fai kelh a ka awm chang hian ka thawl huai a, ka vei leh ngaimawh ka ziah te hian ka hahdam suai suai thin. Kawngro a su em tih phei chu ka hre law.  Ka nun ka zir a, mite nun ka zir a, ka ka hmuhchhuah leh ka hriat thar fo hi chu mite thlirna lo anga ka thlir thiam chauh hian a ni.

    Naupan lai atanga lehkhapuan pawhthlak hmanga chanchinbu lema chanchinbu lo chhuah ve tawh thin ka ni a. Zirtirtupa Carbonpaper chhia pahnih thum hmanga lehkhabu phek pawh thlak rin a,  column fel tak nena chanchinbu chhuah fiam thin kan ni. Copy nga kutziaka chhuah peih kha chu hahthlak tak a ni. Chu chanchinbu chu mi ten eng angin nge an hlut tih kan hre lo a, mahse keini thianza ho kha chuan kan hlut a ni. Zingah kan sem a, a tuk zingah kan lakhawm leha mi dang inah kan sem leh a. An chhiar emaw chhiar lo emaw nikhat bak hun kan pe lo. Kan hlut em a, theh thang leh dah that atana kawl mai mai kha kan phal lo a ni. Chanchinbu lem kan ti tak na-in Chanchinbu nihphung ka han zir hian Chanchinbu lem a nihna a lo awm chuang reng reng lo tih tun hnu hian ka hrechhuak chauh nia!


    Ka tuina avangin thu ka ziak ve thin a, ka zirna avang chu a ni lo a, ka thiam vang a ni hek lo. Chumi tur chuan ka chhiarzau vang emaw rawn tur lehkhabu ka neih that vang emaw a ni lo. Nuam ka tih em avang a ni. Mite chhiar loh tur atana thup erawh ka phal ngai lo a, khawvel pumpuiin, khawi hmun atang pawha an chhiar theih tur (an chhiar thiam a nih phawt chuan) Internet lamah ka dah thin a. Chumi thangkhawk atang chuan Lehkhabu hial ka lo khawrpum ve tawh nia! A awihawm loh zawk ka ti thin.  Sumdawnna rilru emaw, thang that lak tum vang emaw, inthehlar duh vang emaw chuan ka la ziak chhin ngai lo. Ka tuina tuihal tak tihreh nan ka ziak mai a ni.Siamthat duhna rilru pu chunga ziah phei chu nuam tak a ni a, sawiselna leh elrel, deuhsawhna chungchang erawh ziak chi ka ni lova, ka na ngawih ngawih zel tih ka hre si a.

    Ka peih em avangin mi chhiar tur ngaihven zawng ka ziak ve thin a, thuziak tura sawmna pawh ka hmu ve bawk thin. Ka ropui vang emaw, ka thiam vang emaw erawh a ni lo. Ka thuziak an chhiar a ni tih hriat a, Email, Phone, thuziak leh tawngka ngeia min chhutzui chang hian ka hlim ru veng veng thin a. Thuziak mai chhiar lova min chansak (lemchan) phei chuan ka hlim a, thuhla hmanga min zai/sak chhuahsak phei chuan Pathian hnenah lawmthu ka sawi thin.

    Thuziah man a awm lo a, ziah chhuah hian man a nei lo bawk a. Thuziak chhuah tur pawhin man a neih loh chang a awm a, thuziak chhuahtir man a awm chang pawh a awm. Thuziak tura min sawm changin man a nei a, a changin lawmthu sawina a awm bawk thin. Mahse tun tum chu ka thil ziah ho ve tak mai chu a ziak angin min leisak ve nia!!! All India Radio Lunglei chuan ka lemchan ziah avangin Pawisa Rs 4000/- lai min pe nia. Ka Lehkhabu hralhna man kha chu lehkhabu man a ni a, thil dang man a ni a. Thuziah man a ni si lo a. Ka thlabi hlawhlak hmasak ber ai pawhin ka hlim zawk nia! Chhiar thei lo te tan pawha ngaihthlak a, hmuhtheih tura ka thuziak hlut a nih ve avangin.

No comments:

Post a Comment