DROPDOWN MENU

16 November 2015

48/2015 VULMAWI LEH TLAIZAWNG PAR

Photo Credit : Hmangaihi Khenglawt
(http://www.viewphotos.org/india/images.php?Saiha&id=2220)
TLAIZAWNG LEH TLEI ZAWNG

Ka office kal tur hi Tlawng hnar kanin ni tin ka tlan tlang ziah thin a, Tlawng ruam ka thlen hi chuan a lo vawt suka ngaihtuahna thar ka pu nghal chawp chilh thin. Khawvel hi a thianghlim bik ni hian ka hre tlat . Chu Tlawng luikam tawn tawnah chuan Tlaizawng, mawina tinrenga thuam, van rawng kai leh vanrimnam chek hian a lo par vul thin a, hnahhlui an tila, a tlakawlh  satliah mai emaw tih tura a ding fi thulh lai pawh khan a mawi thin a nia.


 A par rawng hi a thianghlim bika, ni sensate lai hian a mawi chuang bike mw tih tur khawpin a thianghlima, Dai leh vurin a bawh lai, ni reng reng a lan loh lai hlei hlei hi inhmeh zawk emaw tih tur a ni bawk. A par hi thliaha kkhawi mawi chawp chi a ni ve lo a, a awm awma a awm hian a mawi ber fo thin. Chuti ang ngawta a mawina piah lamah chuan thinlunga cham veng veng tur rilru hnutchhiah thei pangpar a nih avang hian ka tan chuan a hlu lehzual a. Pangpar ka’n tingawt, thingpar a ni zawk tak e. A  par melh lo hian ka awm thei thin lo. Lunglen a kai thova, suangtuahn thar put a awlin, hlim veng vengna kan nei a, ngaih hi  tha hliah hliah thin.

Tlaizawng hi a par chuan thlasik a intan tawh a. A par hmuh rual hian mit a tlai a, ngaihzawng te kan hmuha kan tlei thin ang leh, riltam tawngkhawng laia puarna tur chaw tha, tlaipuarna tur hmu ang mai hian ngaih a tha a, hah a dam a ni. Tleirawl hmuh a, kan mize duhzawng tak, harh vang tak bula awm ang mai hian kan tlei fo thin.

Tlaizawng hmuh leh tleirawl hmuh hi chu a nuamin  a hlimawm a ni, tlaizawng zawn leh tleirawl zawn phei chu a nuam leh zual, Tleirawl laia "Kumhlui thlah zan chu i tlaivar dawn em tih hunah kha chuan a hlutna hi kan lo la hre tawk lo  a ni!" Tunah zawng Pathian thilsiam engkim hi a mawi danglam leh ta. A hun leh hmun a zirin, sikni engah hi chuan a mawi vek mai a ni.

Syllabic verse (Tlar khata hlathu lam 9 zel awm) Tlaizawng par Vankhama hian tlaizawng par chu a  dah chungchung hle a, tleirawl  hmeltha ang maia duhawm ni a, a ngai ang hian a duhawmna a hril hle a. A vul vanglaia  Vulmawi tih inhmehzia leh, tleirawl hmeltha thinlung thianghlim rilru nena inmilzia hi ka ngaihtuah fo thin.

Vulmawi, I lenlai a tawi lua e,
Tanchhawn ang thle nghial virthlilengan;
Chung thla puan ang a lo thar ang a,
Vulmawite uaiin a lo til ang;
I pam em! Chul leh uai mai turan,
Tharin kumsulah lo vul leh la,
Aw, engah mawi tin thang dang zawng pawh
Chul leh uai mai tura khuanun a siam le!

* Mi, tu emaw kan hriatchhuah pek chu le :-)

No comments:

Post a Comment