PATHIAN THU LEH TAKSA ZIAH RAN
"You shall not make any tattoos in your body,
nor print any marks
because…"
Leviticus
bung 17.25 ah chuan Taksaa Chhinchhiahna reng reng dah hi Pathianin A phal
lova. Hei hi Bible zir mi (Theologian) ka nih loh avangin sawi tam tur ka hre
lova, ka hriat chhun erawh Mathew Henry-a chhuizauna (commentary) behchhanin
Tattoo chungchang hi sawi ila. Pathianin Mihring te in chhuanna leh thlahtu bul
chhuanna (myth) a phal lohna avanga ziah niin ka ngai a. Tin, tunlai hunah a
tangkai tawh lo tih ni thin mah sela rilru lam insiamthatna tura thupek (Moral
Commandments) a nih avangin a dikin, tun hun atan pawh hian a pangngai reng a
ni. (In ngaihdan ka hre lo.)
Zir mite
(Theologian) chuan he Bung hi Israel te tan chauh a ziak ni lovin Thupek Sawm
(Dan sawm pek) belh chhahna tiin an sawi bawk thin. Pathianin "Kei hi
thuthlung thar chu ka ni" a tih avangin Kan hun hman mekah pawh hian ala
dik awm e. Engpawh ni sela, Zir mi nih loh chuan Pathian thu luh chilh thuk
lutuk hi kalsualna bul anih avangin a Bible thu hrilhfiahna aiin a behbawmah
hian hun hmang tam zawk ila a tha awm e.
Hnamdang ten
an tuarna, thinrimna leh lusunna lan chhuah tir nan an taksa an zai thi a, an
sam leh hmui hmul an met kawng a, mihring taka an tuarna hi langsar taka lan
chhuah tir an duh thin. Kan ngaihtuah atana ka duh ber chu mahni taksa in
sawisak/ in tihhrehawm te leh chhinchhiahna siam te, lan sarh duhna avanga
mihring mihrinna hmachhuan hi kan Pathian thu nen a inkalh tlat a ni. Chuvangin
Thalai te, Kohhran ho te hian kan Hausakna, Thiamna, Pianzia leh hmelthatna
engmah hi chhuang thei kan ni lo. Inngaitlawmte chawimawia an awm a, thuhnuai
rawlh ten hnehna an chan hun tur chu keimahni kan inchhinchhiah hun nilovin,
nunna bu a kan hming chhichhiah anih hun tur a ni zawk.
Tunlai
Celebrities/ World Cup Players langsar te leh mi chungchuang bik te hi bihchiang ila Tattoo nei lo chu kut
zung leka chhiar tham lek an ni. TV reality show a langsar te, TV channel ah te
pawh eizawnna a an hman dan te kan hmu fo. Hmuh hi I duh tawk ang u. Mizo
zingah Tattoo nei thin te chu Jail tang te, Jail tang chhuak tawh, sipai leh
Drug Addict te zingah a hluar hle thin kha a ni ngai a. Piangthar pawh nise an
taksa-ah ser nung an pai reng tawh avangin thil mawi tak chu a ni lo phawt.
Tlem lai deuh khan Shillong-a Zirlai te zingah hmeichhe ngum, hnute bul,
kawngbawr leh kut zunga Tattoo siam kha a hluar hle a, changkang viau turah an
ngai nge? Langsar lo taka an mize pho lang an duh zawk tiin ka ngaihtuah a,
intihhmuh vanga chingchhuak an ni mai awm e.
Tattoo maksak leh dangdai tak nei thin te nun chu a da hlau hmel lo maw?
Tattoo ziak/
nei tam te hi I enchian chuan a rap awm zia leh
ramhuai thil (setanic) anih zia I ngaihruat thei ang. Leplerh rilru
avanga nasa lutuk si lo a; an ziah te hi taksa hmuh theih loh laiah an ziak
ngai lova, Hmuhtheih chang chang a ziakin Ban bul, Kutzung tang, Ngum, Tai leh
Serh chunga ziah te hi an ching zual a ni. I Love You tih te, Phengphehlep lem
te, Scorpion lem te, Ruhro (Skeleton) lem te pawh nise a mawi chuang lova,
Fashion a ni lo tih hi kan tleirawl te zingah hian zirtir kan ngai a ni.
Ngaihsan tur
ngaisanga, chhinchhiah tur te chhinchhiah thiam tura inzirtir a ngai a, kan
rilru lanchhuahna chu kan incheina leh awm danah anih avangin nun hi fimkhur a
ngai hle. Engkim hi a ngaizam tu tan chuan ngaihzam mai theih a ni a,
ngaihventu tan chuan harsatna tling tur khawpa lian tham a ni si a. Tattoo rang
riai ruai nei thu awih tak an awm lo a tih ngam hial awm e. Thuawih loh vang
leh lerhkawh vanga nei hi mizo te zingah a tam zawk kan nih a rinawm.
Kohhran hian
hetiang lam ziritrna te hi kan sawi fo a ngai ta. Kohhran pakhat chuan Pastor
lak tur/ Theology zir tur te zingah Tattoo nei chu lak loh nise tiin an rel a,
hei hi Mizo Kristian te zingah langsar taka kan duh lohna lantir hmasa ber a ni
awm e. A ni, Pathian thu-in a phal lo miau alawm. Kan tleirawl/rawlthar te nun
tlakchhiatna pakhat veng tur chuan tattoo nei lo tura inzirtir hi a ngai tawh
asin. Tattoo mawi an tih a, Emo rawngkai an ngaihven viau chuan an nun a da
hlau tan a, kaihhruai an ngaih hun lai tak a ni.
Sual a
lanchhuah tak tak hmaa hmeh bo loh chu a langsarin, harsatna a nasa telh telh
thin a nih hi. Tunlai-ah chuan A huho a awm hian pawi sak a tlem thin a, engkim
a tha lo zawnga in share te a awlsam thin avangin Jail leh hmun dangah hriau in
hmantawm a, tattoo siam te kan ching fo. Hei hi natna tha lo inkaichhawn nan
pawn a hlauhawm (Risk) tho a, rilru a siam khaw lo fo thin.
Chhum thiang
hlim loh hriau inhman tawm hlauhawm zia AIDS veina kawng khat anih zia kan hria
a, chumi piah lamah Taksa a thisen hi rei tak a ti bawlhhlawhin; thisen zam a
hnawh phui thei bawk. Mizo ten In tring chawh sawm tui hmanga taksa vih chik
nuaih kha Tattoo siam dan kan hriat hmasak pawl a ni awm e. kan changkang leh
deuh a Battery chhung dum chawh tui chu hriau hmangin taksa-ah an ziak thin a
ni. Kan changkang zel a, khawl hmanga ziak pawh kan awm ta. Tattoo siamna khawl
a awlsam hunah phei chuan Mizo sawm awmna ah Tattoo nei Sawm panga kan awm palh
ang tih a hlauhawm hle. Nun zahawm tak leh Kristian nun dan tur ni awm renga
kan invawn thianghlim a hun tak zet ta.
#"Ye shall not make any cuttings in your flesh for the dead,
nor print any marks upon you:.."
## 2009 kuma Thalai Aw Evangelical weekly-a ka ziah ka han dah tha leh hrih a ni e.
No comments:
Post a Comment