DAYLIGHT SAVINGS
Chief Minister chu ni ila kan sona hman lai zawng zawng hi darkar hniha herh hma turin tan ka la hmasa ber ang. NGO leh Kohhran pawl hrang hrang leh Media-te pawh duh lohna kawngzawh leh sawisel lo law law turin thuchhuah ka siam nghal bawk ang. Society kalphung hi a inthlakthleng hlawk dawn avangin mi tin inpuahchah tura zirtirna (Education-Awareness) erawh awmze nei taka kalpui tur leh kengkawh nghal turin ruahmanna ka siam dawn si a. Darkar hniha a hma phawt chuan tuna zing dar 7-ah office hna kan thawk tan ang a, tho tlai an awm lo ang. Mizoramah chuan office mil hian hnadang hi chu an insiamrem ve nghal thuai zel a, kan economy innghahna an la ni tlat a. Tlai lam hun thawla infiam leh hnathawh kan uar ang a, awm awl avanga natna neih a tlem ang a. Tawngkam leh Zun chauh a thlum tawh lo vang. Ke-a kalna hun a tam ang a, lirthei tel lova hun hman kan thiam tual tual bawk ang. Chu chu hriselna rahbi khatna atana chhiar tur a ni.
Sikul tan hma tur tih thupek a awm hma leh, Aizawl Traffic Jam heti taka kan vei hma khan ka lo vei ve tawh a. A theih phei chuan Separate time zone nei thei tura North East India thuneitute tan rual a ngaihzia pawh ka lo ziak ve tawh bawk. Phaia zin nikhua leh hnathawh chhungin Mizoram lama chhungte biak tuma hun thawl lai ka nghah apiang hian an lo mu tawh ziah zel nia. Hmasawn nasa leh hnathawk tam an nih tlat vangin khaw eng hi a pawimawh zual a ni. Vawi leh khata ei tawk a kiam ang a, riltam taka awm a bo tawh ang. Dul awrh an tlem ngei ngei ang a, kiar lo tura inven kan uar tawh bawk ang. Chutih hunah chuan Mitthi turin “Van kai chaw a ei” tih hi kan ngai thutak lutuk lo ang a, he tawngkam pawh hi hrilhfiah a ngai tam tual tual ang.
Josua ni chelhdin tangkai zia leh ramlak a tulzia Bible-a kan hmuh ang hian ni khat kan hman dan hi a pawimawh rualin hmang daihzai tura inzirtirna leh ruahmanna siam hi tihmakmawh a ni a. Lal, thuneitu leh Chhungkua ten ruahmanna tha an siam a, an kenkawh chuan hma kan sawn thei ang. Hna thawh tur a awm phawt hnua thawk tur ni lovin, thawh tur zawng thiam zawk tura kan inzirtirna tha tak a ni dawn bawk a. Mizoram, Sorkar leh thuneitute dan - Policy, programme siam a hlawhtlin loh fo chhan chu kaihhruaina mila thawk tura an siam thin vang a ni a. Hna thawh tam dan azira hlawhtling tura duan awm zawk tak hi a ni ngai a.
Kohhran leh Pawl hmalakna tel lo chuan sorkar ruahmanna hi a hlawhtling mawh khawp mai. Kohhran hi mipui hnimhnai leh zirtirna tha pe theitu a nih avangin a tangkai hle tih kan hria a. Tunah pawh ram leh khawtlang thatna turin hma an la a, hun chep tak karah an kalpui hram hram a ni. Zan lam hi an hman tangkai avangin inzirtirna hun tha a ni a, chhun eng kan hlep dawn avangin zan lama hun chep taka kalpui an duh tawh dawn lo a, hun thawl a tam dawn a ni. Ram leh khawtlang hmasawnna tura thawk tam ber leh awmze nei ber chu Kohhran leh a pengte, tlawmngai pawlte hi an ni a, hman thiam an ngai a ni.
Tun dinhmunah chuan mi nawlpui tan zing kara thawh tur awm tak tak mang si lo, chhun lam hna thawh hmat ngai bawk si lo a ni a. Office kal thin tan pawh Dar kua bituk hi dar sawm emaw dar sawm pakhat emaw a nih avangin chawlai khai a har ang chiahin office hnathawh dan tawk thiam a ngai a ni. Tlai lamah ban tlai hreh si, ban hma dawna dik chiah bawk si lo kan ni ta. Zan lamah khua a thim dek deka inkhawma kal nghal tur emaw titlat hruaitu kan la ngah bawk si a. Kan hun hi a daihzai lo a ni.
Kohhran leh khawtlang programme tam lutuk hi ei leh bar hmasawnna ngaihtuahin a tha lo hle a. Chu aia pawi ta zawk chu kan khawtlang, khawlai nun leh chhungkaw nunin a chhiatphah ta hi kan tuar a ni. Ram leh Hnam a boral hma hian Chhungkuaa hun hmang tam tur leh hna thawk tam tur chuan a bul kan tan that hi a ngai hle. Amaherawhchu, ei leh bar hmasawnna duh vang ngawta programme tihtlem emaw, vantlang hun sawn hma emaw, hun sawn tlai emaw a nih chuan sum duhna, milem biakna-ah kan lut ngei ang. Chuvangin, Chhun lama hun kan hman dan hian zan lam a hril thui hle a. Zan hun thawl leh hahdamna hun a awm hian chhungkaw nuam a siam thei a, chhungkaw kehchhia, kehdarh veng tura tan lakna tha tak a ni.
No comments:
Post a Comment