OPEN LETTER TO THE PRESIDENT
KAN KHAW VILLAGE COUNCIL
Ka pu, tling lo tak chungin khawtlang tan tiin VC Football Team chu HPC CUP-2016 chhung atan kan enkawl ve a. Sir, ti ten min ko ve a, kan pangngai ve hmel lutuk.! Hemi chungchangah hian kan kal leh zelna tur atana thil tha zawk leh ka hmuh dante ka han hrilh duh che a, i thawhpuite leh Sporting club, Games and sports association hruaitute pawh min lo hrilhsak turin ka ngen a che. Hun lo la awmzel tur atana hmalak dan leh ngaihdan insiam thiam theih nan.
Sum leh pai, thiamna leh theihna-ah chuan engmah kan ni lo a, hmelah leh chhungkw khawsak chungchangah pawh eng mah kan ni hek lo; a tlangpuia lakin. Kan hmelah tal mi an la beidawng lova a lawmawm hle a. Hmelchhiat avanga inawkhlum kan la awm lote hi lawm tur kan ni tih pawh ka hre thar hle a. Sen tet atanga taima tura zirtirna kan dawng lo hi a pawi ta ber a ni.
Tu mah lah dem theih kan ni si lova, dem tur zawng talh dawn ta ila chu Game and sports hruaitute hi Juda Isakriot-a fawh thianghlim hmangin ka kawhhmuh mai thei che u a ni. Players phurna nei hawt lo hmalakpui an tum a, rorelna bak hmalakna an nei lawi si a ni. Hmalakpui an tum tihlemah mi kuta rulkaw zen tum an tih ang type hi a ni ang em aw tiin kei thu leh hla thiam tampui lo hian ka swifiah ve mai mai a ni. Hruaitute Committee avanga hetianga HPC cup-a chhuak ve thei mai niin kan hria a, a lwmawm hle. Chhuah ve hrim hrim hi changkanna emaw hmasawnna a ni emaw an ti a nih chuan a tha e. Engah nge chhuak ve hrim hrim nih duh chuan ka nu te, Pu Rana, Pahlu-a te ho hi kan sawmkhawm zawk loh le!. Ani ni hian khel ta zawk se, kan khawtlang future a bright fe zawkin ka ring thin a ni. A chhan chu an tu leh faten hna kan thawk ang a; hma kan sawn ang, Anni’n hlawkna awm miah lovah football khelin an lo intihlim thei zawk ang a, keinin ei tur kan ngaihtuah thei ang chu. Tar chak lo te tanpui leh hlimna tur ngaihtuah chu changkanna niin, a Pathian thu hle a ni.
Hnathawh a!? Players te hian chhuanlamah chiah tui takin hna an thawk thei a, chu pawh anmahni tan a ni. Tunlai thiamna Computer Game hmangin HPC hi khelh tur nise an bih ngur ngur ang a, an eu vual vual anga; chuti zawng chu a ni awm e. Inchei ang zawnga khelh tur nise Hair Gel leh Powder chu an heh ve khawp ang le. Champion tur phei chuan Powder sakhal tak pawh an mamawh ang. Football chu tharum leh thiamna hmanga khelh tur a nih avangin insawithiam ngawt theih a ni lo a, a sawiah chuan an thiam khawp mai. Dawrte leh puipunna hmunah chuan champion ang hrimin an sawi ngaihnawm a. Chu lah chu thawnthu phuah chawp mai a ni si a.
Kapu, khawtlang sum leh pai tiheka football kan khelh avang hian kan inthiam lo hle a. Kan ka’n ti tak na’ang a, an ni ve hauh awm lo e. Khawtlang hmangaihtu tan chuan OUTLAW ah min puang se, min khaihlum ta sela, zahawm takin kan awm thei ve mahna! Chu pawh chu Cowboy hunlai a ni tawh si lo a, zahawm chu sawi loh khawngaihthlak an ti tawh zawk ang. Sum leh pai tam tak kan hmanral takte hmang khan Baibing Link road hi min lo laih chhunzawmsak ta zawk la, khawtlang chuan kan chhawrzui khawp ang. Tunah pawh kan zinga mi thenkhat hi chuan an chhawr tawh mek a ni.Kan players te zingah pawh chhawr tur hi chiang takin an awmin ka ring.
Tun tuma mi 30 vel Games & Sports Assn hruaituten an lo thlanchhuahah hian mi 20 chu chhan loh aiah kan awm hram hram e. Mi 20 aia tlem hming pekluh chuan football khelh theih hek loh. A naupang zual panga paruk te hi chu mi tha tak an ni. Lehkha an zir hlawhtling ang a, an hlawhtling lo a nih pawhin ek paih leh meihawl rawh pawhin chhungkua chawm sela, an hlawhtling tho ang. A upa pali nga, zirna bei mek te leh zo tawh te pawh hi Chhungkaw innghahna an la ni ngei dawn a, an ni lo a nih pawhin khawtlang tan mi hnawksak an ni ngai lo ang tih ka tiam ngam a che. An ni ang hi chu buaipui tlak an ni a, thiamna aia thawhrimna ngaisangtute an nih avangin, hemi avang chauh a, la inhamtanga hmingchhiat ngam ka la ni. Kan sawi ve tak loh aia tam zawk hi chu Smartphone humin eng nge an khawih tih hriat theih loh khawpin an thup thiam khawp mai. Buaina Ralliana, Tluan Tlinglova, Kuangkuaha leh Langmawia te thianza ang maiin an tel lova khelh theih a nih loh vang te in kan inlungrual a. Lunglei kan kal a, chow leh sanpio rim an hriat ngawt atang pawhin zirtur kan ngah nghal hle. Uniform/Jersey hakkim ngawt hi inhnemna atan kan hmang thei ta lo a ni. Hmabak eng tak an neih hi incheina atan chauh an hmang ta zuar mai a nih hi, mawi rei thei tak ang maw?
Mi ti tak tak pang vel hmalam hun tur ka ngaihtuah chuan ka khawngaih a, Zobawk hi an tan chun Football Thlanmual a lo ni dawn tawh si a. Anni lah khawtlang innghahna ni turin an la tuai deuh a ni. Lehkha tal an zir tha a, beiseiawm alawm le ka ti mai. Sunday skul pawh kai lo, Kohhran pawh bel lo, chhun riltama belruak leh baibel chauh bel thin zinga khawsak chu A MAK A NI. Chhuahi dawr bel tlat, Luaia sipai Uniform hlui chang an la tam em a ni, chu pawh rawngrut chauh a la ni leh ta nghal. An Coach leh Manager atana min ruat te hlei hlei hi a manganthlak asin.! Thiam lo chunga zirtir tumin zirtir tur kan nei lo a, chhungkaw tul an nei a, kan hrethiam a, mimal tul an ngah thar ta riau a, hriatthiam har thin tak a ni. Kan rawt nawn leh teh ang, tun dinhmuna footballa sum sen ai chuan Baibing Link Road laih chu a inawm riau a nih chu, thil pakhat rukin kan hrilh ang che, VOTE chu an nei ve tawh.
Kan mualpho lehna turin khelh hnih kan la bak a, engtin nge kan awm dawn tih Coach leh Manager ten kan sawi a, ngaihdan kan thiam lo a ni. Zadeng tlawm tur ang maiin zanin chauh chu inhmuhkhawm leh a, thu tawp sawi kan tum e. Lal Isua hmaah bak thingthi ngai lo hi ding chungin kan thingthi leh ang e. Chutah chuan beiseina min pe lo a nih chuan an kumkhaw chawr lohna turin Football atan hian sum seng duh tawh suh u. Mahse, hmanak eng tak tak nei, lehkhazir leh inkhelh nuam ti tlatte hmakhua ka thlir hian tun tumah hian khel lo ta ngawt il, min hrem ang a, an hmalam hun a chhe vek ang tih ka hlau ber mai.
Hmanah thingfak pu chunga Uniform kan tuak lai khan kan lungrual a, kan nunkhua a hlim a ni. Harsa takin thuichawp kawr, FORM kan tih ngei kha kan tuak a, MLA leh VC tihbuai kan tum ve ngai lo. Khatih laia Form lo paipawna, eng emaw nikhuaa lo hachhuak thin kha kan rilru a na thei hle. Mahse tun thleng hian society ah an tlak tlum phah ka hre chuang lo. Sipaitlang leh Pu Ranga in kawt kha kan field a ni mai a. Pu Faka feh thu kan hriat chuan Private sikulah ngei duhthusamin kan khel thei a nih kha. Kan intodelh thin a, buaipui kan ngai ve lo. Nilenga inkhelh kan tum kha kan harsatna a ni a. Ruahsur leh nisa ten awmzia an neih ve loh avangin harsatna kan tawk nasa hle a, chu chu kan chhungten min ngaihtuah lutuk kha a ni. Kan seilian a, Champion team nih nawmzia chu Pu Laltluanga hmuh chakin kan haw thuai thuai thin. Chak loh truma result min lo zawt ve ziah a, chak lo reng nih chu zah nachang kan hria a ni. Min fuihtu tha tak a ni si a. Tunah zawng a thlemin kan thlem a, bawkkhhupin chibai kan buk lo chauh a ni ta!!!
Ka hming pawh ka ziak mualpho peih lo.
No comments:
Post a Comment