TANPUI TLAK LOH A AWM THEIH EM?
(Hman lutuk kutziah mai mai a ni e)
Aizawl veng pakhat, veng keltil ve takah chuan naupang ngaihsak vak lo pakhat hi a awm a. Fahrah leh fa lak a ni tih pawh inhre miah lovin hun a hmang a. Inchhungkhur nuam leh hlimawma chen chuan nun hi a ralmuang a, nun hi a hlu bik thin. Mahse, Pa ber ro relna aia nu duhthlanna a len zawk hi chuan changrel a sual fo thin. Chutiang kara tleirawl nun a hmang tan, zirna leh khawtlang nunzia pawh hre eih lo chu ruihhlo zunah uaiin, a ke pen a pelhsawh a. Insiam thatna hun pawh awm hman eih lovin sawn a pai ta tlat thung. Zirtirna mumal dawng ngai lo fa tan chuan mitmei ven a na duh khawp ang. A fa pawh chu a nau anga enkawl chhoh a ni a. A nu leh pa hming pawh chhawm lovin unau bawlin an enkawl tlei ve mek a ni.
Chutih lai chuan Joan-i chuan a hringtu, a pa tak, hmuh chakin a suangtuahna a kawm thin. A chhungte rem ti lo chung, tuithlar hial huamin a thinlunga hmunruak chu zawn a tum a. Lunglei Sumo kalna tur chin pawh hre lo mah se a kalna tur chauh hisap ranin a pa chu hmuh a tum nghet bur a ni. Huaisen chhuah tak meuh meuhin “a Ír chuktuah chunga ‘ka pa’ tih hun bak a ngaihtuah lo” . A pawisa neih cheng sanghnih chuan kirlehna tur Sumo chuan man pawh a daihin a hria a. Mahse, a beisei leh lo suangtuah thin ang ngawtin hun a hmang thei lo.
A hringtu, a pa ngei chuan run dalah lo lawmin, thinlung erawh a khar hnan lawi si. A pawisa neih chhun pawh a pa zu in nan chauh a lo tangkai ta a ni. Pawisa an hman zawh erawh chuan a pa tan phurrit leh hnawksak mai a ni a. Hrem huam leh ngaihdam dil tur pawhin Aizawla kirleh nghal nachang hria se zawng heti reng reng hian a vakvai bik lo ang. Joan-i hi nunphung tha leh nghet, mi vengva chu nise nunbuaiin a awm bik lem lo tur a nia.
Thurawn hrang hrang leh zirtirna dawng lo hi an awm lo ang a. Thurawn mamawh lo pawh an awm hek lo. Mahse thurawn tha pawma zawmtute erawh an nihlawh kumkhua zel a nih hi. Ani Joani pawh hian thurawn pawm se zawng fahrah kara vakvai bik reng tur hian a nunkhua a hmang lo ang. Khawngaihna hi hmangaihnaah a chang thin an tih hi a dik a ni. Khawngaihna chuan rei tak a daih thei lo thung. Khawngaihna ngainepa pawisa lo thin chu huatthlala tak an ni. An ngeiawm duh fu zel nia. Chutianga ngeiawm dinhmuna a din tak atang chuan a nun a buai zual zel a ni.
Vakvai taka hun a hman lai chuan khawngaihtu a nei a, chu khawngaihtu nen chuan eng dan mahin a phuar loh leilung danin nupa-ah an insiam ta ngawt a. Thinlung lama a inpawha inhriatthiamna a awm chuan a tawk an ti a ni. India dana kum tling ve ve awrh an nih kha A lo tawk ikhaw lo mai. Chu eng dan mah chu a lawina nu leh pa te chuan an pawmpui lem lo a, pawmpui lo tih avanga hnawhchhuah tum erawh an ni bik lo. Inkhatah an cheng ve mai a ni.
HIV hrikpai a ni tih chu hmanah a lo inhre daih tawh a. Hman hmanah khan inenkawl tawh tur a ni. Damdawi hmanga inenkawl a pawimawhna pawh a hria a, mahse damdawi a ei duh chuang lo. Mite hriat lova thih mawl tawp bak thlan tur a nei lo. Thinlung lama hnawl nih hi a lo na em alawm le. Hrehawmna leh chaw nghei te, vuak leh sawisak te hi chu a tawrh mai theih a. Hmuhsit leh endawng hi chu a tuartu tan a na em a ni. Khawngaihtu a neih chhun, a pasal lehzelin a vahvaihtir leh ang tih chu a hlauh ber a ni. A pasala nu rui ang thawm leh hmuhsit hlauh vanga damdawi pawh lo ei ngam lo a ni awm e.
Chutih lai chuan bawrhsawmnain a tlak buak a. Kan damdawiin hial a lo thleng ta. Dr.D-i hnenah fiah lo ruai chuan a sawi tawh a. Tluk hlum ngawt aiah damdawi in nge nge a lo ti a ni awm e. A dam huna damdawiin bill hi engtin nge a pek ang tih pawh a ngaihtuah lo. Dam a duh a ni. Chutah chuan a ni, ani chanchin hi ka hriat ni. Damdawiin khumah an nupa an inhau thin a, khawngaihthla la miah lova an awm avangin ngei rawn pawh a hlawh phah mai thei a ni. Mawlmang lutuk leh eng mah sawi chhawng thiam lo, sawi dang reng anga hriat phei chuan daw thei chan chan a awl hle ta ve ang.
Nupui te dam lo, damdawiina awm ta chu pasal tan chuan damlo kan satliah ngawt lo a, vil a ngaih thu chu mi pangngai tan sawi a ngai lo ang. Lunglei Traffic Jam hi motor tam vang leh intawksir dik loh vang a ni a. Chutianga Motor tam avanga Traffic Jam thin karah chuan damdawiin pana kalna tur a hmu lo a. Pawisa nei lo chuan kea kal bak duhthlan tur nei hek suh i. Thlan tla but buta thleng tur pawhin darkar khat vel chu hun a hman a ngai hrim hrim a ni. Thlen tawh laklawh chuan letleh mai hi a uihawm deuh a ni ang. Nileng chuan hun a hmang thei thin. Zing lama tlawh tawh chuan Gate khar huna pawn lama lo awm ve mai a. Gate hawn huna luh leh kha a awlsam tawh em a ni. Chutiang a nih avang chuan Joani chuan a pasal chu tlawh tawh lo tur leh kal tawh lo tura tiin an lo inhau thin a ni. Vana arsi lak pawh huam tana darkar khat motor tlan sira kal zel mai chu a ho em alawm. Mahse, Hmangaihtu thinlung atanga ngaihtuah chuan lawmawm hle mah se inhauhna titamtu leh a ruka mittui fartir tu a ni. Chu mai a ni lo, a pasal chuan HIV hrikpai a ni tih a hre chhuak anga, a thinlung atangin hnawlin a awm ang tih a hlauh vang a ni pakhat. Hnawl nawn nih a duhtawh lo a, pumpelh dan tur zawn zel a duh a ni.
A pasal chu ka kawm a, a na ngawih ngawih hle mai. Mahse, a thinlung atangin a nupui chu a tuarpui a ni tih ka hre thei a, a hrethiam hle thung. Mittui tla der chu a ni lo. Chhula hrin ngei nufa, pafa te pawh hi an lo intuithlar thin a. Mahse, thinlung atang hrin ngat hi chu an inthen ngai tawh lo tih thute kan sawi a. An damtlang hrih viau a ni. Miten Krismas leh kum thar hlim taka an hman lai khan an ni chu ni tin, khum sira inhau chungin damdawi inah hun an hmang thin a, an inhaw lem hlei lo a.
Kum thar pisa kai ni chuan ka tlawh a, an chhuah dan tur leh Private Hospitala Bill tam dan pawh ngaihtuah chuang lo chuan dama chhuah nghakhlel takin hun an hmang a. Bill pek dan tur chu sawi loh, damdawi in atanga an inlam panna tur tak ngial pawh a ngaihna hre lovin an awm a. Mahse kan pu te, abikin Dr RZ-a hmalakna atangin an chhuak thei a. Engtin nge an haw tak chiah chu ka hre lo a, a haw chu an haw ve ngei alawm.
Tanpui tlak loh hi a awm theih em? Tanpui fo pawha a ngaia an la awm tlat chuan kan thlep a, kan hawisan mai thin ti raw? Khawngaihna leh hmangaihna chuan kan beisei leh tum dan ang a lo nih loh hian tawp chin a nei a. Mahse Tih tur (Duty) a nih chuan kan tih tur chinah kan tanpui thei reng a, hmelma pawh nise kan ti zel ang.
P.S Sister NP-i Duty dawhkanah chuan an nupa nghak pahin kan ti ti a, ka phone la chhuakin, ka type mawlh mawlh a, ka han blog ta mai a ni e. Ziak dik lo leh eng emaw en turin ka la thual leh mahna, ka peih chuan...
No comments:
Post a Comment