KUM BI THLIAH CHIN LEH AN THEIHNA
( Bible : Sam 90.10 )
Kan dam chhûng kumte chu kum sâwmsarih ani a, Chakna avângin kum sâwmriat pawh a ni thei a;
‘Kum upat leh Upat loh te chu number mai mai alawm’ tiin inlak fiamthu thiam kan han tum ve ngawt a, a lo ni ringawt lo. Kum te, ni te, thla te leh Calendar in a hrilh theih upat tehna hi chu a awm ngei a. Chronological Age an tih ngawt hian engmah a hril kim zo lo a. Mi kum sawm a tlin pawha la bawk vak thei lo chu number lamah upa hle mahsela calendar hian awmzia a nei tam lo hle a ni.
Number hmanga kum chhiar ngawt lo deuhvin, engtia upa nge ni a eng nge titheia a inhriat dan tih te, mi a thiltih theih chin te, a awm dan phung te hian a upat dan chu a hril hle bawk. Chutiang chu Psychological Age an ti thin. A kum upat aia fel (function tha) leh rintlaka awm thei thin hi Psychological Age a nih chu.
Kum bi chhiar dan chi hnih kan sawi mai a ni a, a pawimawh lo a awm thei bik lo a, a inbuktawk loh chuan mihring nun a nuam lo a, hmun ruak a awm thuai thin. Kum naupangte ten Kohhran upa min cheta an chet ngawt hi chuan an ngeiawm letling thin a ni. Chutiang bawkin tarsenpui pawh tleirawt cheta an chet renga, hmeichhe chhaih hrat hrat an nih chuan kan hmu nikhua lo thuai a. Tar hur nih an hlawh phah fo thin a ni.
Ram hmasawn leh hmasawn lo hriatna awlsam tak pakhat chu a mi chengte kum leh an thil tih thin leh ngaihdanah hian a ni kan ti thei ang. Sap upa leh Pu Buanga Mizoram, hring ei ram; mi lu la hnam zinga an lo kal khan naupang te, Vote vawi hnih khat bak la thlak lo an ni a. Mizo zinga MLA Vote vawi hnih chauh thlak zingah hriat loh rama kal ta vawn vawn an vang hle mai. India ramah pawh Meghalaya MP, MLA te chu an naupang hle a, an puitling hma a ni ang kan MP MLA te reng an upa hlawm em mai.
Inenkawlna leh seilenna boruak hian engkim a hril thui hle a. Nula Tlangval uaih tawh pawh naupang chhe ena kan la en fo hi chu kan hnam tihsual a ni. Vantlangin tih tura a beisei leh ti theia a ngaih chin te pawh hian inchhungkhurah chuan naupang chhe awmin an la awm fo a. Chutih lai chuan sawn te an lo pawm leh nawlh nawlh a, nuthlawi zunah te an lo uai then nawl nawl ang lawi a. Upa dan leh thil tih hi a inbalance lo a ni e. Chuvangin kum leh ni chhiar dan hian kan rilru lama upat dan a hril ber awm e.
Nutling Patling tih tur chin a awm a, tleirawl nun ang mai maia la awm dahlau kan tam ta hle. A kum upat dan milin a chetzia a danglam chuan mi nghet a ni ngei ang. Kohhran Thalai Over tawh, dam sen lul tawh chawmhlawm la ngai chhunzawm reng hi an tam a. Enkawlna dik tawh loh vang leh an rilru kan tuh dan dik loh vang pawh a ni thei awm e. A tlangpuiin Mizo te zingah kum upat aia duap kan tam a, hnam dang erawh an nghetin, an puitling fu thin. Kum 18 tlinga vote thlak theuh theuh kan rilru puthmang hi a inang lo em a ni tiin tlangkawm ila a fel mai awm e.
Mizo khawtlang inawpna pawimawh ber chu chhungkua a ni a, chhungkua a hlawhchham chuan thil dangah a hlawhchham duh fu zel nia. Zir sang tak tak, mahni kea ding hlei thei lo leh harsat manganna leh buaina a lo thlena chi-ai leh phili hma kan tam dan atang te hian kum mila inenkawlna kan uluk a ngai ta hle mai. Chhungkua chu thuhranah lo dah ta ila. Khawtlang sukthlek lanna chu Kohhran hi a ni pakhat a. Kohhran pawh hian a ziak lamah chuan tum dan leh nihphung mumal tak a nei a. Kum 14 hnuai lam chu Naupang pawla awm turin a duh a. Sunde sikul lamah pawh kum bithliah milin pawl siam a ni thin. Thalai member ni tur pawhin kum 14-40 inkar a bituk a. Chumi hunchhung pawha leng lo leh special (bik) riaua inhria kan tam ta a ni ang.
Zirna sikul leh kohhran, pawl hrang hrangah inkhairual zawk nan leh rilru hmun khat put a nih theih nan kum bithliah chin a awm fo thin a. Chak lo bik leh voh bik, eng emaw avanga enkawl ngun ngai tan erawh hriatthiamna a awm bawk thin. Mahse, dam sen lul, khawtlang leh kohhrana an zia pawh thian te ang rilru pu vek, theihna pawh inang vek ni si. Awmphung danglam bik em em nei si lo zingah hian nu leh pa te ngaihdan leh an duh dan avanga kum phu lova tap ta tlat kan awm tam ta hle. Hei hi ngaihtuah chiang ila chuan Naupang tana zir tur leh tih tur, tleirawl leh puitling tana zir tur, an kum leh rilru puthmang mila duan hi hrethiam ila chuan an kum hi kan ngai pawimawh ang a, chumi mila an tih tur chin leh an theihna beiseiin hma kan la fo hian ka ring thin. -ZHC
No comments:
Post a Comment