DROPDOWN MENU

Tuesday, January 08, 2019

283/2019 Kei ve teh lul hi? (Why me?)

PATHIAN HNIAL RUAL EM KA NIH?
( Bible : Tirhkohte 11.17: Johana 21.18 )

Chutichuan, Lalpa Isua Krista an rin veleh, Pathianin thilthlawnpek min pek ang kha an hnena a pek ve ahnuin kei tehlul hi Pathian hnial rual em ka nih?” a ti a. (Tirhkohte 11.17)

Pathian hi engtin nge a inlar thin a, a aw kan hriat thin le? Bible hmang te, Fakna hla te, Zawlneite hmang te, thilsiam hmang te, hruaitu kaltlang te leh kan chhia leh tha hriatna hmang ten a inpuangchhuak ber a. Kan hruaitu mihring tih loh thil dang hmanga a inpuanchhuah hian thinlung a khawih hma em em a,   mihring hmanga a inpuanchhuah chuan Pathian ni ta lo bik riaua hriatna a awm awlsam em em a ni. Pathian ni lo, mihring kan lo ngaihchan thin vang a ni.


Pathian hmangaihtu chuan a thisena a din lei kohhran hi a hmangaih ngei ngei thin. Hmuh theih lei kohhran pawh hmangaih lo chuan engtin nge Pathian a hmangaih theih ang ang le. Khawvela kan awm chhung hi chuan kan nun pum hi rawngbawlna vek a ni a, a dik ngei e. Rawngbawlna kan tih zingah pawh mawhphurhna leh chanvo kan inruat thin hi rawngbawlna chi khat kha a ni mai a. Mi bik nihna avanga kohna pawh rawngbawlna a ni tho bawk a, he rawngbawlna hi chu mi zawng zawng thawh chi a ni lo a, an theihna pawhin tlin lo mai thei e.

Lei kohhran leh pawl kaltlanga Pathian rawngbawl hi a awlsamin, a kaida pawh a fel ber awm e. Mi pakhat duhdan ngawtah a innghat lo a, rorelna kaltlanga ngun taka ngaihtuah a nih vang pawh hian a fel awm e. Chu kohhran, pawl kaltlanga rawngbawlna chu uluk tak leh mi tam zawk remtih tlanna avanga thawh chi a ni a, mi mal duhsakna leh ngaihsakna vang ngawta thawh theih lah a ni hek lo.

Pathian kaltlanga kohna chu tuin nge dodal ngam a, tu nge chhang lo ngam che u. A kohna chhang duh lo leh ngaihven lo chu mi huaisen leh luhlul tak nih a ngai thin a. Ninevi khuaa tlangau tura Jona kohna chu haider a, tlanbosan theih a nih lohzia a chiang hle a. Thlipui leh tuifawn karah nghapui kawchhung atang chuan kohna chu na tawh tak a ni. Pathian ropui tak kohna chu a thilsiam pakhat ve mai hian dodal chi a ni lo a, chhan loh ngam chi a ni hek lo. Kohna an chhan ngam loh chhan pakhat chu chan, hloh ngam loh vang te, hahthlak leh hrehawm tawrh peih loh vang te a ni. Kan duhna lam ni lo, kan duh loh dan dana kal ngai thin hi rawngbawlna danglamna a ni.

Pathian kohna chhangtu te chuan a nuamah pawh a hrehawmah pawh lawm chungin rawng an bawl zel thei a. Mittui tla chungin fehchhuahpui thin mah sela  hlim takin an lo haw leh thin a(Sam 126.5) Miin hrehawmna leh lungngaihna a tawrh laia lawmman tur a mitthla theih reng chuan lawmnaah a chang thin ang hian thinlung lamah lawmna a awm chuan a hrehawm ngai miah lo nia. Joba 42.3 ah pawh khan Joba chu amah leh a mah inkawk chungin tu nge Pathian thil ruahman chu hre hawt si lo a, lo chhuah chhal ve ngawt tiin a mah a indem a nih kha 

Pathian chatuan thil ruahman dan hi kan hrefiah i khaw lo mai a. Hriat tum vek chi pawh a ni lo a, a remruatna te hi a tha vel vek a. A taka a lo thlen hunah pawh pawm thiam apiang hi mi vannei an ni mai hin a ni. Chuvangin, Pathian remruatna lo thleng leh a thil rel dan hi chu a mak lutuk a, thil te ber pawh engkim a rel fel vek a. Kan tana a lo thlen hian kan hrefiah thiam vek lo a, hriat vek chi pawh a ni lo. Mahse chu thil thleng chu thinlung inhawng taka lo pawm a, lo dawngsawng thin hnenah chuan a fiah mai thin a lo ni zawk.

Pathianin a thilsiam mihring kaltlanga a koh te hi tu nge hnial ngam a, ngainep ngam le? Sam ziaktu chuan Pathianin mihring min hriatna hi a sang em a, hriatfiah phak a ni lo a. Pathianin mihring hmanga min ruatna chanvo te hi hnial rual em ni i nih? A ruattu chu Pathian a ni tih in hre lo em ni? Mihring hmanga nemngheh a nih pawhin Pathian aiawha kohchhuah a ni thin a. Thawh ahmaa tlanchhiatsan hi mihring hlui tih dan a ni a, thawh phawta tlin loh a awm a nih chuan Pathian leh a aiawh din kohhrante chinfel tur a ni.Pathian hmaa sawifiah tur chhan tha tak kan lo nei tawh zawk em ni?

No comments:

Post a Comment