282/2019 Pathian biak inkhawm nung

PATHIAN BIAK INKHAWMNA NUNG

( Bible : Sam 100.4 )

Lawm thu sawi chungin a kawng kharah chuan lût ula, Fak chungin a biak in hung chhung kawtlaiah chuan lût rawh u

‘Biak in puiah (Missionveng Biak inah) chuan thlalak pawh hi a eng chi (Camera Flashlight) hman an phal lo’ an ti. ‘An ti’ ka tih hi chu dawt a ni lo. Mipui mit la leh ngaihtuahna hruai peng thei thil a awm an phal lo a ni ber e. Pathian chibai buka inkhawm hi an ngai hlu em em a, urhsun leh khun khan takin inkhawm an kalpui thin a ni. Kohhran lian leh inrelbawl thatna hmunah chuan Pathian biak inkhawm tam lai ber leh tlem lai ber pawh hi inang khat renga ngai pawimawhin, mawhphurhna chanvo neitute (Zaihruai, Sound, Usher, Deacon etc) chet dan pawh a danglam lo bawk.

  Pathian thu hrang hrang (Leveticus 23.3; 23.24; 23.32: Nehemia 8.17: Tah hla 8.17: Hosea 9.5: Joela 2.15: Amosa 5.21 etc) ah Chawlhni, inkhawmpui urhsun tak neih chungchang kan hmu a. Chu chu Juda ten kalphungah an nei a, mi thenkhat chuan kan chhawm ta zel a. A zahawm hle bawk. Hnam zia azirin inkhawm kalpui dan pawh a inang lo hle a, hnam ze mila Pathian thu kalpui (Contextual) pawh hi a nghet tha hle a. Mahse, hnam thang mek te tan leh khawvel hmasawn zelah hian kalpui hleih theih loh pawh kan nei ta zel thung. Chin dan tha zawk leh chin dan phung lo chhuak zel pawh hi kan ze mila lakluh a that rualin, inkaihhruaina leh kalphung nghet tak nei lo tan chuan min ti chi-ai-tu a ni thei thung. 

Pathian biak inkhawm hi a mihring tlem leh tam lamah a innghat lo a, a inkhawma te thinlung hi Pathianin a ngaihven ber zawk a ni. Lawmthu sawi chunga biak in lut tura min hrilhtu leh amah fak tura min duhtu chu Pathian a nih avangin kan lawm thei reng lo pawh a ni ang. Thinlung lairil ber atangin kan fak thei lo pawh a ni ang. Mahse, kan theih ang tawka fak tur leh Pathian chibai buk tura inbuatsaih hi kan tih tur a ni. Chutianga inbuatsaihna leh mawhphurhna neitu hrang hrang ten lo inzir lawk pawh ni ila, tibuaitu chu a thleng thei fo a ni. 

Mihring thinlung hi a mak khawp a. Hnualna tur leh sawisel tur hi kan hmu zung zung thin. Kan mit hian hmuh loh tur a hmuh chuan kan thlep nghal rawih rawih a. Kan bengin ri dang a hriat chuan kan hawi zawk zawk a, ngaihdan kan siam nghal a. Tui taka Pathian fak hi a har tawh thin a ni. Chuvangin theih tawpa inbuatsaih chung pawhin kan duh thusam hi chu kan hmu lo mai thei.

Inbuatsaihna awm ik lova Pathian biak inkhawm kaihhruai emaw, chanvo hlenchhuah tum chu mite thinlungah a thawk muang em em a. Thuchah sawitu atanga dar vawtu thleng hian kan pawimawh dan a inang vek kan han ti ngawt a. A dik ngei e. Mahse, kan mawhphurhna hlen kawnga kan inbuatsaih dan erawh a inang ta thin lo a. Chu chuan kan pawmawhna kha a tidanglam thin a ni.

Mipuiin biak in an thlen hma a, zai thawm leh boruak hian mipui a kokhawm chak em em a. Mipui tam leh tam loh ni lovin, zaihruai leh Musician ten ri awmze nei an lo pekchhuah tawh chuan kal thuai thuai a, lawm chunga biak in luh hi a awl hle thin. Chutih laia inkhawm kaihhruaitu a lo lam derh derh tawh chuan Pathian fakna thinlung neih nghal a awl a. Inkhawm a nuam thin. Tawngkam thiam tum fahrana inchhepkuala, tawngkam pehhel hmang thin te leh khunkhan luih tumna avanga aw danglam pe chhuak thin te erawh chuan boruak uap churh bak a hring mawh hle a. 

Pathian biak inkhawm kalpui a nih tawh laia sound system lo buaipui a phili sek a ni emaw, musical instrument lo chai vak te hian beng an ti thlep hma hle a. usher ten zahawm taka min lo kawhhmuh bak hi chu hmuh inbeisei lo ila. Pathian fak leh chawimawia lo phu luai luai erawh awm reng thei se inkhawm hi a nuam ngawt a. Faktu thinlung kan nei ve reng thei ang.

Duhthusam ang hian eng mah a awm theih lova, thinlung inhawng tak chunga Pathian chibai buka inkhawm erawh tihmakmawh a ni. A inhawng lo chung pawh inhawng thei tura mawhphurhna chanvo nei ten an hlenchhuah zel chuan hmasawnna a awm thuai thin. Vawng nunga chhunzawm reng tur chuan Upa min emaw, inkaihhruaina tha tak hnuaiah khaikhawmtu a awm hian Pathian biakna nung a thleng hma hle a. Chanvo neitu ten Mipui kalkhawm hmaa tawngtai leh fuihna neih hi a tha hle a. Chutianga kalpui reng tur erawh chuan kan theihna hian a tlin lo fo thin a ni.