37/2015 Social Worker’s Point of View

salvation Camping AIAH

 COUNSELLING INTERVENTION

Thuhma :             Kohhran hmunpui ngaihdan ka hre lo a, tualchhung kohhrante ngaihdan ka hre hek lo, ka hriat erawh camping kan neih dan hi tihdanglam a hun tawh a ni. Kum tina khel lova kan neih fo ṭhin; camping kan kalpui dan hi thlak ta  ila, thil ṭha zawk a chhuak ang a, nun nghet kan neih phah thei ang.  Salvation camping, bul ṭan ṭhatna leh insiam ṭhat nana hre laklawh tawh, a thlakna tur hre si lo, a ngai rin duh lem lo ten ‘Revival camping’ emaw ‘Siamthar lehna camping’ tia kan thlak hian a nihna a thlak danglam phah lo a. Weekend bawra crusade lah kan zawng chhang  si lo  a nih hi. Pathian ruahmanna kan hai palh emaw, kan hman hmawh deuh emaw a nih chuan ngaihdam dil pawh kan hnial tur a ni lo. Kan kal dan, nihphunga kan lo neih fo tawh camping te, a remchan hun leh kan phak tawka kan nei ṭhinte hi ka sawisel hauh law. A thlakna tur emaw, a aia ṭha zawk/ hlawk zawk emaw, a awm em? Engtin nge kan hlawkpui zawk ang tih i ngaihtuah tlang teh ang u.

Pathian thu-ah kan ril a, a taka hmanah kan diau : “Chhandamna a bo thei lo Bible in a sawi,” tih hial lehkhabu thupuia kan neih tawh lai hian camping vawi 10 chuanga lut tawh, inhlan ziah ṭhinte hi an nunin a danglam phah em tih i ngaihtuah chhin ngai em? Chhandamna chu a bo thei emaw, bo thei lo emaw kohhran memberte campinga lut an tam dan leh an luh zin dan en hian ngaihtuah nawn chu  a ngai a ni. Kohhran upa mîn, camping ṭul ti lo tam tak ka hmu ta, chungho lah chu kan hmu thlarau mi lovin, harhna duhlo ang hiala chhuah tak te pawh an awm ṭhin. Kohhran hruaitute’n camping ṭul an tih loh dan pawh an sawi ngam lo fo.

Kohhran inbuatsaihna :                 Pathian kohhran hote hian ruahmanna fel tak neiin Camping neih hun thlirin rei tak kan urlawk ṭhin a, ṭawngṭai subject-ah neiin kohhran leh mi mal ṭawngṭainaah kan dil tlut tlut ṭhin. Thil ṭha tak a ni.  Sum leh pai, tha leh zung sengin kan inbuatsaih a, Evangelistic Team rawih turte leh Speaker, Counsellor ṭha turte thlan fel a nih hnuah camping kan buatsaih ṭhin a. Thil ṭha tak a ni, a la ṭha zel pawhin a rinawm. Thlarau boral tur chhanchhuah nan chuan eng zata tam pawh kan seng ngam tur a ni. Camping laia kan tawng pawng nawr vak leh, a nawlpuiin kan ṭawngṭai/Bethel dan te, Eirawngbawl, Security, Camp dawr nghak leh ṭuldanga kan buai dan ên hian camping hi kan insenso ngaihtuah hian a hlawk kan ti em? Hei aia ṭha zawk a awm thei ang em?

                Camping engti anga neih tur nge? Riah-luh tawpa Pathian thu mawngkham ṭhuma ngaithlak ngawt ngawt hi em ni kan duh dan? Engtin nge kan neih ang a, eng ang kalphungin nge kan neih ang tih hian ngaihtuah a hlawh lo a. Team emaw, Speaker te kutah emaw kuta kan dah tawp ṭhin hi a fel hlel deuh. Ni tam em pawh la cham lo, Mikhualte hian engtin nge kan khawtlang zia an hriat ang a, mi mal leh kohhran harsatna an hriat chian theih ang.

Campingah hian kan lo piangthar lo ṭhin em ni? :             Mizote hi Chhandamna thu-ah chuan kan chiang tawh a, Chhandamna khawp Pathian thu hre lo chu kan awm âwm lo e. Khawngaihna avanga chhandam kan ni tlat a, kan duhdan hi a pawimawh hmasa lo khawp mai. Kan theihna avanga Chhandam tur lah kan ni hek lo. Nimahsela, chhandamna hi keimahni thu anih loh avang leh Thlarau hriatpuina a ngaih avangin kan zawn a, kan kar hi chu a ṭul a ni. Chhungte leh kohhran hmai zah vang emaw, kohhran hruaituten Camping atana an campaign vang emaw, a nih ṭhin vanga riak lut an awm fo ṭhin. Chhungte nawr luih vang leh ṭhiante zara lut a nih pawhin a ṭha tho e. Luh loh ai chuan. Mizo kristianna heti em a, a nghet lo leh belhchian a dawl lo fo ṭhin hi kan innawr luih ṭhin vang a ni thei ang em? Piangthar lo khan chinghne beram vun sin ang maiin kan lo Piangthar der ṭhin zawk em ni? Kristian za a za pawh kan tling tawh lo an tih hi, Camping record aṭangin en ila, Kristian za a za sawmnga kan ni mai lawng maw?  Mahni duhthlanna ngeia Camping lut, Piantharna/Siamtharna/harhtharna changtute nun chu a danglam bik ṭhin ang hian nun tak nei tura kan beih hi a ṭul tak zet a ni.

Camping hi eng zat takin chhawr ang maw? :      Hlima so san but emaw phur hluaina thlaraute hi kan chhawrnaah kan chhiar dawn anih chuan a dik tho e. Kohhran zai a tui phah a, thawhlawm a pung sawt ṭhin kan tih pawhin a ṭha e. Ral beih, Operation, Campaign, Home visit kan neih pawhin kohhran zia chu a danglam phah ṭhin. Phur thut leh so san thut hi a chuai hunah chuan ngaiawh leh hi a har khawp mai. A ṭhat ber chang pawh a awm bawk. Mi mal leh roreltute ngaihdan a hrang thei ang a, kan the dan azir pawhin a danglam thei bawk ang.

A tehfung :         Hlim so san but emaw, zaikhawm tui danah emaw, Sermon ṭha emaw, Camper-te inhlan tam danah hian a hlawhtlinna kan teh fo ṭhin. Mi testimony sawi ṭhat dan leh min hneh dan hi kan tehna pawh a ni thei. A dik a, tehfung ṭha ber erawh a ni em tih hi chhut chiang ila. Heng hlimna te hian engtia rei nge a daih a, Camper-te nunah eng chen nge thu a sawi a, mi mal engzat nun nge inthlak thleng? Mi engzat nge kumtluana kohhran tan ke pawimawh ni ta ang le? Biak in inkhawm zia hi engtia rei nge inthlak thleng ṭhin le?

                Kohhran hrang hrangin Evangelist Team kan nei vek a, an kohhran ṭheuha an rawngbawl dan report pawh an pe kim vek ṭhin. Ziak leh ṭawngkaa report ngai a nih chuan report ṭha duh vek kan nih ṭhin avangin ṭhahnem ngaihna, mihring tak pawhin kan nei fo. Kohhran hrang hrangte pawh hian Camping hlawhtlinna chungchang kan inzawh hian mi engzat nge lut a, engzat nge inhlan zat tih hi kan zawhna hmasa a nih avangin eng anga quality nge tih kan chhut zui peih lo khawp mai.

                A nawlpui hian ziak loh ngaihdan kan neih chu thuchah, zaikhawm leh lâm tam danah te hian kan teh ṭhin a. Tehna awm tak pawh a ni. Thawm zawi leh phur hlut lo team chu rawih nawn an hlawh mawh hle a. An rawngbawlna hlung lo riaua hriatna kan nei ṭhin bawk. Campers tam leh Pathian hnena Inhlan an awm dan azira teh ai chuan; mi ṭha sim chuan tur nei lo aiin misual pakhat sim pawh a hlu a ni kan ti thei reng anih chuan a ṭha e.

Rawngbawltu team :      Evangelist team emaw pastor, upa leh thusawi thiamte kan ruai a, a pui bawm turin mi tam tak pawh an tel ṭhin. Inkhaihhruaina dan mumal tak nei a, hmunpui leh pawl neia rawngbawl ṭhin Evangelist, Pastor, Upa adt., Camping kalpui dan chu a danglam fo a. Evangelist-te zia erawh a danglam hret ṭhin. Khawvel finna-ah chuan hniam te an ni emaw, ni lo emaw,  Pathian hman tak takte an ni a, kalphung  ṭheuh an neih angin campingah an duh dan angin an kalpui mai ṭhin. An thiam dan leh  an tawnhriat mila kal an ni tlangpui. Khawtlang leh Chhungkua, mi mal harsatna mila insiamrem thiam erawh a har deuh pawh a ni ang.

Campers te dinhmun :   Kan sawi thuak tawh nain mimal duhna vanga lut an ni nge, mi hmai zah vang? Chhungte tirh luih emaw sawm chawpa lutte hian an hlawkpui ṭhin ang em le? An hlawkpui a nih pawhin Thlarau hna thawh vang a ni ngei ang. Chhandamna thu kan hre tawh kan ti a, nimahsela, harsatna leh chhan hrang hrang vanga Camping lutte chu tih dan ngai ang a, Sermon ngaihthlak mila Counselling nei ṭhin an ni deuh vek ang. Chumi hnua sawmna siama buai rilru tak chunga inhlante pawh an awm thei. Sawi ṭhaih leh vaukhanna tinreng nena sawmna chhang,  mualpho aia inhlan leh sawmna chhang ta mai an awm nawk tih ka mit ngeiin ka hmu a. Piangthar dik, ṭha taka chhuak pawh an awm ṭeuh a, kan enkawl leh venpui loh vanga kir leh pawh an tam. Hriatna, Rinna chauh chuan thil tih-ah a hruai lut lo fo.

                Camping hi Pathian nena inkara harsatna chin fel hun anih angin sermon ṭha-ah a innghat tawh lo a, Counselling-ah a innghat tawh tiin sawi teh ang. A huhoa (group) Counselling pek a nih ṭhin ang hian mi mal harsatna leh a nun chungchang hi Group counseling-ah chuan engtin nge an puanchhuah ngam ang? Sermon pa tê thlak a, inzilhna e maw ti tlat a awm theih a nia. Sawmna chhang duh lo leh inhlan duh lo luh lul fal khalh falna hun lah a ni hek lo. Miin kar tluana eng thu pawh (thusawi thiam tak) a ngaihthlak char char chuan hmin chin leh phur chin a cho chhuak a, emotions alo luang liam ṭhin. Chu emotions chu mikhualte haw hnu emaw, Khawtlang leh kohhran hmaizah hun a reh rual rualin emaw, a nun pangngaiah a kir leh ṭhin a ni.

Camping thlak ang u :    Camping thlakna tur thil ṭha dang a awm lo, Pathianin min la pe lo tih hi ka tawng fo mai. A dik thaw khat viau ang; kan tehfung leh kaldan/beisei dan azirin. Kohhrante hian kar khat emaw, nawr thuta Piantharna chang thei emaw, nun inthlak thleng nghal dawrh dawrh tura kan beisei chhung chuan camping hi a hlawhtling tak tak ngai lo ang. Thlarau bo man tur leh mite nun vawi leh khata siam ṭha nghal dawrh tur chuan hmanrua kan nei ngai lo ang.

Camping thlak a hun tawh tih pawm vek ṭhinte hian Pathianin a thlakna tur min la pe lo tiin kan sawi liam puat ṭhin a. A nih leh thlakna zawng tur hian vawi engzat nge committee agendaa awm tawh ang le!! Committee-a ngaihtuahna seng an awm tawh em? Camping chungchang rel tluk zet hian a thlakna tur ngaihtuahin committee ve fo ila, Pathian hian thil ṭha chu min pe ve lo ang maw?

Kohhrante pawh hi insenso leh tei rei peih lo kan nih fo avang hian nun inlumlet thut lawm pa ek sena lawm kan ni fo ṭhin. Kan beisei dan hi thlak a ngai a ni. Kar khat chauh ni lo, thla khat emaw, kum khat emaw hial pawh beih pui (operation) nei ngam ila, kan hlawk zawk lo ang maw? Heti zawng hian kalpui ila a ṭha ang em?

1. Periodical Counselling :           Counselling hi thurawn inpekna tur emaw, Inhrilhhriatna emaw, inzilhna emaw,  invauna hun atana hman chi a ni lo a. Mi chi hnih inkawma, harsatna sukiang tura inpuihna hmun tur  a ni. A chang chuan ngawih a ṭhat zawk changte a awm ṭhin. Religious Counselling hi alo danglam bik nge ka hre lo a, Counselling nih tur ang tak hian kan kalpui lo fo ṭhin. Kan hriat loh vang emaw, a hun leh hmunin a zir loh vang emaw, a ni thei bawk.

Counselling chu kar khat chhung chauh emaw, hun bi tuk chhunga neih tlut tlut hi a ṭul kher lo a, mamawh dan mila neih zawk tur  a ni. Counselling hi mi pakhat emaw, a aia tam emaw, inkawmna (Two way process) niin, Counsellor aia Counselling tura lokal  (Client Centred) a nih avangin Counsellor-te duhdan sawi a thiang lo a, thurawn pek pawh a ngai lo. Counsellee-te harsatna zawk sukiang tura inkawmna a ni ti ila, a dik awm e. Ṭawngkam thiam vang emaw, Pathian thu hriat leh thlarau mi em vang emawa Counsellor ṭha a nih ngawt theih loh ang bawkin; Counsellor ṭha ni tur chuan Counsellor chauh  a pawimawh lo a, Counsellee hian dinhmun pawimawh zawk a chang a ni.  Counsellor-te (Value and attitudes) nihphung chu sawi lan ngai lovin kan hria ang a, Micro Skills hrang hrang ngun taka harsatna ngaihthlak dan, zawhna zawh hun leh zawh dan, ngawih hun, ṭawng lova chetzia a awm dan, Counsellee-te awmdan ang chiah a inawm tir theih dan (accurate empathy) te hi Campingah chuan kan hmu hman ṭhin lo. Hun chep tak kar a nih vang pawh a ni ang.

Pathian thu leh mi mal harsatna sukiang tur leh Chhandamna chungchanga harsatna hrang hrang inhrilhfiah hun a nih avang hian mi mal-ten an harsatna an sawi chhuak ngam tak tak em? Tibuaitu (Interruption, disturbance) a awm ṭhin em? Counsellor-te hnenah mi mal nun chhe lai ber leh harsatna pui ber puan zar kan ngam ṭhin em? Thuruk vawn ngai sawi chhuah nan camping hi a him ṭhin em? Group Counselling-ah chuan a theih loh bawk.

2. Targeted Intervention :            Camping buatsaih ṭhinte pawh hian group-ah inṭhenin a kum rual khat emaw, mipa leh hmeichhia emaw, harsatna, suala tluk dan/harsat dan azira inṭhen ṭhin group kan nih ang hian kohhran khata lawi, memberte dinhmun chu a lang ruak ruak ṭhin. Zu avanga harsatna tawk, drug, sex, corruption, ei leh bara  harsatna, thatchhiatna leh inthlahdahna avanga harsatna tawkte chu a hriat ṭhin. Heng mite hi awmze nei taka thawhpui hi an ngai ṭhin. Target neia Home Visit, Outreach, Follow up leh a ṭul anga member mal-te kawm nel a, hruai ṭhatte hi sum leh pai heh lo, senso tlem taka hmalak dan ṭha tak a ni. Kan hriat angin kan Target azira ral beihdan strategy (ral rel) kan thiam chuan hlawk takin Chhandamna thu kan hril thei ang a, a sawt em em ang.

3. Problem Substitution Therapy  A hming hi kan sawi mai tak na’ng a, eng pawh nise a ṭha tho a. Kan kohhran memberte harsatna tawh dan azira a thlakna zawnpui dan ngaihtuah hi thil ṭuk tak a ni. Harsatna hi vawi leh khata kiam thut, sim thut theih lohte a awm avang hian he thil hi mi tlemte mamawh a nih dawn avangin, a mamawhtute tan chuan a ṭangkai ngei ang.

                Heti ang dinhmun chiah ni lo, harsatna dang tawk pawh an awm theih avang leh mi mal dinhmun inhriat sak vek a harsa a. Amaherawhchu, pan theiha kan inhawn a ngai a, bawhzui theih tura kan inrin erawh a hun tawh a ni. Kohhran tina Evangelical Cell-te hian eng nge an thawh ber? Eng nge an hmalakna chhiar theih an neih, programme oriented-a (duan lawk programme?)an kal hian mamawhna (harsatna)a sukiang lo fo.

                Kohhran hmunpui lam ṭheuh hian Care and Counselling hi ngai pawimawh leh zual turin hma an la a, a ṭha hle. Kohhran tin hmunpui hian pastor bial ṭheuha bial hruaitute hnenah, an bial chhunga Pastor quarters hnaih emaw, hmun remchang emawa Pastor Office, Counselling room, Therapy room siam turin ngenna han siam se chuan hma kan sawn phah ang. Hmunpui lam ngenna  chu zawm tur a nih dawn avangin bial tin hian  kan rel ang a, kan siam ṭheuh thei ang. Pastor-te chuan thawhlehni, ninga leh inrinni (bazar ni or zan inkhawm awm loh zan) te hian zing leh tlai emaw, chhun lamah emaw, harsatna neite’n kan pan ṭhin ang a, pastor nupui emaw, an fate emaw  mitmei veng lo lekin an kawm theih ang. Hmunpui lamah mi eng zatin nge tlawh tih an report ṭhin ang a, chu chuan mi a ti ṭang dawn bawk si.

Tlipna :                 Camping hi a ṭha lo kan ti lova, a ṭhat lohna ṭhenkhat pawh tarlan a ni lo, sawt zawka rawng kan bawl theihna tur ngaihtuah nan point pathum khi ngaihtuah ho ila, kan ngaihtuahna ti-fimtu leh hmalak kan thiam theihna tura kan thlir thiam theih nan ka tarlang hmasa mai a ni. Research and Evaluate dawl tak tura hmalak hi a harsa a, hmuh lawk theih vek lo mah se thil ṭha ti tur chuan chhin ngam, zir chian ngam, hlawhchham hmasak ngam hi a ngai tak zet a ni.

* Kum 2010 Camping thla daih tawha ka ziah a nia, ka han pho lang ve mai mai a ni e