DROPDOWN MENU

Wednesday, August 26, 2015

42/2015 HIMNA ZOAR TOBUL

HIMNA ZOAR
Genesis 19.22, Luka 12.15

 SAWMNA DUHAWM:           Bialtu Pastor Rev F.Lalsangliana

lehkha a lo thleng a. Ni 21-14 August 2015 hian Old Ralvawng-a BCM Zoar kohhran chu a Bial fan ruala tawiawm turin Bial zaipawl te min sawmna a ni. Bial zaipawlah sawi ho turin chhawp chhuah nghal a ni a. Old Ralvawng dinhmunte ngaihtuahin member-te chuan Pathian ram a din ngheh tulzia an sawi a. Inbuatsaihna nasa tak nen pastor hi tawiawm nise. Spiritual Camp pawh neih nise, a tul ang chu zaipawl committee in lo ngaihtuah se tih a ni a. Ni 17-20 August 2015 chhung chuan BCM Bazar ah zan riaka Bethel, Hlazir, Street play (Drama) leh a tul anga inbuatsaihna camp neih a ni a.




 INBUATSAIHNA:           He Camp atana inbuatsaih tur hian Committee chuan darkar khat hlazir thin nise, a bak zawng chu tawngtai, bible chhiar leh Pathian ram lakna tur atana inbuatsaihna, inkhelh, drama, naupang hla zirtir leh
community group work neih dan tur ngaihtuah nise. A tul ang lo buaipui turin Director leh Secretary, Tv V.Vanlaltlanhlua chu min ruat a. Mahse, Camp ah chuan eng kan ang thei lova, member zat ve vel chauh kan riak lut thei a. Ka rilru a beidawng a, a zam hle bawk a. Ruahmanna kan lo siam tawhte hi a tih theih dawn loh a nih hi tiin ka hamhaih hle a ni.

            Street play atan Tanpuina dik tih BCM zoar Kohhran pual bik chu saptawnga mi letlingin, lemchan anga chan theih turin ka siam rem a. Old Ralvawng khaw mipui tan Kawng thu ka ziak bawk a. Zaipawl member, Zoar kohhran leh Zero- vantlang nena inmil tur Zoar Lamtluang tih chu ka ziak bawk a. Thlarau lam leh tisa lamah ka inbuatsaih nasa ve hle a ni. Camp-ah hian Group 4 ah inthenin, Accapella sak tur hla pali kan thlang bawk a. Chu chu hunawlah zirin an thalai hote nena inkhelh hunah emaw, Tual inkhawm neih huna Music tel lova Pathian fakna hla hmanga mipui hipkhawm theih nana sak ka rilruk bawk a ni. Tin, Home visit kan neih theih chuan zaipawl member ten kan chhaw tura ka rin leh, Rinna chungchanga kan nghehna turin hmalak a tul tih ka hria a. Zero kulmuk ina len emaw Tual inkhawmah emaw, Kan hmalam hun zel atana pawimawha ka hriat Pathian thu hrilh leh sawi dan, a ngaithlak dan kan thiam theih nan Homiletics (Pathian thusawi zirna) paper buatsaihin, Practical nen kan bei bawk a. Kea thui tak kal tur a nih avangin Physical Exercise pawh kan nei thei turin ka inbuatsaih bawk a.

            Kar khat chhung deuh thaw Ruah sur tluk tluka, chhiatna hrang hrang - tuilian, leimin leh kawngchhiat chungchang thu thar a awm reng a. Kan zam a, Camp pawh tuiawm loh phah rawkin  a awm a. Mahse, Bethel-in kan dil a, kan tawngtaia memberte kan hul huk mai. Chung harsatna leh rilru hnualna kan neih chinah chuan Pathianin hna a lo thawk dawn chauh hi a lo ni a. Hmuh theihin hma kan sawn nghal a, kan tui ta em em a ni. A ropuina ber chu 'tu mah kan inphut lova, tu mah pawh kal turin kan insawm hran lo a. A peih peih, a tum tum kan kal ang' tiin. Mi 15 kan kal a, mi 11 an kal thei ta lo a. Tum dang ang lo takin eng nge an kal theih loh chhan tia insawifiah tu mah zuk awm lova!  Kan zai lo a, an zai kan ngai hek lo. A chhan chu rawngbawlna rilru-ah chuan phutna rilru a awm thei tlat lo a ni, 'ti lo mahse, kal lo mahse kei ka kal ang' tih hi a pawimawh hle si a.

 MIHRING LAM RUAHMANNA:           Kan thulh ka hlauh em avangin Bial chhung kohhran fanna tur Rs 1000 chiah kan neih tawh chu, "Engtin nge in kal ang?" tih Bial music treasurer-in min zawt a. Kal theih dan kan ngaihtuah ang a, a theih ngang loh chuan July thla tawp atangin Office lama kan hna-ah August Monthly Work Plan chu ni 21 leh ni 22 August, Old Ralvawng kan kal hun tur hisap chungin Dawn leh New Ralvawngah programmee ka siam lawk a. Bolero Camper hnungah pawh kan inhnawh vek ang a, kan budget la neih hi haw lam atan kan khek ang tiin ka ngaihtuah a ni. Mahse bial music lamin an tum leh theih tak si-ah chuan min tibuaitu a ni lek fang a. Pathian hnena dil reng khan ka lo ringhlel a, Mihring second plan chu min paih chiang kher mai. Dawn leh Ralvawngah ka office hna, ruahman lawk tawh, thulh theih loh chu thawkin ka khawtlai a, min kalsan ta vek mai le!!

            Dawn leh Ralvawnga ka khawtlai avang chuan ke-in ka kal a ngai ang a, khua-in min thim hnan dawn erawh chuan "Chhuanlam siamin ka kir leh ang" tiin. Ralvawngah chuan mak tak maiin kan programme chu a hlung lo a, kan zo hma kher mai! Chutih lai chuan kan zaipawl Treasurer R.Lalthazuala leh mihring tak pawha ka nau en thin, HS Roluahtluanga chuan min lo nghak a. Kir leh chi ka  ni lo, chhuan lam reng a awm thei lo. 'Mei leh tuilianin min dang lo ang' tia sawitu ngei kha ka lo zam a ni.

            Mahni thawmhnaw theuh phurin Keyboard PSR 1000 chu an inphurh chhawk a, ka put ve an phal ta tlat lo mai. Chuti chung chuan Darkar 2 dawn kan kal a, min phut eih lo. Ka kal thei lo a ni. Ka rawksai chu akin min uai fual lutuk tur leh phurh a awlsam zawk nan ka chhipah chuan ka phur pah ta a. Ka chau a ni. Darkar khat vel kan kal chuan New Ralvawng kan chhuahsan tak leh Zobawk khua chu a lo lang uarh a, ka han enchiang tur ka dak chu ka phur a tla dawn zel a.

Pathianin hla min pe nge, ka ngaihtuahna mai mai zawk!
            Old Ralvawnga Baptist Kohhran hming chu Zoar a ni. Old Ralvawng hi Zero kulhpui niin,  khawchhak lungpui lian leh Sakawlh hlaua tlanchhia a, inhumhimna zawng an ni. He tlang hi him tura ngai an ni a. Chutih laia Zero atanga mi tlemte Baptist kohhrana kirleh te kohhran hminga Zoar kan tih tlat mai hi Zero ho an dik zawk ta emaw ni chu a tih theih ang chu. Zero rinna ang hian i awmna atangin Old Ralvawng tlang hi a him dawn a, han pem ve rawh tih lam a ni lo. Ka rilru chuan khawvelah hian sualna a lo pung zel a, sual laka inhumhim turin tlan chhuak rawh, i tlanchhuah hma chuan Pathianin hna ka thawk thei lo (Genesis 19.22) ang mai hian ka ngai a. Ka himna tur atan min lo tir (commission) zawk em ni?

            Himna Zoar panin min tir (commission) a, min tirhchhuah hi a duh tawk ngawt lova, a awm mai mai lo, hlenchhuak turin min duh a. Harsatna hrang hrang paltlanga hlenchhuak turin min hruai leh si a ni. Ka phurrit tak phur chung chuan khawvel thlirin ka dak thei lo a, khawvel en tura ka hawichhuah dawn apiang chuan ka phurrit hi a tla dawn zel a. Phurrit phur lo chuan ka tumram thleng mah ka nawmsakna tur a awm dawn loh avangin awmzia a nei dawn si lo a ni. Chumi a nih avang chuan hlim takin hawichhuak thei lo mah ila, ka phurrit hi a la tangkai dawn tih ka hriat avangin kun chung chuan ka kal zel a, ka lungngai lo, thlipui leh ruahpui, khawvawt kara ka inhumhimna tur zawk a lo ni si a. Hringnuna kan phurrit phurhte hi nakina kan nawmsakna, himna tur a lo ni reng zawk a ni.

            Himna Zoar panin min tir a,
            hlenchhuak turin min hruai leh si
            Phurrit phur chungin ka kun a,
            Mahse ka lungngai lo, himna a ni si.

            Chuti ang chu hre reng mah ila, ka kal thiam chuang lo a, kawng chhuk chho ka zawh mek lai hian ka phurrit vangin ka chau a ni. Ka khup a dur suih a, ka ke hi a phet fo thin a ni. Ka thiante, kum lama ka naute chuan chu chu an hmu a, Tiang hawl tur min sah sak a, ka hawl a, muang takin ka kal thei ta a, Ka kal theih tlat tawh avangin, ka kal zel a, kal  pahin hawikir theih a ni lo. Ka chawlh leh ka inthlahdah thin avanga hawikir alawm ka lo nih thin le!
A thunawnah chuan

            Ka kal thiam lo Lalpa,
            Dam lai kawng chhuk chho-ah hian
            Ka ke a phet, tiang min pek hma chuan.
            Hawi kir lovin; muang ten ka kal thiam ta

            Chawlhbuk atang chuan New Ralvawng a lo lang a, ka phur pawh nghat lo chuan khawvel mite, nawmsakna duha buai tak leh Pathian rawngbawl pawh ngaihsak lo, himna tura tlanchhuak hreh, sum bawiha tang zawng zawng te chu ka han deu a, ka chhuah chhal ta a nih chu. Engati nge himna hmun pan turin min lo zui ve loh? "In nunna atan tlanchhuak rawh u, chumi hma chu hna ka thawk thei lo asin! Gen-19.22" tiin Pathianin a hrilh pawhin an haider si. Khawvel thila buai tih in chhuanlam em ni? Sum ngainat hi sual a ni a, chu vangin, sum ngah hi mihring damchhan a ni lo (Luka 12.15) Pathian ram din hi kan damchhan a ni a. Chu chu kan lungawina tur leh kan duh ber a ni tur a ni asin tiin.
           
            Ritphur chungin ka chhal a, hringfa
            Sum ngah hi damchhan em ni?
            Lalpa tana A ram din hi
            Ka duh, ka lungawina, damchhan a ni si

            Old Ralvawng kan lut thei ve dawn a, buaipui ngai lo leh tumram thleng theia ka awm kha ka hlim a ni. Ka thiante leh Pastor Sangtea te chuan lawm hmel takin, " In lo va thleng hma zawk ve?” tiin min lo lawm a. Ka hrehawmna leh ka phurrit, chhawk ngai miah lova ka phur thlen theih avangin ka lawm zual a. Nep bik nih ka hlawh lo a, ka phurh thlen tlat avangin ka zak bik lo a, kawng lakah thiante lak leh turin hnutchhiah ngawt ila ka inthlahhrungin nuam ka ti dawn si lo a. Chuti ang ngai lova ka thlen avang chuan ka hmai a uang a ni. Thlamuang takin ka chawl hahdam thei ta a, ka tumram ka thlen avang chuan hlim takin ka hahdam thei ta a ni.

            Hlimna Zion ka thlen ve hun chuan
            Lal hmelin min lo lawm ang a
            Hrehawmna kross ka hahdamna
            Muangtea hahdamna Zion a ni si.


            Class room-ah kan mu a, Greenboard a lo awm a, heng thu hi ka ziak chhuak a, Tonic solfa erawh tlar khat bak ka ziak thei lo. Kan Asst Conductor a lo lut a, guitar kuahin zai a tum lai chuan Greenboard a mi chu a chhiar a, thil awmzia kan hrilh hnu chuan a perh a perh a, a sa chhin a, tonic-in a sawi a, Tluangte chuan Solfa in alo ziak zel a. A solfa kim erawh chuan kan Conductor, Pu Vena chuan a part tin inmil dan turin Inrinni chhunah a lo ziak nghal a. Engkim hi a kal zuih mai, kan han sa chhin chu Class room lehlama hmeichhe riak ho chuan an lo zawm thei ve ngawt nia!! Inrinni zan inkhawm leh zaikhawm bana kan mu tur chu Skul quarters-a awm Pu Tetea te inah  mipa kan kal khawm a, hmeichhia an lokal a, Greenboard-ah Tonic Solfa ziakin vawi hnih vel kan sa a, Pathianni zing inkhawm chu Pu Tete-a a hruai (Chairmanship) hun a lo ni a. Zinga rem turin min sawm a. Kan rem ve nghal ta ngawt a. A mawiin, a tha em tih erawh ka hre lo, mahse engkim (ziah chhuah, a thluk siam leh a remkhawm leh hla zir, Pathian ropuina tura hlan) hi a awlsam nghal em em vek a ni tih erawh ka hria a. Pathian min pek nge ni ang a, kan ngaihtuahna kal ding thil tih ni ang le?

No comments:

Post a Comment