DROPDOWN MENU

Friday, August 14, 2015

39/2015 Dampuia tana phuahchawp


KE BAI ASSOCIATION

College Students’ Union hruaitu thlan a hnaih tawh avangin kan thiante Campaign puiin hun kan hmang nasa hle a. Semester; Internal test ai chuan kan la thu tak zawk fe awm e. Kan College SU hruaitu hi a pawimawh a ni ang hruaitu nih tuma chuh pawh an tam thei hle a. Mizoram Politicians lar tak tak hi kan SU hruaitu hlui an lo nih tawh vang pawh a ni mahna. 

KBA te hi thianho pariat chauh ni mah ila kan inlungrualin kan College-ah chuan kan leng ve halh hlah hle a. Over miah si lo hian tu mah kan ngai bik lo a, ngeiawmin kan awm lo a, ngei pawh kan nei lo a, mi dang kan mamawh hek lo. Min pawh tuma min zui leh min kawm te chu awm ve thin mahsela, kan khawsazia a danglam em avangin kan hnar ni miah lo hian an kiam leh mai thin a. Pawi pawh kan ti hek lo.


Lalpe-a ber hi SU hruaitu chuh ve turin an nawrlui a, a lo chak ve deuh nen  nominations s file kha a ni a. KBA chu inphatsan chi kan nih loh avangin theih tawpa puih mai chu kan tih tur a ni tih kan hrechiang hle a ni. Mipa 3 leh hmeichhe 4 kan ni deuh ber a, Puia a awm chang chuan pariat kan ni fo. Ani erawh chu hmun danga College a zawm avangin KBA Associate member a ni. KBA kan tih chhan pawh hi Papai-a te in chhungah ball te tak te hmanga Football kan khelh laia, Ramkeli (kel be anga a be thiam em avangin) ke kan pet nat avanga kan inthiam lo lutuk, kan ke kan bai der ve ngawt avangin Kebai Association hi lo piang chhuak ta a ni. Unau aia inuanau zawk kan ni a. Thian satliah  kan ni lo, Zep, ven thawn leh ui chhe te pawh kan inkarah a awm lo tih hian a sawifiah awm e. Kan thlen tawpah a hmeichhia emaw, mipa emaw Chair, Sofa leh chhuatah a remdan angin kan riak nghal tawp a. Chhung te hian chhete pawhin min hau ngai lo. Hauh ngaia kan awm loh avangin.

SU hruaitu thlan hma zanah khan Lalpe-a te line up leh KBA memberte chuan House to House Campaign neih dan tur ngaihtuahin an lo kal khawm a. College zirlaite in hriat theih chin chin chu an tlawh nghal turin an rel a, Chan bik neiin an inthen darh a. Kei leh Rampuii chu kan chhuak peih ve ta tlat lo a. Peih loh chuan kan inphut ngai loh avangin min chhuahsan ta vek a. Lalpe-a roomah kan awm thin dan ang bawkin kan awm a, Music ngaithla chunga duh duh dana awmin, Computer Games khelh leh online pah chuan kan awm a. Ka Game khelh laklawh lai chuan Ramkel-i chuan Lehkhabu hian ka darah min lo vawm a, a kuta zaizir pah chuan ‘Shhhhhhh’ tiin min hui a, a hmuia kut dah pahin ‘bengchheng suh thil hlauhawm lutuk a awm’ ti niawm tak hian.  Sound ka off a, min koh ang chuan thawm dim tak chungin ka phei them them a.

Thawm dim leh hlau thawng taka Lalpe-a khuma lawn pah chuan ‘eng nge thil awmzia?’ tiin ka zawt a. Nui uar uar pah hian thil tha deuh ka ngaihtuah chhuak a, ‘Yes nge No’ tiin min zawt nghal a. A va ho tak e aw, min tihlauthawng vek nia! Kan tih thin dan a nih avangin a tha emaw, tha lo emaw Yes chu thihna tur pawh ni mahse Yes a ni, zawm mai tur kan ni. Zawhna zawh belh a thiang lo. ‘Vanram kai suh aw?’ tih zawhna pawh nisela, No kan tih chuan sut leh theih a ni tawh lo. Chuti ang ti duh tur khawp chuan Yes leh No zawhna kan inpe zawt mai mai lo a. Zawhna hi Yes tia chhang thin kan ni a, a chhanna tur hre lawk sa hian Yes tur zawhna kan siam fo a, nemnghehna tur ang zawhna kan inzawt thin anih ber chu. A thil ngaihtuah chhuah chu ‘Zu sem tur lo inchhin a nih pek chu!’ Kan zingah tumahin zu emaw, drugs emaw kan ti ngai si lo a. Chumi a nih avanga an Line Up ho zu pawh chu Lalpe-a rooma awm a nihzia pawh kan hria e.

Zu awmkhawmna Case pakhat chu a hawng a, inthiam lohna leh pawisak em em emaw, pawi tihna pawh nei lem lo chuan ka lo en reng a. Thiante tumah kan veng thawng lo a, Case thum pawh chu lo inzo vek ni ila, mitmei ven a ngai lo ang ti khawpin kan inpawh a ni. Ka chhang tawha ka inpui mai tur a ni. Kan hlimpui viau a, a chhan chu Zu in ngai kan awm tlat loh avang leh phur rukna riau kan nei a. Ramkeli chuan a thli-a tui ti vak lo chung chuan No khat inzawh tur a nih avangin kan inzo nghal vek a, tui tak chu ni lo mahse kan luak lem lo. Ngawi reng chunga a hnathawh dan tur ngaichang leh suangtuaha kan ngaihchan lai chuan engtin mah kan awm lo. Kan awm lo ti ila, a thawhdan kan hre thiam lo zawk a ni ang. 

Ramkeli bulah chuan “Yes or No?” tiin ka zawt ve thung a. ‘Yes’ a lo tih ve avangin No khat dang leh tiin ka thli nghal a. No khat ve ve chu kan han in leh ta a nih chu. Zu kan rui nge rui lo, a thawk nasa nge nasa lo tih pawh kan hre lo. Pangngai takin kan awm a. Eng eng emaw kan sawi a, mak tak maiin, min lo fawp ta ngawt a nih kha. Chhan let dan pawh ka thiam lo a, inngaihzawn lam thu pawh a ni hek lo. Inzahna pawh awm lo khan kan han infawp leh chhina a nuam phian nia! Rilru tha lo emaw, engmah chuti ang pawhin kan pu lo. Nulat tlangval lam thil a ni lo a, chhungkua emaw thian lam thil pawh a ni lo. Zu hnathawh a ni tih reng kan hre lo.

Ka luak a chhuak deuh nge ‘Uarkkk’ ti chung chuan Bathroom panin ka tlan phei a. Min lo nuih uar uar lai chu ka hre ruai ruai thei chauh a ni. Reife ka awm hnu chuan ka thawl hawkin ka hria a, chumi chhung chuan SU Election Campaign tura chhuak zinga pakhat, kan G.S tur Seconder chu theihnghilh neih avangin an lo tir let a ni awm e. Bathrooma ka awm reng, kawng pawh khar hman lo, light pawh On hman loa lut kha ka ni a, ka chhuak tur chuan Ramkeli leh Chupa chu zei fahran hian an lo infawp a, Nui chunga bathroom atanga ka chhuak mai tur chu khaw tawiin, thawm ka neih dawn chiah chuan chupa chuan a hnute-ah a zen chho tih ka hmu a. Ramkeli mitmeng leh chezia ka hmuh chuan chawp leh chilhin ka thinrim thut a, rui der deuh roh chung chuan ka pawh ta nghal a. Anmahni phawk anga a ngaih ai mahin ka rui lutuk hmel chu mak a ti awm e. Ka harhfim a, mahse ka thinrimna avang chuan ka ruih belh ve ta ngawt a ni.

Eng mah hre awm lo leh, pawisa nei awm miah lo chuan a theihnghilh chu lain a chhuak leh nghal mai a. Ka hmel a lo dur a, ka lo mengrum a ni tih Ramkelin a hriat chuan ‘I va rui awm ve, I dam lo em ni, I thinrim mi. I va hlauhawm khui khui ve?’ tiin min zawt mawlh mawlh a. Ka chhang duh lo lui ve ngat a. Ka rui (der) lehzual miau a. Min zawh tak zelah chuan ‘Khati ang mihring te lo duat reng reng’ lak tlak loh lutuk mai’ tiin farnu zilhin ka zilh a. Ani chuan ‘KBA ho lah hi ngaihzawng neihna chance pawh min pe ve ngai lo a, lentar tir min tum emaw ni?’ Hmeichhia min ngaihtuah lo tiin  a vui a. Khati ang ‘Mipa ai tlawt chuan ka laktlak zawk ang’ tih pah chuan ka kuah a, tum miah loh chuan ka fawp lui ta a. A tihdan tih zir paha a hnute khawih pah chuan khumah chuan kan tal vel a. Inngaihzawn awm hawt si lo khan eng emaw thawktu avang chuan zak map lovin, ka phelh a, uang pah ti tih chuan kan inchhirna tur thil kan ti ta a nih kha. Kha rilru-a vuina chhe te, tihtauhna kha awm lo se chuan pangngai ni ve mai tur kha kan ni. Thikna rilru nge ni a, thlavang hauhna vang pawh ka hrethiam ta lo.

Mak kan inti a, ngawi rengin kan awm a. Zu rui der ang maiin kan awm a. Lalpea te pawh chuan ngaihthat lohna pawh an nei lo a. Zu kan lo in chu an hlimpui phian a. Zan dang ang chu nise kan riakkhawm leh ang chu. Mahse, ngawi rengin KBA ho chu kan haw darh ta a nih kha. Kan haw lamah chuan ‘Rai ta ila engtin nge i tih ang?’ tiin min zawt a. Ngaihsam tak chungin ‘Rai loh tur a ni mai’ tih khan ka chhang mai a. Thil dang kan sawi chhunzawm leh daih a, a hma ang kha erawh kan ni tawh lo. Engmah awm lawk ta lo chu inngaihzawn tum pawhin kan awm phah lo a. Thian thatna siam danglama inngaihzawn emaw, inhuatphah emaw pawh kan tum hek lo. Kan ngaihthah hmiah a. Thla hnih hnu velah chuan Ramkeli chu a pawn chhuak mang lo a, ngaihthatna pawh nei lo chuan kar hnih khat hnuah chuan KBA mizia a lo pu ve leh ta mai bawk a....

Mak tak maiin ka bulah a lo dinga, nam her lawih khawpin ka fiam a, a inher lai tak chuan a hnung lamah ka kuah thut a. Ka chhuah chhal nghal mawlh mawlh a,  ‘Kel-i’ tiin a banah chuan ka hmer chawt chawt a. “Ka fawh hmasak ber i ni a, Pathian duh loh zawnga ka tluk luhna i ni a, vawi khat pawh hi hrechhuak angin i awm duh lo a. I theihnghilh vek thei bik em ni? I inthiam chawp thei bik a maw?” tiin ka zawt a. Damchhungin inthiam lo reng rengin min siam a, i inthiam thei bik a mi? tiin ka zawt a. A ngawih tak rengah chuan ka thinrim thut a. A darah ka seh a, na ti awm pawha a awm loh avang te chuan ka thinrim a zual a. Na mangkhengin  a dinglam koki-ah kan seh leh a nih kha! Kan nu a rak thawt a, a leng awrh awrh a, ka fapa; Mampuia kum khat mi lek chu a lo phu uih uih a, a tap ri ta chiam a. Mumang atanga harhchhuak ka ni a, bang bo deuh mah ila ka laa zia-awm a, kan nu tho a hmel, hlauthawng hmel nen, a manganthlak khawp asin.  Huana kel lut hnawtchhuak tur inpet ruh chungin “Keli” tiin ka lei ka seh emaw ka tih miau avangin zingah insawifiah a awl khawp mai. Kan nu erawh a lungawi vak lo, mumanga kel hnawt ka ni miau a. 

P.S : KBA Member, Lal Dampuia, Vellore CMC-a Kal thlak (Kidney transplant) tur Donors changa kum thum dawn awm tawh, In luah leh a senso, ‘Dailai’ ngai reng bawk si hi tanpui theihna ka nei bawk si lo a. Visit turin a awmna a hla bawk si. A tan hian tih theih ka va nei lo em! Dam taka keini kan la zung huau huau thei tih ka hriat te hian Hnamdang vuakthluk  mawlh mawlh a, pack mawi awm miah lova, a pack pack-a  thawn thlak hmiah hmiah mai tur emaw ni, a lo mil mial thei a. (Ka ngaihtuahna a ni miau a). Mahni nunna hlu tak la mai thinte hian a mamawhtu leh harsa taka ‘dam duhin Vellore-ah kum thum a awm tawh’ tihte hi hria se, an Donate phal ang em le tiin ka inzawt fo thin. Ka fapa naupang zawk pawhin ‘Apu Dampuia’n kal thar a neih theih nan’ tiin a tawngtai thin asin. Chhung inkhawma tawngtaipui ziah hian a hnem lo a nih pawhin Lalpa erawh khi chu a la dampui dawn chiang a ni.

Puitling taka chanchin zawh dawnin ka inthiam tawh lo a, kan mizia pawh a ni ngai lo. Khatih hunlai ang kha chu nise, “Thurochhiah ziak tawh la, i neih sa te hi mumal takin sem ang che, Chhang thawp hmanga i thlem chhuah Mualvenga i fapa leh kawithuka i fanu tan pawh ziak tel ang che aw” tiin kan fiam leh bawrh bawrh awm si a. Vanglaini thla hnih chhuak reng pack mawi hmangin Vellore lama an lo khul turin lehkhachhia kan thawn leh dawn zawk ni ang. Total Bandh laiin Motor chil turin Gyspsy hma takah min kuah bet tlat tawh a, a palian sia a ka mangang hman khawp asin! Phuba lakna pawh ni lo, chakma avang zawkin Auto Rickshaw-ah an chhungin an mu vek thei a, a chhuat, a seat leh a hnung zawlah. Chakma avang bawkin a nupui neihah ka chimawm thei lo a. Khang pawisa zozai te khan lo tanpui ta zawk ila tha tur a nia! Tunah lem Neiha hian neih ka nei lo a nih hi.  
Whatsapp hmanga ka biak che hian sawi tur ka van thei ta si a. I tan kan phuahchawp a nih hi, I phone atang khan i lo chhiar ve mual mual dawn nia. A ngaihnawm zawng hi ka thiam ve lo a, a hlimawm lai taka tihtawp nachang ka hre lo leh ka thiam lo hi chu a hlu lo ta ve ngawt ang. In nu bulah erawh lo chhiar ri reng reng suh ang che, ram hla taka nupa inthen chu a tih chi miah loh a, buaipuitu che an tlem sawt dawn si a. I fapa phei chuan hre lo law law rawh se! Miss you, Thianpa

13th August 2015. 2.30 AM than harh vela ziaksak a ni. Ka edit peih chuan ka la edit mahna





No comments:

Post a Comment